കാൽഗറി : ആൽബർട്ടയിൽ വരാനിരിക്കുന്ന പ്രവിശ്യാ തിരഞ്ഞെടുപ്പ് നീട്ടിവെക്കണമെന്നോ നിലവിലെ തിരഞ്ഞെടുപ്പ് മണ്ഡലങ്ങളുടെ അതിർത്തികൾ തന്നെ നിലനിർത്തണമെന്നോ ഉള്ള തിരഞ്ഞെടുപ്പ് കമ്മീഷന്റെ ആവശ്യം ജസ്റ്റിസ് മന്ത്രി മിക്കി അമെറി തള്ളി. 2027 ലെ തിരഞ്ഞെടുപ്പിനായി വോട്ടെടുപ്പ് കേന്ദ്രങ്ങളും അതിർത്തികളും സജ്ജമാക്കാൻ തിരഞ്ഞെടുപ്പ് കമ്മീഷൻ തയ്യാറാകണമെന്ന് ജസ്റ്റിസ് മന്ത്രി നിർദ്ദേശം നൽകി.
സെപ്റ്റംബറിലെ സ്വതന്ത്ര റഫറണ്ടത്തിന് ശേഷം തങ്ങളുടെ പ്രവർത്തനം പ്രതിസന്ധിയിലാണെന്നും പുതിയ മണ്ഡല അതിർത്തികൾ നിർണയിച്ച് തിരഞ്ഞെടുപ്പിന് പൂർണ്ണമായി സജ്ജമാകാൻ 18 മാസമെങ്കിലും വേണമെന്നും ചൂണ്ടിക്കാട്ടിയാണ് ചീഫ് ഇലക്ടറൽ ഓഫീസർ ഗോർഡൻ മക്ലൂർ എം.എൽ.എമാർക്ക് കത്തയച്ചത്. എന്നാൽ നിലവിലെ ശരത്കാല സമ്മേളനം അവസാനിക്കുന്നതിന് മുമ്പ് പുതിയ മണ്ഡല അതിർത്തികൾ അന്തിമമാക്കുമെന്നും അതിനുശേഷം തയ്യാറെടുപ്പുകൾക്കായി തിരഞ്ഞെടുപ്പ് കമ്മീഷന് 11 മാസത്തോളം സമയം ലഭിക്കുമെന്നും മന്ത്രി മിക്കി അമെറി മറുപടി നൽകി.
സ്വതന്ത്രമായ സ്ഥാപനമാണെങ്കിലും നിയമപ്രകാരം നിർദ്ദിഷ്ട സമയത്തിനുള്ളിൽ തിരഞ്ഞെടുപ്പ് നടത്താനുള്ള ബാധ്യത കമ്മീഷനുണ്ടെന്ന് മന്ത്രി വ്യക്തമാക്കി. അതേസമയം തെക്കൻ ആൽബർട്ടയിലെ ലെത്ത്ബ്രിഡ്ജ്, കാൽഗറി തുടങ്ങിയ മേഖലകളിൽ ഗെറിമാൻഡറിങ് (ഭരണകക്ഷിക്ക് അനുകൂലമായി മണ്ഡല അതിർത്തികൾ പുനർനിർണ്ണയിക്കുന്ന രീതി) നടക്കുകയാണെന്ന് പ്രതിപക്ഷമായ എൻ.ഡി.പി നേതാവ് നഹീദ് നെൻഷി ആരോപിച്ചു. എൻ.ഡി.പി സ്വാധീനമേഖലകൾ വിഭജിച്ച് ഭരണകക്ഷിയായ യു.സി.പിക്ക് നേട്ടമുണ്ടാക്കാനാണ് സർക്കാരിന്റെ ശ്രമമെന്നും ഇതിനെതിരെ കോടതിയെ സമീപിക്കുമെന്നും പ്രതിപക്ഷം വ്യക്തമാക്കി.
Also Read: ചൂടോ തണുപ്പോ? കാനഡയിൽ നവംബറിലെ കാലാവസ്ഥാ പ്രവചനം ഇങ്ങനെ
നിലവിൽ 87 സീറ്റുകളുള്ള നിയമസഭയിൽ അംഗസംഖ്യ 91 ആയി ഉയർത്താനാണ് ശുപാർശ. പുതിയ അതിർത്തി നിർണയ റിപ്പോർട്ട് തിങ്കളാഴ്ച നിയമസഭയുടെ പരിഗണനയ്ക്ക് വരും. എന്നാൽ സർക്കാരിന്റെ രാഷ്ട്രീയ താൽപ്പര്യങ്ങൾക്കനുസരിച്ചാണ് അതിർത്തി മാറ്റങ്ങൾ നടത്തുന്നതെന്ന പ്രതിപക്ഷ ആരോപണം പ്രീമിയർ ഡാനിയേൽ സ്മിത്ത് നിഷേധിച്ചു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/GIh0npbq3d1GgGCL00k37z
