എയർ കാനഡ വിമാനക്കമ്പനിയിലെ ഫ്ലൈറ്റ് അറ്റൻഡൻ്റ്സ് യൂണിയൻ ഇന്ന് മുതൽ സമരം ആരംഭിക്കാൻ സാധ്യതയുണ്ട്. ഇത് യാത്രക്കാരെ കാര്യമായി ബാധിക്കാൻ ഇടയുണ്ട്.
ഒരു വർഷത്തെ കരീബിയൻ യാത്രയ്ക്ക് തയ്യാറെടുക്കുന്നതിനിടെ എയർ കാനഡ ജീവനക്കാരുടെ സമര ഭീഷണി കാരണം വലിയ സാമ്പത്തിക പ്രതിസന്ധിയിലാകുമോ എന്ന് ഭയക്കുകയാണ് ഒരു കനേഡിയൻ ദമ്പതികൾ. വീടും വാഹനങ്ങളും വിറ്റ് 320,000 ഡോളറിന്റെ കറ്റാമരനിൽ ഗ്രാനഡയിലേക്ക് പോകാനിരുന്ന ഇവർക്ക് സമരം കാരണം യാത്ര മുടങ്ങുമോ എന്ന ആശങ്കയിലാണ്.
ടിക്കറ്റുകൾ റീഫണ്ട് ചെയ്യാവുന്നതാണെങ്കിലും, എയർ കാനഡയുടെ റീബുക്കിംഗ് സൈറ്റ് ഉപയോഗിക്കുന്നതിൽ അവർക്ക് ബുദ്ധിമുട്ടുകളുണ്ട്. കസ്റ്റമർ കെയർ നമ്പറിൽ വിളിച്ചാൽ ദീർഘനേരം കാത്തിരിക്കേണ്ട അവസ്ഥയാണ്. അവസാന നിമിഷത്തിൽ അഞ്ചുപേർക്കും അവരുടെ വളർത്തു നായ്ക്കും ടിക്കറ്റ് എടുക്കുന്നത് വലിയ സാമ്പത്തിക ബാധ്യതയാകും. യാത്രാ ഇൻഷുറൻസ് എടുത്തിട്ടുണ്ടെങ്കിലും, സമരത്തെക്കുറിച്ച് അറിയാതിരുന്നതിനാൽ ഇത് ക്ലെയിം ചെയ്യാൻ കഴിയുമോ എന്ന കാര്യത്തിൽ അവർക്ക് ഉറപ്പില്ല.
എയർ കാനഡയും ഫ്ലൈറ്റ് അറ്റൻഡൻ്റ്സ് യൂണിയനും തമ്മിൽ ശനിയാഴ്ചയ്ക്ക് മുൻപ് ഒരു ഒത്തുതീർപ്പിൽ എത്തിയില്ലെങ്കിൽ നിരവധി യാത്രക്കാരാണ് പ്രതിസന്ധിയിലാകുക. ഇതിനോടകം തന്നെ എയർ കാനഡ വ്യാഴാഴ്ച മുതൽ വിമാനങ്ങൾ റദ്ദാക്കാൻ തുടങ്ങിയിട്ടുണ്ട്. വെള്ളിയാഴ്ച ഉച്ചവരെ 294 വിമാനങ്ങൾ റദ്ദാക്കിയതിലൂടെ 55,726 യാത്രക്കാർക്കാണ് ബുദ്ധിമുട്ടുണ്ടായത്.
യാത്രാ ചിലവുകളെക്കുറിച്ച് യാത്രക്കാർ ആശങ്കപ്പെടുമ്പോൾ, വിദഗ്ധർ ചില ഉപദേശങ്ങൾ നൽകുന്നു.
കാനഡയുടെ എയർ പാസഞ്ചർ പ്രൊട്ടക്ഷൻ റെഗുലേഷൻസ് അനുസരിച്ച്, എയർ കാനഡ റീഫണ്ടോ സൗജന്യമായി മറ്റൊരു ഫ്ലൈറ്റോ വാഗ്ദാനം ചെയ്യാൻ ബാധ്യസ്ഥരാണ്. എന്നാൽ വിമാന ടിക്കറ്റിന് പുറമെ ഹോട്ടൽ, ടൂർ, ക്രൂയിസ് തുടങ്ങിയ മറ്റ് പല യാത്രാ ചിലവുകളും യാത്രക്കാർക്ക് ഉണ്ടാകാം.
ട്രാവൽ സെക്യൂർ ട്രാവൽ ഇൻഷുറൻസ് ബ്രോക്കറേജിലെ പ്രസിഡൻ്റ് മാർട്ടിൻ ഫയർസ്റ്റോൺ പറയുന്നത്, ട്രിപ്പ് കാൻസലേഷൻ, ഇൻ്ററപ്ഷൻ ഇൻഷുറൻസ് എടുക്കാത്തവർക്ക് ഈ പണം നഷ്ടപ്പെടാൻ സാധ്യതയുണ്ടെന്നാണ്. ‘നിലവിൽ ഇൻഷുറൻസ് എടുക്കുന്നത് പ്രയോജനപ്പെടില്ല, കാരണം ഇൻഷുറൻസ് കമ്പനികൾ സമരത്തെ ‘അറിയപ്പെടുന്ന കാരണം’ (known cause) ആയി കണക്കാക്കും.’
പകരം, ഹോട്ടലുകൾ, ടൂറുകൾ തുടങ്ങിയവ റീഫണ്ട് ചെയ്യാൻ സാധ്യതയുണ്ടോ അല്ലെങ്കിൽ ഭാവിയിൽ ഉപയോഗിക്കാനായി ക്രെഡിറ്റ് ലഭിക്കുമോ എന്ന് അന്വേഷിക്കുക. പൂർണ്ണമായും റീഫണ്ട് ചെയ്യാവുന്ന ടിക്കറ്റുകൾ എടുക്കുന്നതും ഒരു ഓപ്ഷനാണ്, പക്ഷേ ഇതിന് കൂടുതൽ പണം നൽകേണ്ടിവരും. വിമാനം റദ്ദാക്കിയ യാത്രക്കാർ എത്രയും പെട്ടെന്ന് പുതിയ ഫ്ലൈറ്റുകൾക്കായി എയർ കാനഡയെ ബന്ധപ്പെടണം. നേരിട്ടുള്ള ഫ്ലൈറ്റുകൾക്ക് ആവശ്യക്കാർ കൂടുതലായിരിക്കാം എന്നതിനാൽ മറ്റ് കണക്ഷൻ ഫ്ലൈറ്റുകളും പരിഗണിക്കാവുന്നതാണ് എന്ന് ടൊറന്റോയിലെ ട്രാവൽ വിദഗ്ധനും മണി വി ഹാവ് എന്ന വെബ്സൈറ്റിന്റെ സ്ഥാപകനുമായ ബാരി ചോയ് നിർദ്ദേശിക്കുന്നു.
