ഒട്ടാവ: ആൽബർട്ട പ്രവിശ്യയിൽ ജോലി ചെയ്യാനോ ബിസിനസ്സ് തുടങ്ങാനോ ആഗ്രഹിക്കുന്ന വിദേശ പൗരന്മാർക്ക് തങ്ങളുടെ യോഗ്യത സ്വയം പരിശോധിക്കാൻ അവസരമൊരുക്കി സർക്കാർ പുതിയ ഡിജിറ്റൽ സംവിധാനം പുറത്തിറക്കി. എലിജിബിലിറ്റി എക്സ്പ്ലോറർ എന്ന് പേരിട്ടിരിക്കുന്ന ഈ പുതിയ ഓൺലൈൻ ടൂൾ വഴി ആൽബർട്ട അഡ്വാൻറ്റേജ് ഇമ്മിഗ്രേഷൻ പ്രോഗ്രാമിലെ (AAIP) ഏത് വിഭാഗത്തിലാണ് തങ്ങൾ ഉൾപ്പെടുക എന്ന് ഉദ്യോഗാർത്ഥികൾക്ക് ഏതാനും മിനിറ്റുകൾക്കുള്ളിൽ മനസ്സിലാക്കാം. ജൂൺ 17-ന് ആരംഭിച്ച ഈ സേവനം AAIP-യുടെ ഔദ്യോഗിക വെബ്സൈറ്റിൽ ലഭ്യമാണ്.
ഉപയോക്താക്കൾ തങ്ങളുടെ ലക്ഷ്യം ജോലി ചെയ്യുകയാണോ അതോ ബിസിനസ്സ് തുടങ്ങുകയാണോ എന്ന് ആദ്യം വ്യക്തമാക്കണം. തുടർന്ന് നൽകുന്ന ലളിതമായ ചോദ്യാവലി അടിസ്ഥാനമാക്കി, ഇമിഗ്രേഷനായി ഏതൊക്കെ വഴികളാണ് നിങ്ങൾക്ക് അനുയോജ്യമായതെന്ന് ഈ ടൂൾ നിർദ്ദേശിക്കുന്നു. ജോലി തേടുന്നവരോട് നിലവിലെ തൊഴിൽ ഓഫർ, വർക്ക് പെർമിറ്റ്, തൊഴിൽ വിഭാഗം തുടങ്ങിയ വിവരങ്ങളും, ബിസിനസ്സ് സംരംഭകർക്കായി നിക്ഷേപ ശേഷി, വിദ്യാഭ്യാസ യോഗ്യത തുടങ്ങിയവയുമാണ് ടൂൾ ചോദിക്കുന്നത്.
ഇതൊരു മാർഗ്ഗനിർദ്ദേശ ടൂൾ മാത്രമാണെന്നും, ഇത് ഉപയോഗിക്കുന്നതുകൊണ്ട് മാത്രം കുടിയേറ്റം ഉറപ്പുനൽകുന്നില്ലെന്നും സർക്കാർ വ്യക്തമാക്കിയിട്ടുണ്ട്. ഇ.ഒ.ഐ (EOI) സമർപ്പിക്കുന്നതിന് വർക്കർ സ്ട്രീമിന് 135 ഡോളറും, എന്റർപ്രണർ സ്ട്രീമിന് 200 ഡോളറുമാണ് നിലവിലെ ഫീസ്. ഫാം സ്ട്രീമിന് 3,500 ഡോളർ ഫീസ് നൽകി നേരിട്ട് അപേക്ഷിക്കാവുന്നതാണ്.
AAIP-യിൽ ജോലി ചെയ്യുന്നവർക്കായി ആൽബർട്ട ഓപ്പർച്യുണിറ്റി സ്ട്രീം, ആൽബർട്ട എക്സ്പ്രസ് എൻട്രി സ്ട്രീം, റൂറൽ റിന്യൂവൽ സ്ട്രീം, ടൂറിസം ആൻഡ് ഹോസ്പിറ്റാലിറ്റി സ്ട്രീം എന്നിങ്ങനെ നാല് വിഭാഗങ്ങളുണ്ട്. സംരംഭകർക്കായി റൂറൽ എന്റർപ്രണർ സ്ട്രീം, ഗ്രാജ്വേറ്റ് എന്റർപ്രണർ സ്ട്രീം, ഫാം സ്ട്രീം, ഫോറിൻ ഗ്രാജ്വേറ്റ് എന്റർപ്രണർ സ്ട്രീം എന്നിങ്ങനെ നാല് വിഭാഗങ്ങളും നിലവിലുണ്ട്. കൂടുതൽ വിവരങ്ങൾക്കും യോഗ്യത പരിശോധിക്കുന്നതിനും ഔദ്യോഗിക AAIP വെബ്സൈറ്റ് സന്ദർശിക്കാവുന്നതാണ്.
Alberta launches new online tool to help foreign nationals assess AAIP eligibility
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
