ലണ്ടൻ: ചൂടുള്ള പാനീയങ്ങൾ പതിവായി കുടിക്കുന്നത് അന്നനാള (Esophageal) കാൻസർ വരാനുള്ള സാധ്യത വർധിപ്പിക്കുമെന്ന് യുകെയിലെ ഓക്സ്ഫോർഡ് സർവകലാശാല നടത്തിയ പുതിയ പഠനത്തിൽ കണ്ടെത്തി. ഓക്സ്ഫോർഡ് പോപ്പുലേഷൻ ഹെൽത്തിലെ ഗവേഷകർ യുകെയിലെ ഏകദേശം 10 ലക്ഷം ആളുകളുടെ ആരോഗ്യവിവരങ്ങൾ 10 വർഷത്തിലേറെ നിരീക്ഷിച്ച ശേഷമാണ് ഈ നിഗമനത്തിലെത്തിയത്. അന്നനാളത്തിലെ സ്ക്വാമസ് സെൽ കാർസിനോമ (SCC) എന്ന കാൻസറാണ് ഉയർന്ന താപനിലയിലുള്ള പാനീയങ്ങൾ ഉപയോഗിക്കുന്നവരിൽ കൂടുതൽ കണ്ടുവരുന്നത്. ക്യാൻസർ റിസർച്ച് യുകെ എന്ന സംഘടനയുടെ ധനസഹായത്തോടെയാണ് ഈ ഗവേഷണം പൂർത്തിയാക്കിയത്.
സാധാരണയായി ഇളംചൂടുള്ള പാനീയങ്ങൾ കുടിക്കുന്നവരുമായി താരതമ്യം ചെയ്യുമ്പോൾ ‘ചൂടുള്ള’ പാനീയങ്ങൾ കുടിക്കുന്നവർക്ക് രോഗസാധ്യത രണ്ടിരട്ടിയും, ‘വളരെ ചൂടുള്ള’ പാനീയങ്ങൾ ഉപയോഗിക്കുന്നവർക്ക് മൂന്നിരട്ടിയും വരെ അപകടസാധ്യത കൂടുന്നതായി ഡോ. കെറൻ പാപിയറിന്റെ നേതൃത്വത്തിലുള്ള ഗവേഷണ സംഘം വ്യക്തമാക്കുന്നു. അത്യധികം ചൂടുള്ള പാനീയങ്ങൾ കുടിക്കുന്നതോടെ അത് അന്നനാളത്തിന്റെ ഉള്ളിലെ നേർത്ത പാളികൾക്ക് കേടുപാടുകൾ വരുത്തുകയും, ഇതാണ് പിന്നീട് കാൻസറായി മാറാൻ ഇടയാക്കുകയും ചെയ്യുന്നത്. എന്നാൽ ബ്രിട്ടനിലും കാനഡയിലും പൊതുവെ ഈ കാൻസർ അപൂർവമാണെങ്കിലും രോഗം ബാധിച്ചാൽ അതിജീവന നിരക്ക് 20 ശതമാനത്തിൽ താഴെ മാത്രമാണെന്ന് കണക്കുകൾ സൂചിപ്പിക്കുന്നു.
Also Read : സർക്കാർ ജോലി വേണോ? മുൻപരിചയമില്ലാത്തവർക്കും അവസരമൊരുക്കി കാനഡ റവന്യൂ ഏജൻസി
അതേസമയം, ചായയോ കാപ്പിയോ കുടിക്കുന്നത് കൊണ്ടല്ല, മറിച്ച് അത് കുടിക്കുന്ന സമയത്തെ താപനില മൂലമാണ് ഈ അപകടസാധ്യത ഉണ്ടാകുന്നതെന്ന് പഠനം പ്രത്യേകമായി ചൂണ്ടിക്കാണിക്കുന്നു. അന്താരാഷ്ട്ര കാൻസർ ഗവേഷണ ഏജൻസിയുടെ (IARC) കണക്കുപ്രകാരം 65 ഡിഗ്രി സെൽഷ്യസിന് മുകളിലുള്ള പാനീയങ്ങൾ മനുഷ്യർക്ക് കാൻസറിന് സാധ്യതയുള്ളവയുടെ പട്ടികയിലാണ് പെടുന്നത്. അതിനാൽ ചായയോ കാപ്പിയോ തയ്യാറാക്കിയ ശേഷം ഉയർന്ന ചൂടോടെ കുടിക്കാതെ, തണുപ്പിച്ച് 50 മുതൽ 70 ഡിഗ്രി സെൽഷ്യസ് വരെയുള്ള സാധാരണ താപനിലയിൽ കുടിക്കുന്നതാണ് സുരക്ഷിതമെന്ന് വിദഗ്ദ്ധർ നിർദ്ദേശിക്കുന്നു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
