ഇന്ത്യൻ കാഴ്ചകളുടെ ഇതിഹാസം ഇനി ഓർമ്മ; പ്രശസ്ത ഫോട്ടോ ജേണലിസ്റ്റ് രഘു റായ് അന്തരിച്ചു

ഇന്ത്യൻ ഫോട്ടോ ജേണലിസത്തിലെ സൂര്യതേജസ്സായിരുന്ന രഘു റായ് (83) അന്തരിച്ചു. വാർദ്ധക്യസഹജമായ അസുഖങ്ങളെത്തുടർന്ന് ചികിത്സയിലിരിക്കെ ഞായറാഴ്ച പുലർച്ചെ ദില്ലിയിലെ സ്വകാര്യ ആശുപത്രിയിലായിരുന്നു അന്ത്യം. അർബുദത്തോടുള്ള ദീർഘകാല പോരാട്ടത്തിനൊടുവിലാണ് അദ്ദേഹം വിടവാങ്ങിയതെന്ന് മകനും പ്രമുഖ ഫോട്ടോഗ്രാഫറുമായ നിതിൻ റായ് അറിയിച്ചു. ഭാരതത്തിന്റെ വൈവിധ്യമാർന്ന മുഖങ്ങളെയും നിർണ്ണായക ചരിത്ര നിമിഷങ്ങളെയും ക്യാമറയിൽ തളച്ചിട്ട അദ്ദേഹം, ലോകം കണ്ട ഏറ്റവും മികച്ച ദൃശ്യമാധ്യമ പ്രവർത്തകരിൽ ഒരാളായിരുന്നു.

രണ്ടു വർഷം മുമ്പ് പ്രോസ്റ്റേറ്റ് കാൻസർ സ്ഥിരീകരിച്ചെങ്കിലും അസാമാന്യമായ മനക്കരുത്തോടെ അദ്ദേഹം അതിനെ അതിജീവിച്ചിരുന്നു. പിന്നീട് കാൻസർ വയറിലേക്ക് പടരുകയും അതിൽ നിന്നും അദ്ദേഹം സുഖം പ്രാപിക്കുകയും ചെയ്തു. എന്നാൽ അടുത്തിടെ അർബുദം തലച്ചോറിനെ ബാധിച്ചതും പ്രായത്തിന്റേതായ അവശതകളും അദ്ദേഹത്തിന്റെ ആരോഗ്യനില വഷളാക്കി. മകൻ നിതിൻ റായിയെ ഉദ്ധരിച്ച് വാർത്താ ഏജൻസിയായ പി.ടി.ഐ ആണ് ഇക്കാര്യം റിപ്പോർട്ട് ചെയ്തത്. ഞായറാഴ്ച വൈകുന്നേരം നാലു മണിക്ക് ദില്ലിയിലെ ലോധി ശ്മശാനത്തിലാണ് അന്ത്യകർമ്മങ്ങൾ നിശ്ചയിച്ചിരിക്കുന്നത്.

1965-ൽ ഫോട്ടോഗ്രഫിയിൽ ചുവടുവെച്ച രഘു റായ്, 1966-ൽ ‘ദി സ്റ്റേറ്റ്‌സ്മാൻ’ പത്രത്തിൽ ചീഫ് ഫോട്ടോഗ്രാഫറായി ചേർന്നു. ഒരു പതിറ്റാണ്ടോളം അവിടെ തുടർന്ന അദ്ദേഹം ഇന്ത്യൻ മാധ്യമരംഗത്തെ മുൻനിര ഫോട്ടോഗ്രാഫറായി വളർന്നു. 1971-ൽ പാരീസിൽ വെച്ച് അദ്ദേഹത്തിന്റെ ചിത്രങ്ങൾ കണ്ട പ്രശസ്ത ഫോട്ടോഗ്രാഫർ ഹെൻറി കാർട്ടിയർ ബ്രെസ്സൺ, ലോകത്തെ ഏറ്റവും വലിയ ഫോട്ടോഗ്രാഫർമാരുടെ കൂട്ടായ്മയായ ‘മാഗ്നം ഫോട്ടോസിലേക്ക്’ അദ്ദേഹത്തെ നാമനിർദ്ദേശം ചെയ്തു. ഇതോടെ അന്താരാഷ്ട്ര തലത്തിൽ ശ്രദ്ധിക്കപ്പെട്ട അദ്ദേഹം ലോകപ്രശസ്ത പ്രസിദ്ധീകരണങ്ങളുടെ ഭാഗമായി മാറി.

1982-ൽ ഇന്ത്യാ ടുഡേ മാഗസിനിൽ പിക്ചർ എഡിറ്ററായി ചുമതലയേറ്റതോടെയാണ് അദ്ദേഹത്തിന്റെ കരിയറിലെ ഏറ്റവും ശ്രദ്ധേയമായ കാലഘട്ടം ആരംഭിക്കുന്നത്. 1991 വരെ നീണ്ട ഈ കാലയളവിൽ രാഷ്ട്രീയവും സാമൂഹികവുമായ വിഷയങ്ങളിൽ അദ്ദേഹം തയ്യാറാക്കിയ ഫോട്ടോ ഉപന്യാസങ്ങൾ ഇന്ത്യൻ മാധ്യമ ലോകത്ത് വിപ്ലവകരമായ മാറ്റങ്ങൾ സൃഷ്ടിച്ചു. ഭോപ്പാൽ ദുരന്തം മുതൽ മദർ തെരേസയുടെ ജീവിതം വരെ തന്റെ ക്യാമറയിൽ പകർത്തിയ അദ്ദേഹം, ഇന്ത്യൻ കാഴ്ചകളെ ലോകത്തിന് മുന്നിൽ എത്തിച്ച അക്ഷരാർത്ഥത്തിലെ ഇതിഹാസമായിരുന്നു. ഭാര്യ ഗുർമീത് റായിയും അഞ്ച് മക്കളുമടങ്ങുന്നതാണ് അദ്ദേഹത്തിന്റെ കുടുംബം.

A legend of Indian views is now remembered; Famous photojournalist Raghu Rai passes away

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt