ദുബായിൽ നിന്ന് ടെൽ അവീവിലേക്ക് പോയ ഫ്ലൈദുബായ് വിമാനത്തിലെ സഹപൈലറ്റിന് ഓസ്‌ട്രേലിയയുമായുള്ള ബന്ധം സംബന്ധിച്ച് അന്വേഷണം ആരംഭിച്ചു. ഫ്ലൈദുബായ് എഫ്‌ഇസെഡ് 1073 (FZ1073) വിമാനത്തിൽ ക്യാപ്റ്റനെ ആക്രമിച്ച് വിമാനം റാഞ്ചാൻ ശ്രമിച്ച സഹപൈലറ്റിന്റെ പശ്ചാത്തലമാണ് ഓസ്‌ട്രേലിയൻ കൗണ്ടർ ടെററിസം വിഭാഗം അന്വേഷിക്കുന്നത്. ഫെഡറൽ പോലീസും വിക്ടോറിയൻ സ്റ്റേറ്റ് പോലീസും എഎസ്‌ഐഒ (ASIO) ഇന്റലിജൻസ് ഏജൻസിയും അടങ്ങുന്ന വിക്ടോറിയൻ ജോയിന്റ് കൗണ്ടർ ടെററിസം ടീമാണ് ഈ അന്വേഷണത്തിന് നേതൃത്വം നൽകുന്നത്.
സഹപൈലറ്റ് മെൽബണിലെ ഒരു സർവകലാശാലയിൽ പഠിച്ചിട്ടുണ്ടെന്നാണ് വിവരം. ഏകദേശം ഒരു പതിറ്റാണ്ടിനു മുൻപ് മെൽബണിലെ ആർഎംഐടി (RMIT) സർവകലാശാലയിൽ ഇയാൾ പഠിച്ചിരുന്നതായി മൂന്നാം കക്ഷി ഉറവിടം സ്ഥിരീകരിച്ചു. എന്നാൽ എഞ്ചിനീയറിങ് കോഴ്‌സ് പൂർത്തിയാക്കാൻ ഇയാൾക്ക് കഴിഞ്ഞിരുന്നില്ലെന്ന് ആർഎംഐടി സർവകലാശാല വ്യക്തമാക്കി. പ്രതിയുടെ പേരോ പഠിച്ച വർഷങ്ങളോ സർവകലാശാല ഔദ്യോഗികമായി വെളിപ്പെടുത്തിയിട്ടില്ല.
കഴിഞ്ഞ ബുധനാഴ്ച ദുബായിൽ നിന്ന് ഇസ്രയേലിലേക്ക് പുറപ്പെട്ട വിമാനത്തിലെ ക്യാപ്റ്റനെ സഹപൈലറ്റ് അടിയന്തര രക്ഷാപ്രവർത്തന ഉപകരണമായ മഴു ഉപയോഗിച്ച് ആക്രമിക്കുകയായിരുന്നു. ഈ സംഭവം ഭീകരാക്രമണശ്രമമാണെന്നാണ് യു.ഇ.എ പ്രോസിക്യൂട്ടർ ജനറൽ വ്യക്തമാക്കിയത്. വിമാനം ഏകദേശം 30 സെക്കൻഡിനുള്ളിൽ 16,000 അടി താഴ്ചയിലേക്ക് കുത്തനെ പതിച്ചതിനു ശേഷമാണ് നിയന്ത്രണം വീണ്ടെടുത്തത്. 170-ലധികം യാത്രക്കാരും ജീവനക്കാരുമാണ് വിമാനത്തിലുണ്ടായിരുന്നവരിൽ ഭൂരിഭാഗവും ഇസ്രയേൽ പൗരന്മാരാണ്.
ഒമാൻ പൗരനായ ഹമാം അൽ-ഹമ്മാമിയാണ് സഹപൈലറ്റ് എന്നാണ് രണ്ട് ഉറവിടങ്ങൾ വ്യക്തമാക്കുന്നത്. എന്നാൽ യു.ഇ.എ അധികൃതരോ ഫ്ലൈദുബായിയോ ഇയാളുടെ പേര് ഇതുവരെ ഔദ്യോഗികമായി പുറത്തുവിട്ടിട്ടില്ല. വിമാനത്തിലുണ്ടായിരുന്ന യാത്രക്കാരും ജീവനക്കാരും ചേർന്ന് അക്രമിയെ കീഴ്പ്പെടുത്തുകയായിരുന്നു. വിമാനത്തിലുണ്ടായിരുന്ന അവധിയിലായ മറ്റൊരു ഫ്ലൈദുബായ് പൈലറ്റ് നിയന്ത്രണം ഏറ്റെടുക്കുകയും സൗദി അറേബ്യയിലെ തബൂക്ക് വിമാനത്താവളത്തിൽ വിമാനം സുരക്ഷിതമായി ഇറക്കുകയും ചെയ്തു. തുടർന്ന് സൗദി അധികൃതർ കസ്റ്റഡിയിലെടുത്ത പ്രതിയെ വ്യാഴാഴ്ച യു.ഇ.എയിലേക്ക് മാറ്റി.
ഓസ്‌ട്രേലിയയിൽ കഴിഞ്ഞിരുന്ന സമയത്ത് ഇയാൾ തീവ്രവാദ സ്വഭാവമുള്ള പള്ളികളും വെബ്‌സൈറ്റുകളും സന്ദർശിച്ചിരുന്നതായി ഫിനാൻഷ്യൽ ടൈംസ് റിപ്പോർട്ട് ചെയ്തു. ഓസ്‌ട്രേലിയൻ ഇന്റലിജൻസ് ഏജൻസിയുടെ പക്കൽ ഇയാളെക്കുറിച്ചുള്ള വിവരങ്ങളുണ്ടായിരുന്നുവെന്നും റിപ്പോർട്ടിൽ പറയുന്നു. സഹപൈലറ്റിന് ഇസ്ലാമിക തീവ്രവാദ സ്വാധീനമുണ്ടായിരുന്നുവെന്നും ആത്മഹത്യാ പ്രവണതയുണ്ടായിരുന്നുവെന്നും ഇസ്രയേൽ പ്രധാനമന്ത്രി ബെഞ്ചമിൻ നെതന്യാഹു പ്രതികരിച്ചു.
ഒമാനുമായി ഔദ്യോഗിക നയതന്ത്ര ബന്ധമില്ലാത്തതിനാൽ ഇത്തരം രാജ്യങ്ങളിൽ നിന്നുള്ള പൈലറ്റുമാരെ ഇസ്രയേൽ സർവീസുകൾക്ക് അനുവദിക്കാറില്ലെന്നും അദ്ദേഹം വ്യക്തമാക്കി. സംഭവത്തെത്തുടർന്ന് വിദേശ സിവില് ഏവിയേഷൻ സുരക്ഷയെക്കുറിച്ച് സമഗ്രമായ അവലോകനം നടത്താൻ നാഷണൽ സെക്യൂരിറ്റി കൗൺസിലിന് നെതന്യാഹു നിർദ്ദേശം നൽകി.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
