ന്യൂഡൽഹി: വിദേശത്ത് നിന്ന് ഇന്ത്യയിലേക്ക് യാത്ര ചെയ്യുന്ന എല്ലാ അന്താരാഷ്ട്ര യാത്രക്കാർക്കും പുതിയ ‘എയർ സുവിധ 2.0’ (Air Suvidha 2.0) പോർട്ടൽ വഴി ഹെൽത്ത് സെൽഫ് ഡിക്ലറേഷൻ ഫോം പൂരിപ്പിക്കുന്നത് കേന്ദ്ര സർക്കാർ നിർബന്ധമാക്കി. എബോള വൈറസ് വ്യാപനത്തിന്റെ പശ്ചാത്തലത്തിൽ യാത്രക്കാരുടെ സുരക്ഷ ഉറപ്പാക്കുന്നതിനും രാജ്യത്തെ പ്രവേശന കവാടങ്ങളിൽ ആരോഗ്യ പരിശോധനകൾ കൂടുതൽ കാര്യക്ഷമമാക്കുന്നതിനുമായാണ് ഈ ഡിജിറ്റൽ സംവിധാനം ഏർപ്പെടുത്തിയിരിക്കുന്നത്.
ഈ പുതിയ സംവിധാനത്തിലൂടെ വിമാനത്താവളത്തിലെത്തുന്ന യാത്രക്കാരുടെ ആരോഗ്യവിവരങ്ങൾ അധികൃതർക്ക് മുൻകൂട്ടി അറിയാൻ സാധിക്കും. ഇത് രോഗബാധ സംശയിക്കുന്നവരെ വേഗത്തിൽ തിരിച്ചറിയാനും അവർക്ക് അടിയന്തര സഹായം ലഭ്യമാക്കാനും സഹായിക്കും. വിമാനത്തിൽ കയറുന്നതിന് 24 മണിക്കൂർ മുൻപായി യാത്രക്കാർ എയർ സുവിധ 2.0 പോർട്ടൽ വഴി സെൽഫ് ഡിക്ലറേഷൻ ഫോം നിർബന്ധമായും പൂരിപ്പിച്ചിരിക്കണം. യാത്രക്കാർ തങ്ങളുടെ കഴിഞ്ഞ 21 ദിവസത്തെ യാത്രാ വിവരങ്ങളും വൈറസ് ബാധയുമായി ബന്ധപ്പെട്ട ലക്ഷണങ്ങൾ ഉണ്ടോ എന്ന കാര്യവും ഇതിൽ വ്യക്തമാക്കണം.
പൂർണ്ണമായും പേപ്പർ രഹിതവും സമ്പർക്കമില്ലാത്തതുമായ രീതിയിലാണ് ഈ സംവിധാനം പ്രവർത്തിക്കുന്നത്. ഫോം പൂരിപ്പിച്ച ശേഷം ലഭിക്കുന്ന ഡിജിറ്റൽ രേഖ വിമാനത്താവളത്തിലെത്തിയ ശേഷം ഇമിഗ്രേഷൻ കൗണ്ടറിലോ ഹെൽത്ത് ഡെസ്കിലോ കാണിച്ചാൽ മതിയാകും. വിദേശത്ത് നിന്ന് ഇന്ത്യയിലേക്ക് വരുന്നവർ യാത്ര പ്ലാൻ ചെയ്യുമ്പോൾ തന്നെ ഈ പുതിയ നിയമം കൃത്യമായി പാലിക്കാൻ ശ്രദ്ധിക്കണമെന്ന് അധികൃതർ മുന്നറിയിപ്പ് നൽകുന്നു. കൂടുതൽ വിവരങ്ങൾക്കായി എയർ സുവിധയുടെ ഔദ്യോഗിക വെബ്സൈറ്റ് സന്ദർശിക്കാവുന്നതാണ്.
Air Suvidha 2.0 Is Now Mandatory For All International Passengers
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
