വിന്നിപെഗ്: വിന്നിപെഗുകാരുടെ പ്രധാന യാത്രാമാർഗ്ഗങ്ങളിലൊന്നായിരുന്ന ചരിത്രപ്രസിദ്ധമായ ആർലിംഗ്ടൺ സ്ട്രീറ്റ് പാലം ഈ വരുന്ന ജൂൺ ഒന്നു മുതൽ പൊളിച്ചുതുടങ്ങും. സിറ്റി പബ്ലിക് വർക്സ് കമ്മിറ്റി യോഗത്തിലാണ് പാലത്തിന്റെ തെക്കുഭാഗം പൊളിച്ചുനീക്കുന്നതിനായി 9.9 മില്യൺ ഡോളറിന്റെ കരാറിന് അനുമതി നൽകിയത്. തുരുമ്പെടുത്ത് അതീവ അപകടാവസ്ഥയിലായ പാലം എത്രയും വേഗം പൊളിച്ചുമാറ്റിയില്ലെങ്കിൽ വലിയ സുരക്ഷാഭീഷണിയാകുമെന്ന് സിറ്റി എഞ്ചിനീയർമാർ മുന്നറിയിപ്പ് നൽകുന്നു. ട്രെയിൻ ഗതാഗതം കുറവുള്ള ജൂലൈ, ഓഗസ്റ്റ് മാസങ്ങളിൽ മാത്രമേ റെയിൽവേ യാർഡിന് മുകളിലൂടെയുള്ള പാലത്തിന്റെ ഭാഗങ്ങൾ പൊളിക്കാൻ സാധിക്കൂ എന്നതിനാലാണ് സിറ്റി കൗൺസിൽ നടപടികൾ വേഗത്തിലാക്കിയത്.
2023 നവംബറിൽ പാലം പൂർണ്ണമായും അടച്ചതുമുതൽ നഗരത്തിൽ വൻ ഗതാഗതക്കുരുക്കാണ് അനുഭവപ്പെടുന്നത്. നിലവിൽ മറ്റ് രണ്ട് ബദൽ മാർഗ്ഗങ്ങളായ ‘സ്ലാ റെബ്ചുക്’ പാലത്തിലൂടെയും ‘മക്ഫിലിപ്സ്’ അണ്ടർപാസിലൂടെയും പ്രതിദിനം അയ്യായിരത്തിലധികം അധിക വാഹനങ്ങളാണ് കടന്നുപോകുന്നത്. പാലം പൊളിക്കുന്നതോടെ വരും ദിവസങ്ങളിൽ ഈ ദുരിതം ഇരട്ടിക്കും. തെക്കുഭാഗത്തെ പൊളിക്കൽ നടപടികൾക്ക് ഏകദേശം ആറ് മാസത്തോളം സമയമെടുക്കുമെന്നതിനാൽ ആർലിംഗ്ടൺ സ്ട്രീറ്റ്, ലോഗൻ അവന്യൂ എന്നിവിടങ്ങളിൽ കടുത്ത ഗതാഗത നിയന്ത്രണങ്ങൾ ഉണ്ടാകുമെന്നും അധികൃതർ അറിയിച്ചു.
ഇത് പാലം പൊളിക്കുന്നതിന്റെ ആദ്യ ഘട്ടം മാത്രമാണ്. വടക്കുഭാഗം കൂടി പൊളിച്ചുനീക്കണമെങ്കിൽ 2027 വരെ കാത്തിരിക്കേണ്ടി വരും. പുതിയ പാലത്തിന്റെ രൂപരേഖ തയ്യാറായിവരുന്നുണ്ടെങ്കിലും, ഇതിനായുള്ള ഫണ്ട് ഇതുവരെ ലഭ്യമായിട്ടില്ല. ഫണ്ട് അനുവദിച്ചാൽ പോലും പൊളിക്കൽ നടപടികൾ പൂർത്തിയായി രണ്ട് മുതൽ മൂന്ന് വർഷത്തിന് ശേഷമേ പുതിയ പാലത്തിന്റെ നിർമ്മാണം ആരംഭിക്കൂ എന്ന് പ്രൊജക്റ്റ് എഞ്ചിനീയർ ദാമിർ മുഹൂർദാരെവിച്ച് വ്യക്തമാക്കി. ചുരുക്കത്തിൽ, വിന്നിപെഗിലെ ഡ്രൈവർമാരും യാത്രക്കാരും ഇനിയും വർഷങ്ങളോളം ഗതാഗതക്കുരുക്കിൽ വലയേണ്ടി വരുമെന്ന് ഉറപ്പായി.
Arlington Bridge removal to get underway this summer
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
