ഓട്ടവ: അമേരിക്കയും കാനഡയും തമ്മിലുള്ള വ്യാപാര തർക്കങ്ങൾക്കിടയിലും ഇരുരാജ്യങ്ങളും തമ്മിൽ വൈകാതെ പുതിയ കരാറിലെത്താൻ സാധിക്കുമെന്ന പ്രത്യാശ പ്രകടിപ്പിച്ച് പ്രധാനമന്ത്രി മാർക്ക് കാർണി. കാനഡയുമായി “ഏറ്റവും വേഗത്തിൽ” വ്യാപാരക്കരാർ സാധ്യമാകും എന്ന യു.എസ്. പ്രസിഡന്റ് ഡൊണാൾഡ് ട്രംപിന്റെ പ്രസ്താവനയെ സ്വാഗതം ചെയ്യുന്നതായി ബ്ലൂംബെർഗിന് നൽകിയ അഭിമുഖത്തിൽ കാർണി വ്യക്തമാക്കി.
ഇരുരാജ്യങ്ങളുടെയും പരമാധികാരത്തെയും സാംസ്കാരിക സ്ഥാപനങ്ങളെയും പരസ്പരം ബഹുമാനിക്കുന്ന, പരസ്പര പ്രയോജനകരമായ ഒരു കരാറിലെത്താൻ കാനഡ സജ്ജമാണെന്ന് കാർണി പറഞ്ഞു. ചർച്ചകളിൽ നിന്ന് പിന്നോട്ട് പോകാനോ മുൻകൈയെടുക്കുന്നതിൽ അഭിമാനപ്രശ്നം വിചാരിക്കാനോ ഇല്ലെന്നും, കനേഡിയൻ ജനതയ്ക്ക് ശരിയായ കാര്യങ്ങൾ ചെയ്യുകയാണ് ലക്ഷ്യമെന്നും അദ്ദേഹം കൂട്ടിച്ചേർത്തു. കാനഡയുടെ പരിധികളും പരമാധികാര വ്യവസ്ഥകളും യു.എസ്. ഭരണകൂടത്തിന് ഇപ്പോൾ കൂടുതൽ വ്യക്തമായി മനസ്സിലായിട്ടുണ്ടാകാമെന്നും കാർണി അഭിപ്രായപ്പെട്ടു.
Also Read: ഐസ്ക്രീം മുതൽ പ്രതിരോധ മേഖല വരെ; താരിഫിനിടയിലും കാനഡയിൽ തദ്ദേശീയ വ്യവസായങ്ങൾക്ക് മുന്നേറ്റം
കഴിഞ്ഞ മാസം ഇരുരാജ്യങ്ങളും തമ്മിലുള്ള വ്യാപാര ചർച്ചകൾ അപ്രതീക്ഷിതമായി നിന്നുപോവുകയും, പരസ്പരം അധിക തീരുവ ചുമത്തുകയും ചെയ്തിരുന്നു. ഇതിനുപിന്നാലെ കാനഡയ്ക്കെതിരെ പരിഹാസരൂപേണയുള്ള AI മീമുകൾ പങ്കുവെച്ചും, ലേക്ക് ഒന്റാറിയോയുടെ പേര് ലേക്ക് അമേരിക്ക എന്ന് മാറ്റിയും ട്രംപ് ഭരണകൂടം രംഗത്തെത്തിയിരുന്നു. എന്നാൽ, ഈ ട്രോളുകളോ പരിഹാസങ്ങളോ ടൊറന്റോയിൽ നടക്കുന്ന രാജ്യത്തെ പ്രഥമ ഇൻവെസ്റ്റ്മെന്റ് ഉച്ചകോടിയെ ബാധിക്കില്ലെന്നും, പങ്കെടുക്കുന്നവരെല്ലാം പ്രൊഫഷണലുകളാണെന്നും അദ്ദേഹം വ്യക്തമാക്കി. AI സുരക്ഷ, യൂറോപ്യൻ യൂണിയനുമായുള്ള സഹകരണം എന്നിവയും അഭിമുഖത്തിൽ ചർച്ചയായി.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
