വാഷിങ്ടൺ : അമേരിക്കയിലെ കോടികൾ വിലമതിക്കുന്ന ആഡംബര വീടുകൾ നിറഞ്ഞ തെരുവുകളിൽ വൈകുന്നേരം ആറുമണി ആയിട്ടും ആളുകളെ കാണാനില്ലാത്ത അവസ്ഥയെക്കുറിച്ച് ഒരു ഇന്ത്യൻ യുവാവ് പങ്കുവെച്ച വീഡിയോ സോഷ്യൽ മീഡിയയിൽ വൈറലാകുന്നു. നിതിൻ മൽഹോത്ര എന്ന യുവാവാണ് ഇന്ത്യയിലെ തിരക്കേറിയ ജീവിതവുമായി അമേരിക്കൻ സബർബുകളിലെ ജീവിതരീതി താരതമ്യം ചെയ്ത് രംഗത്തെത്തിയത്.
അഞ്ച് വർഷമായി അമേരിക്കയിൽ കഴിയുന്ന നിതിൻ, അഞ്ച് കോടി മുതൽ പതിനഞ്ച് കോടി രൂപ വരെ വിലമതിക്കുന്ന വീടുകൾക്കിടയിലെ തെരുവുകളിൽ ആരെയും കാണാനില്ലെന്ന് വീഡിയോയിൽ ചൂണ്ടിക്കാണിക്കുന്നു. ഇന്ത്യയിൽ എവിടെയാണെങ്കിലും വീടിന് പുറത്തിറങ്ങിയാൽ കാണുന്ന ഊർജവും സജീവതയും അമേരിക്കയിൽ ലഭിക്കുന്നില്ലെന്ന് വ്യക്തമാക്കുന്ന അദ്ദേഹം, ‘എന്തിനാണ് ആളുകൾ അമേരിക്കയിലേക്ക് വരുന്നത്’ എന്നും സംശയം പ്രകടിപ്പിക്കുന്നുണ്ട്.
ഫ്ലോറിഡയിലെ അവസ്ഥ മാത്രമല്ല ഇതെന്നും ടെക്സസ്, കലിഫോർണിയ, ന്യൂയോർക്ക് എന്നിവിടങ്ങളിലെല്ലാം സ്ഥിതി സമാനമാണെന്നും നിതിൻ പറയുന്നു. ചില ഇന്ത്യൻ, ദേശി കമ്മ്യൂണിറ്റികൾ ഉള്ള പ്രദേശങ്ങൾ ഒഴിച്ചാൽ അമേരിക്കയുടെ ഭൂരിഭാഗം പ്രദേശങ്ങളും ഇത്തരം വിജനമായ അന്തരീക്ഷത്തിലാണ് ഉള്ളതെന്നും അദ്ദേഹം കൂട്ടിച്ചേർക്കുന്നു.
വീഡിയോയ്ക്ക് താഴെ നിരവധി പേരാണ് അനുകൂലിച്ചും പ്രതികൂലിച്ചും രംഗത്തെത്തിയത്. ഇത് കാണാൻ സമാധാനപരമാണെങ്കിലും വളരെ ഏകാന്തത തോന്നിക്കുന്നതാണെന്നും പണത്തിന് കൂട്ടായ്മകളെ പകരം നൽകാനാവില്ലെന്നും ചിലർ അഭിപ്രായപ്പെട്ടു. അതേസമയം, അവിടുത്തുകാർ ശാന്തതയും സമാധാനവും ആഗ്രഹിക്കുന്നവരാണെന്നും, ആ ശാന്തത തേടിയാണ് പലരും വിദേശത്തേക്ക് പോകുന്നതെന്നും വ്യക്തമാക്കി യുവാവിനെ വിമർശിച്ചവരും ഏറെയാണ്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
