ലോസ് ആഞ്ചലസ്: ലാപ്ടോപ്പുകളില്‍ ടച്ച്സ്‌ക്രീന്‍ സാങ്കേതികവിദ്യ വേണ്ടെന്ന ദീര്‍ഘകാല നിലപാട് മാറ്റി ആപ്പിള്‍. കമ്പനിയുടെ ആദ്യ ടച്ച്സ്‌ക്രീന്‍ മാക്ബുക്കുകള്‍ സിഇഒ ജോണ്‍ ടെര്‍ണസ് ബുധനാഴ്ച ലോസ് ആഞ്ചലസില്‍ നടന്ന ചടങ്ങില്‍ അവതരിപ്പിച്ചു. അവധിക്കാല ഷോപ്പിങ് സീസണിന് മുന്നോടിയായി പുതിയ ഉല്‍പ്പന്നങ്ങള്‍ തുടര്‍ച്ചയായി അവതരിപ്പിക്കുന്നതിന്റെ ഭാഗമായാണ് പുതിയ മാക്ബുക്കുകളും എത്തുന്നത്.
സെപ്റ്റംബറില്‍ സിലിക്കണ്‍ വാലിയിലെ ആസ്ഥാനത്ത് മടക്കാവുന്ന ഐഫോണ്‍ ഡ്യുവോ അവതരിപ്പിച്ച ആപ്പിള്‍, ഈ മാസം ആദ്യം ന്യൂയോര്‍ക്കില്‍ സ്മാര്‍ട്ട് ഹോം ഹബ്ബും പുറത്തിറക്കിയിരുന്നു. പുതിയ വിപണികളിലേക്ക് കടക്കാനുള്ള കമ്പനിയുടെ ശ്രമങ്ങളുടെ തുടര്‍ച്ചയാണ് പുതിയ ഉല്‍പ്പന്നങ്ങള്‍. എന്നാല്‍ മാക്ബുക്കുകളില്‍ ടച്ച്സ്‌ക്രീന്‍ അവതരിപ്പിച്ചതോടെ ആപ്പിളിന്റെ പഴയ നിലപാടുകളെക്കുറിച്ചുള്ള ചര്‍ച്ചയും വീണ്ടും സജീവമായി.
ടച്ച്സ്‌ക്രീന്‍ ലാപ്ടോപ്പുകളോട് ആപ്പിള്‍ നേരത്തേ എതിര്‍പ്പ് പ്രകടിപ്പിച്ചിരുന്നു. 2010-ല്‍ അന്നത്തെ സിഇഒ സ്റ്റീവ് ജോബ്‌സ് ലാപ്ടോപ്പുകളില്‍ ടച്ച്സ്‌ക്രീന്‍ ഉപയോഗിക്കുന്നത് ശരീരത്തിന്റെ സ്വാഭാവിക പ്രവര്‍ത്തനത്തിന് അനുയോജ്യമല്ലെന്ന് അഭിപ്രായപ്പെട്ടിരുന്നു. 2012-ല്‍ ടിം കുക്കും ടോസ്റ്ററും ഫ്രിഡ്ജും ഒന്നിപ്പിക്കുന്നതുപോലെയാണ് ഇത്തരം ഉപകരണങ്ങളെന്നായിരുന്നു പ്രതികരിച്ചത്. പിന്നീട് ആപ്പിളിന്റെ സിഇഒ ആയ ടെര്‍ണസ്, ഐപാഡ് നിരയിലൂടെ കമ്പനി ഇതിനകം ടച്ച്സ്‌ക്രീന്‍ കമ്പ്യൂട്ടര്‍ അവതരിപ്പിച്ചിട്ടുണ്ടെന്ന് വാദിച്ചിരുന്നു.
ALSO READ: ഫോൾഡബിൾ ഫോണുകളുടെ സംശയങ്ങൾ തീർക്കാൻ സാംസങ്: കാനഡയിൽ ‘Ask Us Anything’ പദ്ധതിക്ക് തുടക്കം
എന്നാല്‍ വിന്‍ഡോസ് ലാപ്ടോപ്പുകളില്‍ ഒരു പതിറ്റാണ്ടിലേറെയായി ടച്ച്സ്‌ക്രീന്‍ സൗകര്യം ലഭ്യമാണ്. ഐഫോണിന്റെ ഇരുപതാം വാര്‍ഷികം അടുത്തെത്തുന്ന സാഹചര്യത്തില്‍, സ്‌ക്രീനില്‍ സ്പര്‍ശിച്ച് പ്രവര്‍ത്തിപ്പിക്കാവുന്ന ഉപകരണങ്ങള്‍ പുതിയ തലമുറ ഉപഭോക്താക്കള്‍ പ്രതീക്ഷിക്കുന്നുമുണ്ട്. ടച്ച്സ്‌ക്രീനുകളോടുള്ള എതിര്‍പ്പ് മാറ്റിയത് അനിവാര്യമായ മാറ്റമാണെന്ന് സാങ്കേതികവിദഗ്ധന്‍ ആന്‍ഷെല്‍ സാഗ് അഭിപ്രായപ്പെട്ടു.
പുതിയ മാക്ബുക്കുകളോട് ഉപഭോക്താക്കള്‍ എങ്ങനെ പ്രതികരിക്കുമെന്നതാണ് ഇനി നിര്‍ണായകം. സമീപകാലത്ത് മാക് വില്‍പ്പനയില്‍ വര്‍ധനയുണ്ടായിട്ടുണ്ടെങ്കിലും, ആര്‍ട്ടിഫിഷ്യല്‍ ഇന്റലിജന്‍സ് (എഐ) പ്രവര്‍ത്തനങ്ങള്‍ ഉപകരണത്തില്‍ത്തന്നെ നിര്‍വഹിക്കാന്‍ കമ്പ്യൂട്ടറുകള്‍ വാങ്ങുന്ന സാങ്കേതികവിദഗ്ധരും സ്ഥാപനങ്ങളുമാണ് ഈ വളര്‍ച്ചയുടെ പ്രധാന പങ്കാളികള്‍.
ഈ ആഴ്ച പുതിയ M6 ചിപ്പോടുകൂടിയ അടിസ്ഥാന മാക്ബുക്ക് പ്രോ മോഡലും ആപ്പിള്‍ പ്രഖ്യാപിച്ചിരുന്നു. എന്നാല്‍ നിലവിലുള്ള M5 Pro, M5 Max ചിപ്പുകള്‍ ഉപയോഗിക്കുന്ന ടച്ച്സ്‌ക്രീന്‍ മോഡലുകളാണ് കമ്പനി പുറത്തിറക്കുകയെന്ന് ബ്ലൂംബെര്‍ഗ് റിപ്പോര്‍ട്ട് ചെയ്തിട്ടുണ്ട്. അതിനാല്‍ നിലവിലെ മോഡലുകളെ അപേക്ഷിച്ച് പ്രകടനശേഷിയില്‍ വലിയ വര്‍ധന പുതിയ ഉപകരണങ്ങളില്‍ ഉണ്ടാകില്ലെന്നാണ് സൂചന.
എഐ മോഡലുകള്‍ ഉപകരണത്തില്‍ത്തന്നെ പ്രവര്‍ത്തിപ്പിക്കാന്‍ കൂടുതല്‍ മെമ്മറിയും മികച്ച പ്രോസസറുകളുമാണ് ഉപഭോക്താക്കള്‍ക്ക് ആവശ്യമെന്ന് സാങ്കേതിക നിരീക്ഷകനും ഓള്‍-ഇന്‍ പോഡ്കാസ്റ്റ് അവതാരകനുമായ ജേസണ്‍ കലാക്കാനിസ് സമൂഹമാധ്യമമായ എക്‌സില്‍ കുറിച്ചു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/GIh0npbq3d1GgGCL00k37z
‘Apple Introduces First Touchscreen MacBooks’
