ടൊറന്റോ: ഈ വർഷം ഇതുവരെ 4,500-ലധികം ഇന്ത്യൻ പൗരന്മാരെ കാനഡയിൽ നിന്ന് തിരികെ അയച്ചതായി കാനഡ ബോർഡർ സർവീസസ് ഏജൻസി (സി.ബി.എസ്.എ) പുറത്തുവിട്ട ഏറ്റവും പുതിയ കണക്കുകൾ വ്യക്തമാക്കുന്നു. സെപ്റ്റംബർ 30 വരെയുള്ള കണക്കനുസരിച്ച് 4,526 ഇന്ത്യക്കാരാണ് കാനഡയിൽ നിന്ന് പുറത്താക്കപ്പെട്ടത്. ഈ വർഷം കാനഡ നടപ്പാക്കിയ ആകെ 16,426 നാടുകടത്തലുകളിൽ 27 ശതമാനത്തിലധികവും ഇന്ത്യൻ പൗരന്മാരാണ് എന്നത് വലിയ ശ്രദ്ധ നേടുന്നു.
2020-ന് ശേഷം ആദ്യമായാണ് രാജ്യത്ത് നിന്ന് പുറത്താക്കപ്പെടുന്ന വിദേശികളുടെ പട്ടികയിൽ ഇന്ത്യക്കാർ ഒന്നാമതെത്തുന്നത്. 2020-ൽ 1,424 ഇന്ത്യക്കാരായിരുന്നു നാടുകടത്തപ്പെട്ടതെങ്കിൽ, പിന്നീടുള്ള വർഷങ്ങളിൽ മെക്സിക്കൻ പൗരന്മാരായിരുന്നു ഈ പട്ടികയിൽ മുന്നിലുണ്ടായിരുന്നത്. എന്നാൽ കഴിഞ്ഞ വർഷത്തെ (2025) റെക്കോർഡായ 3,779 എന്ന സംഖ്യയും മറികടന്നാണ് ഇത്തവണ ഇന്ത്യക്കാരുടെ എണ്ണം ഉയർന്നത്. നിലവിൽ കാനഡയുടെ നാടുകടത്തൽ നടപടികൾ പുരോഗമിക്കുന്നവരുടെ പട്ടികയിലും ഇന്ത്യക്കാരാണ് മുന്നിൽനിൽക്കുന്നത്. ആകെ 52,457 പേരുടെ പട്ടികയിൽ 11,393 പേരും ഇന്ത്യൻ പൗരന്മാരാണ്.
ALSO READ: കാനഡയിലെ ‘നൈറ്റ്‌ലൈഫ്’ നഗരങ്ങളിൽ ഒന്നാമത് ലണ്ടൻ തന്നെ ; ഊബർ സർവേ റിപ്പോർട്ട് പുറത്ത്
പ്രധാനമായും മൂന്ന് തരം ഉത്തരവുകളിലൂടെയാണ് സി.ബി.എസ്.എ വിദേശികളെ രാജ്യത്ത് നിന്ന് പുറത്താക്കുന്നത്. ആദ്യത്തേതായ ഡിപ്പോർട്ടേഷൻ ഓർഡർ ലഭിക്കുന്ന വ്യക്തിക്ക് പ്രത്യേക അനുമതിയില്ലാതെ കാനഡയിലേക്ക് തിരിച്ചുവരുന്നതിന് സ്ഥിരമായ വിലക്കുണ്ടാകും. രണ്ടാമത്തേതായ എക്സ്ക്ലൂഷൻ ഓർഡർ പ്രകാരം ഒരു വർഷത്തേക്ക് രാജ്യത്തേക്ക് പ്രവേശിക്കാൻ സാധിക്കില്ല. എന്നാൽ വ്യാജരേഖയോ തെറ്റായ വിവരങ്ങളോ നൽകിയതിനാണ് ഈ ഉത്തരവെങ്കിൽ അഞ്ച് വർഷത്തേക്ക് വിലക്ക് നേരിടേണ്ടി വരും. മൂന്നാമത്തെ വിഭാഗമായ ഡിപാർച്ചർ ഓർഡർ ലഭിക്കുന്നവർ 30 ദിവസത്തിനുള്ളിൽ സ്വമേധയാ രാജ്യം വിടണം. ഇതിൽ പരാജയപ്പെട്ടാൽ അത് പിന്നീട് ഡിപ്പോർട്ടേഷൻ ഓർഡറായി മാറുന്നതാണ്.
കാനഡയുടെ കുടിയേറ്റ നിയമങ്ങളുടെ സമഗ്രതയും സുതാര്യതയും ഉറപ്പാക്കുന്നതിനും, നിയമപരമായി രാജ്യത്തെത്തുന്നവരുടെ അവകാശങ്ങൾ സംരക്ഷിക്കുന്നതിനുമാണ് അനധികൃതമായി താമസിക്കുന്നവരെ പുറത്താക്കുന്നതെന്ന് സി.ബി.എസ്.എ അധികൃതർ അറിയിച്ചു. വരും ദിവസങ്ങളിലും പരിശോധനകൾ ശക്തമായി തുടരുമെന്നാണ് റിപ്പോർട്ടുകൾ സൂചിപ്പിക്കുന്നത്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/GIh0npbq3d1GgGCL00k37z
