ഒട്ടാവ: ഇമിഗ്രേഷൻ, റെഫ്യൂജീസ് ആൻഡ് സിറ്റിസൺഷിപ്പ് കാനഡ (IRCC) തങ്ങളുടെ ഏറ്റവും പുതിയ എക്സ്പ്രസ് എൻട്രി ഡ്രോ ഫലങ്ങൾ പുറത്തുവിട്ടു.കാനഡയിൽ പ്രവൃത്തിപരിചയമുള്ളവർക്കായുള്ള ‘കാനഡ എക്സ്പീരിയൻസ് ക്ലാസ്’ (CEC) വിഭാഗത്തിൽ 2,000 ഉദ്യോഗാർഥികൾക്കാണ് ഇത്തവണ ഇൻവിറ്റേഷൻ ടു അപ്ലൈ (ITA) ലഭിച്ചത്. കാനഡയ്ക്കുള്ളിൽ തന്നെയുള്ള ഉദ്യോഗാർഥികളെ സ്ഥിരതാമസത്തിനായി തിരഞ്ഞെടുക്കുന്ന സർക്കാരിന്റെ നയത്തിന്റെ ഭാഗമായാണ് ഈ നടപടി.
പുതിയ ഡ്രോയിൽ CRS സ്കോർ 515 ആയി ഉയർന്നു എന്നത് ശ്രദ്ധേയമാണ്. അടുത്തകാലത്തെ ഏറ്റവും ഉയർന്ന കട്ട്-ഓഫ് നിരക്കുകളിൽ ഒന്നാണിത്. 2025 ജൂൺ 10-ന് മുൻപ് എക്സ്പ്രസ് എൻട്രി പ്രൊഫൈൽ സമർപ്പിച്ചവരിലെ നിശ്ചിത സ്കോർ ഉള്ളവരെയാണ് ഈ ഘട്ടത്തിൽ പരിഗണിച്ചത്. കഴിഞ്ഞ മാർച്ചിൽ നടന്ന ഡ്രോകളിൽ സ്കോർ നില 507 മുതൽ 509 വരെയായിരുന്നുവെങ്കിൽ, ഇത്തവണ അത് ഗണ്യമായി വർധിച്ചത് അപേക്ഷകർക്കിടയിൽ വലിയ മത്സരത്തിന് കാരണമായിട്ടുണ്ട്.
2026-ൽ ഇതുവരെ 61,154 അപേക്ഷ ക്ഷണങ്ങളാണ് കാനഡ നൽകിയിട്ടുള്ളത്. ഇതിൽ സി.ഇ.സി വിഭാഗത്തിലൂടെ മാത്രം 30,250 പേർക്ക് അവസരം ലഭിച്ചു. പ്രൊവിൻഷ്യൽ നോമിനേഷൻ ലഭിച്ചവർക്കും കാനഡയിൽ ജോലി പരിചയമുള്ളവർക്കും മുൻഗണന നൽകുന്ന രീതിയാണ് ഈ വർഷം തുടരുന്നത്. ഫ്രഞ്ച് ഭാഷാ വൈദഗ്ധ്യം, ഹെൽത്ത് കെയർ തുടങ്ങിയ പ്രത്യേക വിഭാഗങ്ങൾക്കും വരും മാസങ്ങളിൽ കൂടുതൽ പ്രാധാന്യം ലഭിക്കുമെന്നാണ് കുടിയേറ്റ മേഖലയിലെ വിലയിരുത്തലുകൾ.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
Express Entry Draw; Details of the draw held on April 14th are known
