ബെംഗളൂരു: സ്വന്തം പരിശ്രമത്തിലൂടെ ജീവിതം വിജയിപ്പിച്ചെടുക്കാമെന്ന് തെളിയിച്ചിരിക്കുകയാണ് ബെംഗളൂരുവിൽ താമസിക്കുന്ന അർപ്പിത റാവു. 26 ലക്ഷം രൂപയിൽ തുടങ്ങി പലിശയും മറ്റ് ബാധ്യതകളും ചേർത്ത് 43 ലക്ഷം രൂപയായി വളർന്ന വിദ്യാഭ്യാസ വായ്പയാണ് ഇവർ എട്ട് വർഷത്തെ കഠിനാധ്വാനത്തിനൊടുവിൽ പൂർണ്ണമായി അടച്ചുതീർത്തത്.
ബാങ്കിലെത്തി വായ്പയുടെ അവസാന ഗഡുവും അടച്ച അർപ്പിത, ഈ ചരിത്ര നിമിഷം സാക്ഷിയാക്കാൻ തന്റെ മൂന്നര വയസ്സുള്ള മകനെയും കൂടെക്കൂട്ടി. കഠിനാധ്വാനത്തിലൂടെയും ഉത്തരവാദിത്ത ബോധത്തിലൂടെയും മാത്രമേ ജീവിതത്തിൽ സ്വന്തം കാലിൽ നിൽക്കാൻ കഴിയൂ എന്ന നല്ലൊരു പാഠം കുഞ്ഞുനാൾ മുതലേ മകന് പകർന്നു നൽകാനാണ് താൻ അങ്ങനെ ചെയ്തതെന്ന് അവർ വ്യക്തമാക്കി.
18-ാം വയസ്സിൽ പിതാവിന്റെ സാമ്പത്തിക സഹായം നിലച്ചതോടെ അർപ്പിതയുടെ ജീവിതം കഠിനമായി. കോളേജിൽ പഠിക്കുമ്പോൾ സഹോദരി നൽകിയ ചെറിയ തുകയായിരുന്നു ആശ്വാസം. 22-ാം വയസ്സിൽ ജോലിക്ക് കയറിയതു മുതൽ സ്വന്തം കാര്യങ്ങളും കുടുംബത്തിന്റെ ചുമതലകളും ഇവർ ഒറ്റയ്ക്ക് ഏറ്റെടുത്തു. സഹപാഠികൾ വളരെ പെട്ടെന്ന് വായ്പ തിരിച്ചടച്ചു തീർത്തപ്പോൾ, കുടുംബം നോക്കിക്കൊണ്ട് ഈ വലിയ കടം വീട്ടാൻ അർപ്പിതയ്ക്ക് എട്ട് വർഷം വേണ്ടിവന്നു.
ALSO READ: 8 ഡോളറുമായി കാനഡയിലെത്തിയ ഇന്ത്യക്കാരൻ; സെയിൽസ്മാനിൽ നിന്ന് ഐഡിബിഐ ബാങ്കിന്റെ അമരക്കാരനിലേക്ക്
സാമൂഹിക രംഗത്തെ വിവിധ സ്ഥാപനങ്ങളിൽ ജോലി ചെയ്ത ഇവർ, ഇതിനിടയിൽ സ്വന്തമായി ഒരു സംരംഭം തുടങ്ങാൻ ശ്രമിച്ചെങ്കിലും പരാജയപ്പെട്ടു. തുടർന്ന് അമ്മയായ സമയത്ത് ഒരു വർഷത്തോളം വരുമാനമില്ലാതെ ബുദ്ധിമുട്ടി. ജോലി ചെയ്തിരുന്ന സ്ഥാപനത്തിൽ നിന്ന് പ്രസവാനുകൂല്യങ്ങൾ പോലും ലഭിച്ചില്ല. ഇത്രയൊക്കെ പ്രതിസന്ധികൾ ഉണ്ടായെങ്കിലും തളരാതെ കഠിനാധ്വാനം ചെയ്താണ് അർപ്പിത ഈ നേട്ടം സ്വന്തമാക്കിയത്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/GIh0npbq3d1GgGCL00k37z
