ഗുവാഹത്തി: അസമിൽ പ്രളയസാഹചര്യം അതീവ ഗുരുതരമായി തുടരുന്നു. സംസ്ഥാനത്തെ 11 ജില്ലകളിലായി 7.21 ലക്ഷത്തോളം ആളുകളെ പ്രളയം ബാധിച്ചതായി അസം ഡിസാസ്റ്റർ റിപ്പോർട്ടിംഗ് ആൻഡ് ഇൻഫർമേഷൻ മാനേജ്മെന്റ് സിസ്റ്റം (DRIMS) അറിയിച്ചു. കഴിഞ്ഞ 24 മണിക്കൂറിനിടെ ആറു പേർ കൂടി മരിച്ചതോടെ ആകെ മരണസംഖ്യ 47 ആയി ഉയർന്നു. കാർബി ആംഗ്ലോങ്, ഗൊലാഘട്ട്, ചരായ്ഡിയോ, കാംരൂപ്, ശിവസാഗർ, ജോർഹാട്ട്, ദിബ്രുഗഡ്, നാഗാവ്, ധേമാജി, ഹോജായ്, കാംരൂപ് (മെട്രോ) എന്നിവയാണ് പ്രളയബാധിത ജില്ലകൾ. 900-ഓളം ഗ്രാമങ്ങളെ പ്രളയം ബാധിച്ചിട്ടുണ്ട്.
ദുരന്തം ഏറ്റവും രൂക്ഷമായി ബാധിച്ച ശിവസാഗർ ജില്ലയിൽ 3,92,195 ആളുകളെയും ചരായ്ഡിയോയിൽ 1,10,755 പേരെയും ജോർഹാട്ടിൽ 97,690 പേരെയും ദിബ്രുഗഡിൽ 13,390 പേരെയുമാണ് പ്രളയം ബാധിച്ചത്. സംസ്ഥാനത്തൊട്ടാകെ 24,897.27 ഹെക്ടർ കൃഷിഭൂമി വെള്ളത്തിനടിയിലായി. ദുരന്തബാധിതർക്കായി 106 ക്യാമ്പുകളും 381 വിതരണ കേന്ദ്രങ്ങളും ഉൾപ്പെടെ 487 ദുരിതാശ്വാസ കേന്ദ്രങ്ങൾ തുറന്നിട്ടുണ്ട്. 24,418 പേർ ക്യാമ്പുകളിൽ കഴിയുമ്പോൾ 2,90,826 പേർ വിതരണ കേന്ദ്രങ്ങൾ വഴി സഹായം കൈപ്പറ്റുന്നുണ്ടെന്ന് അധികൃതർ വ്യക്തമാക്കി.
പ്രളയത്തിൽ 1,38,965 വളർത്തുമൃഗങ്ങളെ ബാധിച്ചതായും 500 കോഴികൾ ഉൾപ്പെടെ 540 ജീവികൾ ഒലിച്ചുപോയതായും റിപ്പോർട്ടിൽ പറയുന്നു. ബുർഹിദിഹിംഗ് (ചെനിമരി-ഖോവാങ്), ദിഖൗ (ശിവസാഗർ), ധൻസിരി-സൗത്ത് (നുമാലിഗഡ്), കുഷിയാറ (ശ്രീഭൂമി) എന്നീ അഞ്ച് പ്രധാന നദികൾ അപകടനിലയ്ക്ക് മുകളിലും ദിസാങ് നദി (നംഗ്ലാമുരഘട്ട്) സർവകാല ഉയർന്ന ജലനിരപ്പിന് (HFL) മുകളിലുമാണ് ഒഴുകുന്നത്.
111 മെഡിക്കൽ ടീമുകളും 56 ബോട്ടുകളും ഇന്ത്യൻ വ്യോമസേനയുടെ ഒരു ഹെലികോപ്റ്ററും ഉപയോഗിച്ച് ദുരന്തബാധിത മേഖലകളിൽ രക്ഷാപ്രവർത്തനം പുരോഗമിക്കുകയാണ്. ഇതുവരെ 8,409 ആളുകളെയും 35 വളർത്തുമൃഗങ്ങളെയും സുരക്ഷിത സ്ഥാനങ്ങളിലേക്ക് മാറ്റിയതായി അധികൃതരുടെ വിലയിരുത്തലിൽ വ്യക്തമാക്കുന്നു.
Assam floods death toll rises to 47; over 7 lakh people affected, reports say
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
