വാഷിംഗ്ടൺ: പ്രമുഖ എ.ഐ (AI) മോഡലുകൾ പ്രവർത്തിക്കുന്ന ഹാർഡ്‌വെയർ സംവിധാനങ്ങളിൽ ഹാക്കിംഗ് നടത്താൻ കഴിയുമെന്നും ഇത് ചാറ്റ്‌ബോട്ടുകൾ തെറ്റായതും അപകടകരവുമായ മറുപടികൾ നൽകുന്നതിന് കാരണമാകുമെന്നും പുതിയ ഗവേഷണ റിപ്പോർട്ട്. യു.എസ് ആസ്ഥാനമായി പ്രവർത്തിക്കുന്ന പ്രമുഖ സൈബർ സെക്യൂരിറ്റി സ്ഥാപനമായ ‘എക്ലിപ്സിയം’ ആണ് നിർണായക കണ്ടെത്തലുകൾ അടങ്ങിയ റിപ്പോർട്ട് പുറത്തുവിട്ടത്. എ.ഐ വികസിപ്പിക്കുന്ന കമ്പനികളുടെ നയങ്ങൾക്കൊപ്പം തന്നെ അവ പ്രവർത്തിക്കുന്ന ഹാർഡ്‌വെയറുകളുടെ സുരക്ഷയും വലിയ ഭീഷണിയിലാണെന്ന് ഗവേഷണം വ്യക്തമാക്കുന്നു.
ദേശീയ സുരക്ഷയെയും വ്യക്തിഗത ആരോഗ്യത്തെയും ബാധിക്കുന്ന സുപ്രധാന ചോദ്യങ്ങളിൽ എ.ഐ മോഡലുകളുടെ മറുപടി മാറ്റിയെഴുതാൻ ഗവേഷകർക്ക് കഴിഞ്ഞു. എ.ഐ മോഡലുകൾ വിവരങ്ങൾ വിശകലനം ചെയ്യാൻ ഉപയോഗിക്കുന്ന ‘വെയ്റ്റുകളിൽ’ (Weights) മാറ്റം വരുത്തി തായ്‌വാനിൽ ചൈന നടത്താൻ സാധ്യതയുള്ള അധിനിവേശത്തെക്കുറിച്ചുള്ള പ്രവചന നിരക്ക് വർധിപ്പിക്കാൻ ഹാക്കിംഗിലൂടെ സാധിച്ചു. മറ്റൊരു പരീക്ഷണത്തിൽ നെഞ്ചുവേദനയ്ക്ക് എ.ഐയോട് വൈദ്യസഹായം തേടിയ ഉപയോക്താവിനോട് ആശുപത്രിയിൽ പോകുന്നതിന് പകരം വീട്ടിൽ തന്നെ വിശ്രമിക്കാനാണ് ഹാർഡ്‌വെയറുകളിൽ വരുത്തിയ മാറ്റങ്ങളിലൂടെ എ.ഐ നിർദേശിച്ചത്.
പ്രമുഖ ചിപ്പ് നിർമാതാക്കളായ എൻവിഡിയയുടെ (Nvidia) കമ്പ്യൂട്ടിംഗ് പ്ലാറ്റ്‌ഫോമിലാണ് ഗവേഷകർ ഈ ഹാക്കിംഗ് പരീക്ഷണം നടത്തി തെളിയിച്ചത്. എന്നാൽ ഇത് എൻവിഡിയക്ക് മാത്രം ബാധകമായ പ്രശ്നമല്ലെന്നും മറ്റ് ഹാർഡ്‌വെയറുകളിലും സമാനമായ ആക്രമണങ്ങൾ സാധ്യമാണെന്നും എക്ലിപ്സിയം ചീഫ് എക്സിക്യൂട്ടീവ് യൂറി ബുളിഗിൻ വ്യക്തമാക്കി. ചൈന, റഷ്യ, യു.എസ് തുടങ്ങിയ വൻകിട രാജ്യങ്ങളിലെ ഹാക്കർമാർക്ക് എ.ഐ ഉപയോക്താക്കളെ ലക്ഷ്യമിട്ട് ഇത്തരത്തിലുള്ള ആക്രമണങ്ങൾ നടത്താൻ കഴിയുമെന്നാണ് റിപ്പോർട്ടിൽ പറയുന്നത്.
ഡാറ്റാ സെന്ററുകൾ നിയന്ത്രിക്കുന്ന ബി.എം.സി, ഡി.പി.യു എന്നിവ ഉൾപ്പെടുന്ന നെറ്റ്‌വർക്കിലേക്ക് പ്രവേശനം നേടുന്ന ഹാക്കർമാർക്ക് എ.ഐയുടെ മെമ്മറി ഡാറ്റ മിനിറ്റുകൾക്കകം തിരുത്താൻ സാധിക്കും. ഉപയോക്താക്കൾ ഇതറിയാതെ എ.ഐ നൽകുന്ന തെറ്റായ വിവരങ്ങൾ വിശ്വസിക്കാൻ സാധ്യതയേറെയാണ്. അതേസമയം, വാർത്തയോട് പ്രതികരിച്ച എൻവിഡിയ വക്താവ് ഇത്തരം ഭീഷണികളെക്കുറിച്ച് നേരത്തെ തന്നെ ബോധ്യമുണ്ടെന്നും ഉയർന്ന മെമ്മറി സുരക്ഷാ സംവിധാനങ്ങൾ വഴി ഇവ പ്രതിരോധിക്കാൻ സാധിക്കുമെന്നും അറിയിച്ചു.
എ.ഐ രംഗത്ത് മേധാവിത്വം ഉറപ്പിക്കാൻ യു.എസും ചൈനയും തമ്മിലുള്ള മത്സരം കടുക്കുന്നതിനിടയിലാണ് ഹാർഡ്‌വെയർ സുരക്ഷാ ഭീഷണികൾ പുറത്തുവരുന്നത്. സി.ഐ.എസ്.എ (CISA), എൻ.എസ്.എ (NSA) തുടങ്ങിയ പ്രമുഖ സുരക്ഷാ ഏജൻസികളെ എക്ലിപ്സിയം വിവരങ്ങൾ ധരിപ്പിച്ചിട്ടുണ്ട്. എ.ഐ മോഡലുകളുടെ സുരക്ഷയ്ക്ക് നൽകുന്ന അതേ പ്രാധാന്യം അവ പ്രവർത്തിക്കുന്ന കമ്പ്യൂട്ടറുകളുടെയും സർവറുകളുടെയും ഹാർഡ്‌വെയർ സുരക്ഷയ്ക്കും നൽകണമെന്നാണ് വിദഗ്ധരുടെ മുന്നറിയിപ്പ്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/GIh0npbq3d1GgGCL00k37z
