ഒന്റാരിയോ: ഒന്റാരിയോയിൽ പുതിയ റെസിഡൻഷ്യൽ ടെനൻസി നിയമങ്ങൾ നിലവിൽ വന്നു. വാടക കുടിശ്ശിക വരുത്തുന്നതുമായി ബന്ധപ്പെട്ട സമയപരിധി വെട്ടിച്ചുരുക്കുന്നതടക്കമുള്ള സുപ്രധാന ഭേദഗതികളാണ് ഒന്റാരിയോയിലെ റെസിഡൻഷ്യൽ ടെനൻസി ആക്ടിൽ (RTA) വരുത്തിയിരിക്കുന്നത്. ബിൽ 60, ബിൽ 97 എന്നിവയിൽ നിന്നുള്ള ഈ പുതിയ നിയമങ്ങൾ ഒന്റാരിയോയിലെ വാടക ഭവന വിപണിയിൽ സന്തുലിതാവസ്ഥ പുനഃസ്ഥാപിക്കുന്നതിന്റെ ഭാഗമായാണ് നടപ്പിലാക്കിയതെന്നാണ് സർക്കാർ വ്യക്തമാക്കുന്നത്.
വാടക നൽകുന്നതിൽ വീഴ്ച വരുത്തുന്ന സാഹചര്യത്തിൽ ലാൻഡ്ലോർഡ് നൽകുന്ന N4 നോട്ടീസ് പ്രകാരം കുടിശ്ശിക അടയ്ക്കാനുള്ള സമയം 14 ദിവസത്തിൽ നിന്ന് 7 ദിവസമായി കുറച്ചു. നിശ്ചിത സമയത്തിനകം പണം നൽകിയില്ലെങ്കിൽ ലാൻഡ്ലോർഡിന് ഒഴിപ്പിക്കലിനായി അപേക്ഷിക്കാം. വാടക കുടിശ്ശികയുമായി ബന്ധപ്പെട്ട ലാൻഡ്ലോർഡ് ആൻഡ് ടെനന്റ് ബോർഡ് (LTB) ഹിയറിംഗിനിടെ യൂണിറ്റിലെ പ്രശ്നങ്ങൾ ഉന്നയിക്കാൻ ആഗ്രഹിക്കുന്ന വാടകക്കാർ, തങ്ങൾ നൽകാനുണ്ടെന്ന് പറയപ്പെടുന്ന വാടകയുടെ പകുതി തുക മുൻകൂറായി അടയ്ക്കേണ്ടിവരും.
കൂടാതെ, ‘തുടർച്ചയായ വാടക വൈകൽ’ എന്നതിന് പുതിയ നിയമത്തിൽ കൃത്യമായ നിർവചനവും നൽകിയിട്ടുണ്ട്. ആറുമാസത്തിനുള്ളിൽ കുറഞ്ഞത് മൂന്ന് തവണയെങ്കിലും വാടക നൽകാൻ ഏഴ് ദിവസത്തിലധികം വൈകുന്നതിനെയാണ് ഇതായി നിർവചിച്ചിരിക്കുന്നത്. സ്വന്തം ആവശ്യങ്ങൾക്കോ കുടുംബാംഗങ്ങളുടെ ആവശ്യങ്ങൾക്കോ വേണ്ടി വാടകക്കാരെ ഒഴിപ്പിക്കുന്ന ലാൻഡ്ലോർഡുകൾക്ക് 120 ദിവസത്തെ മുൻകൂർ നോട്ടീസ് നൽകിയാൽ മതിയാകും. ഇത്തരം സാഹചര്യങ്ങളിൽ വാടകക്കാരന് നഷ്ടപരിഹാരമോ മറ്റൊരു യൂണിറ്റോ നൽകേണ്ട ബാധ്യത ഇനിയില്ല.
പുതിയ മാറ്റങ്ങൾ LTBയിലെ കാലതാമസവും കെട്ടിക്കിടക്കുന്ന അപേക്ഷകളും പരിഹരിക്കാൻ സഹായിക്കുമെന്നാണ് സർക്കാർ വാദം. എന്നാൽ ഈ മാറ്റങ്ങൾ കാര്യങ്ങൾ കൂടുതൽ സങ്കീർണമാക്കുമെന്നും ഹിയറിംഗുകളുടെ എണ്ണം വർധിപ്പിക്കുമെന്നും വാടകക്കാരുടെ സംഘടനകളും ചില ലാൻഡ്ലോർഡ് ഗ്രൂപ്പുകളും ആശങ്ക പ്രകടിപ്പിക്കുന്നുണ്ട്. കോടതികളിലും ട്രിബ്യൂണലുകളിലും കൂടുതൽ കേസ് ബാക്ക്ലോഗിന് ഇത് വഴിവെക്കുമെന്നും അവർ ചൂണ്ടിക്കാട്ടുന്നു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
