ഓട്ടവ: രാജ്യത്തെ സ്കിൽഡ് ട്രേഡ്സ് മേഖലയിലെ തൊഴിലാളികൾക്കും അപ്രന്റീസുകൾക്കുമായി കനേഡിയൻ ഗവൺമെന്റ് പ്രഖ്യാപിച്ച 5,000 ഡോളർ റെഡ് സീൽ കോംപ്ലിഷൻ ബോണസിന് അപേക്ഷിക്കാനുള്ള പോർട്ടൽ 2026 നവംബർ 16-ന് ആരംഭിക്കും. എംപ്ലോയ്മെന്റ് ആൻഡ് സോഷ്യൽ ഡെവലപ്മെന്റ് കാനഡയാണ് ഈ തീയതി ഔദ്യോഗികമായി സ്ഥിരീകരിച്ചത്. മുൻപുണ്ടായിരുന്ന 2,000 ഡോളർ അപ്രന്റീസ്ഷിപ്പ് കോംപ്ലിഷൻ ഗ്രാന്റിന് പകരമായാണ് കൂടുതൽ തുകയുടെ ഈ പുതിയ പദ്ധതി നടപ്പിലാക്കുന്നത്.
രാജ്യത്തെ നിർമ്മാണം, ഇൻഫ്രാസ്ട്രക്ചർ, പ്രതിരോധ പദ്ധതികൾ എന്നിവയിലുള്ള കടുത്ത തൊഴിലാളിക്ഷാമം പരിഹരിക്കുന്നതിനായി അവതരിപ്പിച്ച 8 ബില്യൺ ഡോളറിന്റെ ‘ടീം കാനഡ സ്ട്രോംഗ്’ സംരംഭത്തിന്റെ ഭാഗമായാണ് ഈ സാമ്പത്തിക സഹായം നൽകുന്നത്. അടുത്ത അഞ്ച് വർഷത്തിനുള്ളിൽ 80,000 മുതൽ 1,00,000 വരെ പുതിയ വിദഗ്ദ്ധ തൊഴിലാളികളെ റിക്രൂട്ട് ചെയ്യാനും പരിശീലനം നൽകാനും ഇതിലൂടെ ലക്ഷ്യമിടുന്നു.
അപേക്ഷകർ കനേഡിയൻ പൗരന്മാരോ പെർമനന്റ് റെസിഡന്റുമാരോ അല്ലെങ്കിൽ പ്രൊട്ടക്റ്റഡ് പേഴ്സൺസോ ആയിരിക്കണം. കൂടാതെ, നിലവിൽ ഹൈസ്കൂൾ വിദ്യാർത്ഥികളല്ലാത്തവരും അംഗീകൃത റെഡ് സീൽ ട്രേഡിൽ അപ്രന്റീസ്ഷിപ്പ് പൂർത്തിയാക്കി 2025 ഏപ്രിൽ 1-നോ അതിനു ശേഷമോ ജേർണിപേഴ്സൺ സർട്ടിഫിക്കേഷൻ നേടിയവരുമായിരിക്കണം. അപ്രന്റീസ്ഷിപ്പ് പൂർത്തിയാക്കാതെ പരീക്ഷ എഴുതി മാത്രം യോഗ്യത നേടിയവർക്കും (Challenge pathway), താൽക്കാലിക വിസയിലുള്ളവർക്കും ഈ പദ്ധതിയിൽ യോഗ്യതയുണ്ടായിരിക്കില്ല. ഒരാൾ ഒന്നിലധികം റെഡ് സീൽ ട്രേഡുകളിൽ യോഗ്യത നേടിയാൽ പരമാവധി 50,000 ഡോളർ വരെ ബോണസായി ലഭിക്കും.
ALSO READ: കാനഡയിൽ എക്സ്പ്രസ് എൻട്രി മാറുമ്പോൾ എന്തൊക്കെ ശ്രദ്ധിക്കണം; മുന്നറിയിപ്പുമായി ഇമിഗ്രേഷൻ വിദഗ്ധർ
2025 ഏപ്രിൽ 1 നും 2026 നവംബർ 15 നും ഇടയിൽ സർട്ടിഫിക്കറ്റ് ലഭിച്ചവർക്ക് 2027 മെയ് 31 വരെ അപേക്ഷിക്കാം. എന്നാൽ 2026 നവംബർ 16-ന് ശേഷമാണ് സർട്ടിഫിക്കേഷൻ നേടുന്നതെങ്കിൽ യോഗ്യത നേടിയ തീയതി മുതൽ 12 മാസത്തിനുള്ളിൽ അപേക്ഷ സമർപ്പിക്കേണ്ടതുണ്ട്. അപേക്ഷ പ്രക്രിയ ആരംഭിച്ചാൽ 28 ദിവസത്തിനുള്ളിൽ സോഷ്യൽ ഇൻഷുറൻസ് നമ്പർ, അപ്രന്റീസ് ഐഡി, സർട്ടിഫിക്കറ്റ് വിവരങ്ങൾ, ഡയറക്ട് ഡിപ്പോസിറ്റിനായുള്ള ബാങ്ക് അക്കൗണ്ട് വിവരങ്ങൾ എന്നിവ ഉൾപ്പെടെയുള്ള ആവശ്യമായ രേഖകൾ സമർപ്പിക്കണം. ലഭിക്കുന്ന 5,000 ഡോളർ ബോണസ് ഇൻകം ടാക്സിന് വിധേയമായിരിക്കും എന്ന കാര്യവും അപേക്ഷകർ ഓർക്കേണ്ടതുണ്ട്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/GIh0npbq3d1GgGCL00k37z
