കാനഡയിൽ ഏർലി ചൈൽഡ്ഹുഡ് എഡ്യൂക്കേറ്റർമാർക്ക് ആശ്വാസം: വർക്ക് പെർമിറ്റ് നിയന്ത്രണങ്ങളിൽ ഇളവ്

ഓട്ടവ: കാനഡയിൽ താൽക്കാലിക വിദേശ തൊഴിലാളി പദ്ധതി (TFWP) വഴി ജോലി നോക്കുന്നവർക്ക് ആശ്വാസകരമായ പ്രഖ്യാപനമാണ് കഴിഞ്ഞ ദിവസമുണ്ടായത്. ഉയർന്ന തൊഴില്ലായ്മ നിരക്കുള്ള പ്രദേശങ്ങളിലും ഏർലി ചൈൽഡ്ഹുഡ് എഡ്യൂക്കേറ്റർമാർക്ക് (ECE) കുറഞ്ഞ വേതന അടിസ്ഥാനത്തിലുള്ള വർക്ക് പെർമിറ്റുകൾ നൽകുന്നതിനുള്ള നിരോധനത്തിൽ നിന്ന് ഇളവ് അനുവദിച്ചു. 2026 നവംബർ 6 മുതൽ ഈ തീരുമാനം പ്രാബല്യത്തിൽ വന്നു.

തൊഴിലുടമകൾക്ക് ഇനി LMIA അപേക്ഷിക്കാം

എംപ്ലോയ്മെന്റ് ആൻഡ് സോഷ്യൽ ഡെവലപ്മെന്റ് കാനഡ (ESDC) പുറപ്പെടുവിച്ച വാർത്താക്കുറിപ്പ് പ്രകാരം, തങ്ങളുടെ പ്രദേശത്തെ തൊഴില്ലായ്മ നിരക്ക് എത്രയാണെങ്കിലും തൊഴിലുടമകൾക്ക് ഇനി കുറഞ്ഞ വേതന നിരക്കിൽ ഏർലി ചൈൽഡ്ഹുഡ് എഡ്യൂക്കേറ്റർമാരെ നിയമിക്കുന്നതിനായി ലേബർ മാർക്കറ്റ് ഇംപാക്ട് അസസ്മെന്റിന് (LMIA) അപേക്ഷിക്കാം. മുൻപ്, 6 ശതമാനമോ അതിൽ കൂടുതലോ തൊഴില്ലായ്മയുള്ള സെൻസസ് മെട്രോപൊളിറ്റൻ ഏരിയകളിൽ (CMA) കുറഞ്ഞ വേതന വിഭാഗത്തിലുള്ള TFWP പെർമിറ്റുകൾക്ക് നിരോധനം നിലനിന്നിരുന്നു.

ഒരു പ്രദേശത്തെ ശരാശരി വേതനത്തിന്റെ 120 ശതമാനത്തിൽ താഴെ ശമ്പളമുള്ള തസ്തികകളെയാണ് കുറഞ്ഞ വേതന പെർമിറ്റുകളായി തരംതിരിച്ചിരിക്കുന്നത്. നിലവിൽ ടൊറന്റോ, മോൺട്രിയൽ, വൻകൂവർ, കാൽഗറി, എഡ്മിന്റൻ, ഹാലിഫാക്സ്, ഫ്രെഡറിക്റ്റൺ, ഓട്ടവ-ഗാറ്റിനോ എന്നിവയുൾപ്പെടെ 30 പ്രധാന നഗരങ്ങളിൽ 2027 ജനുവരി 7 വരെ ഈ നിരോധനം തുടരുന്നുണ്ട്. എന്നാൽ പുതിയ ഇളവോടെ ECE മേഖലയിലുള്ളവർക്ക് ഇത് ബാധകമാകില്ല.

മറ്റ് പ്രമുഖ മേഖലകൾക്കൊപ്പം എഡ്യൂക്കേറ്റർമാരും

കൃഷി, നിർമ്മാണം, ഭക്ഷ്യ സംസ്കരണം, ആശുപത്രികൾ, നഴ്സിംഗ് സാന്ത്വന കേന്ദ്രങ്ങൾ, ഗാർഹിക പരിചരണം എന്നീ മേഖലകൾക്ക് നേരത്തെ തന്നെ ഈ ഇളവുകൾ ലഭ്യമായിരുന്നു. ഈ നിരയിലേക്കാണ് ഇപ്പോൾ ഏർലി ചൈൽഡ്ഹുഡ് എഡ്യൂക്കേഷൻ മേഖലയെയും ഉൾപ്പെടുത്തിയിരിക്കുന്നത്. ഒരു കനേഡിയൻ പൗരനെയോ സ്ഥിരതാമസക്കാരനെയോ ആ തസ്തികയിലേക്ക് ലഭ്യമായിട്ടില്ലെന്ന് തെളിയിക്കാൻ തൊഴിലുടമ സ്വന്തമാക്കേണ്ട രേഖയാണ് LMIA. വിദേശ തൊഴിലാളികൾക്ക് പുതിയ വർക്ക് പെർമിറ്റിനായി അപേക്ഷിക്കാനോ നിലവിലുള്ളത് നീട്ടാനോ പോസിറ്റീവ് ആയ LMIA ആവശ്യമാണ്.

Also Read: എക്സ്പ്രസ് എൻട്രിയിൽ നിർണ്ണായക മാറ്റം: LMIA ഒഴിവാക്കി; പകരം പുതിയ സംവിധാനം

കൂടാതെ, 2026 ഒക്ടോബർ 28-ന് കൈക്കൊണ്ട മറ്റൊരു പ്രധാന തീരുമാനത്തിലൂടെ, കാലാവധി തീരാറായ വർക്ക് പെർമിറ്റുകളുള്ള കാനഡയിലുള്ള തൊഴിലാളികൾ LMIA-ക്കൊപ്പം സമർപ്പിക്കുന്ന അപേക്ഷകൾക്കുണ്ടായിരുന്ന 90 ദിവസത്തെ സമയപരിധിയും ഫെഡറൽ സർക്കാർ നീക്കം ചെയ്തിട്ടുണ്ട്. കാനഡയിൽ കുട്ടികളുടെ പരിപാലന മേഖലയിൽ ജോലി ആഗ്രഹിക്കുന്ന മലയാളികൾ ഉൾപ്പെടെയുള്ള വിദേശ ഉദ്യോഗാർത്ഥികൾക്ക് ഈ തീരുമാനം വലിയ അവസരങ്ങൾ തുറന്നുനൽകും.