ഓട്ടവ: ഓഫീസ് സൗകര്യങ്ങളുടെ കുറവിനെത്തുടർന്ന് ഒട്ടാവ–ഗാറ്റിനോ മേഖലയിലെ സ്റ്റാറ്റിസ്റ്റിക്സ് കാനഡ ജീവനക്കാർക്ക് ആഴ്ചയിൽ നാലു ദിവസം ഓഫീസിലെത്തണമെന്ന നിർദേശം 2027 ജനുവരി വരെ നടപ്പാക്കില്ല. അതുവരെ ആഴ്ചയിൽ മൂന്നു ദിവസം ഓഫീസിലെത്തിയാൽ മതിയാകും. ആവശ്യമായ ഓഫീസ് സൗകര്യങ്ങൾ ഒരുക്കുന്നതിനായാണ് ഈ തീരുമാനം.
ജൂലൈ ആറു മുതൽ കേന്ദ്ര സർക്കാർ സർവീസിലെ ജീവനക്കാർ ആഴ്ചയിൽ കുറഞ്ഞത് നാലു ദിവസമെങ്കിലും ഓഫീസിൽ ഹാജരാകണമെന്നാണ് സർക്കാർ നിർദേശം. ഉന്നത ഉദ്യോഗസ്ഥർ ആഴ്ചയിൽ അഞ്ചു ദിവസവും ഓഫീസിലെത്തണം. എന്നാൽ, ഓഫീസ് സ്ഥലത്തിന്റെ കുറവിനെത്തുടർന്ന് ഈ നിർദേശം നടപ്പാക്കുന്നത് വൈകിപ്പിച്ച മൂന്ന് സർക്കാർ വകുപ്പുകളിൽ ഒന്നാണ് സ്റ്റാറ്റിസ്റ്റിക്സ് കാനഡ.
ജീവനക്കാരുടെ 80 ശതമാനം പേർക്ക് ഒരേസമയം ഓഫീസിൽ ജോലി ചെയ്യാനുള്ള സൗകര്യം ഉറപ്പാക്കാൻ കൂടുതൽ സമയം ആവശ്യമാണെന്ന് സ്റ്റാറ്റിസ്റ്റിക്സ് കാനഡ വക്താവ് പറഞ്ഞു.
ഇമിഗ്രേഷൻ, അഭയാർഥി, പൗരത്വ വകുപ്പും (ഐആർസിസി) വേനൽക്കാലത്ത് നാലു ദിവസത്തെ ഓഫീസ് ഹാജർ നിർദേശം നടപ്പാക്കുന്നത് വൈകിപ്പിച്ചിരുന്നു. എന്നാൽ, ഒക്ടോബർ 19 മുതൽ ദേശീയ തലസ്ഥാന മേഖലയിലെ ജീവനക്കാർ ആഴ്ചയിൽ കുറഞ്ഞത് നാലു ദിവസമെങ്കിലും ഓഫീസിൽ ഹാജരാകണമെന്ന് വകുപ്പ് അറിയിച്ചു. ദേശീയ തലസ്ഥാന മേഖലയ്ക്ക് പുറത്തുള്ള ഓഫീസുകളിൽ ആവശ്യമായ സൗകര്യങ്ങൾ ഒരുക്കുന്നതിനായി പബ്ലിക് സർവീസസ് ആൻഡ് പ്രൊക്യുർമെന്റ് കാനഡയുമായി ചേർന്ന് പ്രവർത്തിക്കുകയാണെന്നും വകുപ്പ് വ്യക്തമാക്കി.
ഓട്ടവയിലെ സസെക്സ് ഡ്രൈവിലുള്ള ലെസ്റ്റർ ബി. പിയേഴ്സൺ ബിൽഡിങ്ങിൽ വർഷങ്ങൾ നീളുന്ന നവീകരണ പ്രവർത്തനങ്ങൾ നടക്കുന്നതിനാൽ ഗ്ലോബൽ അഫയേഴ്സ് കാനഡയും നാലു ദിവസത്തെ ഓഫീസ് ഹാജർ നിർദേശം നടപ്പാക്കുന്നത് വൈകിപ്പിക്കുകയാണ്. ദേശീയ തലസ്ഥാന മേഖലയിലെ മറ്റ് കെട്ടിടങ്ങളിലെ സൗകര്യങ്ങളുടെ കുറവും ഇതിന് കാരണമാണ്. പ്രതിരോധ വകുപ്പിന്റെ ചില കെട്ടിടങ്ങളിലും ജീവനക്കാർക്ക് ആവശ്യമായ ജോലിസ്ഥലങ്ങൾ പരിമിതമായേക്കാമെന്ന് നേരത്തേ അറിയിച്ചിരുന്നു.
നിലവിലെ ഓഫീസ് സൗകര്യങ്ങൾ ഉപയോഗിച്ച് ആഴ്ചയിൽ നാലു ദിവസം 90 ശതമാനം ജീവനക്കാർക്ക് ഓഫീസിലെത്താൻ കഴിയുമെന്ന് പബ്ലിക് സർവീസസ് ആൻഡ് പ്രൊക്യുർമെന്റ് കാനഡ കഴിഞ്ഞ മാസം വ്യക്തമാക്കിയിരുന്നു. ഓഫീസിലെ നിലവിലുള്ള ഇരിപ്പിടങ്ങൾ വിവിധ രീതികളിൽ ഉപയോഗിച്ചാണ് കൂടുതൽ ജീവനക്കാർക്ക് ജോലി ചെയ്യാനുള്ള സൗകര്യം ഒരുക്കുന്നത്. 2027 മാർച്ച് 31നകം 95 ശതമാനം സർക്കാർ ജീവനക്കാർക്കും ആഴ്ചയിൽ നാലു ദിവസം ഓഫീസിലെത്തി ജോലി ചെയ്യാനുള്ള സൗകര്യം ഒരുക്കാനാണ് വകുപ്പിന്റെ ലക്ഷ്യം.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/GIh0npbq3d1GgGCL00k37z
