ടൊറന്റോ: കാനഡ റവന്യൂ ഏജൻസി (CRA) രാജ്യത്തുടനീളമുള്ള വിവിധ ടാക്സ് സെന്ററുകളിലേക്കും കോൾ സെന്ററുകളിലേക്കും പ്രാദേശിക ഓഫീസുകളിലേക്കും ജീവനക്കാരെ നിയമിക്കുന്നു. വിവിധ തസ്തികകളിലേക്കായി നടക്കുന്ന ഈ നിയമന പ്രക്രിയയിൽ മുൻപരിചയമില്ലാത്തവർക്കും ഹൈസ്കൂൾ വിദ്യാഭ്യാസ യോഗ്യതയുള്ളവർക്കും അപേക്ഷിക്കാം. ഹൈസ്കൂൾ യോഗ്യതയുള്ള എൻട്രി-ലെവൽ തസ്തികകൾക്ക് വാർഷിക ശമ്പളം $46,904 മുതൽ $73,595 വരെ ലഭിക്കുമ്പോൾ, അനുഭവസമ്പന്നരായ ഓഡിറ്റർ തസ്തികകളിൽ വാർഷിക ശമ്പളം $122,817 വരെ ഉയർന്നേക്കാം.
രാജ്യത്ത് നിലവിൽ തൊഴിലില്ലായ്മ നിരക്ക് ഉയർന്ന നിലയിൽ തുടരുന്ന സാഹചര്യത്തിലാണ് ഫെഡറൽ സർക്കാർ വകുപ്പായ CRA വിപുലമായ തൊഴിലവസരങ്ങൾ പ്രഖ്യാപിച്ചിരിക്കുന്നത്. ക്യുബെക്ക്, ഒന്റാറിയോ, മാനിറ്റോബ തുടങ്ങി വിവിധ പ്രവിശ്യകളിലായി ഡാറ്റ എൻട്രി, മെയിൽ പ്രോസസിംഗ്, കസ്റ്റമർ സർവീസ്, നികുതി വിശകലനം എന്നിവയുമായി ബന്ധപ്പെട്ട തസ്തികകളിലാണ് ഒഴിവുകൾ. തെരഞ്ഞെടുക്കപ്പെടുന്ന തുടക്കക്കാർക്ക് സ്ഥാപനം നേരിട്ട് ശമ്പളത്തോടുകൂടിയ പരിശീലനവും നൽകുന്നുണ്ട്.
സ്ഥിരമായ ജോലി സമയത്തോടൊപ്പം ജീവനക്കാർക്ക് മികച്ച ആനുകൂല്യങ്ങളാണ് ഏജൻസി വാഗ്ദാനം ചെയ്യുന്നത്. ആകർഷകമായ ശമ്പളത്തിന് പുറമെ ഫെഡറൽ പെൻഷൻ പദ്ധതി, ഹെൽത്ത്-ഡെന്റൽ ഇൻഷുറൻസുകൾ, ഫ്ലെക്സിബിൾ ജോലി സമയം, കുടുംബ ആവശ്യങ്ങൾക്കുള്ള പ്രത്യേക അവധികൾ എന്നിവയും ജീവനക്കാർക്ക് ലഭിക്കും. തൊഴിൽ പരിചയമുള്ളവർക്കായി പ്രത്യേക കോൾ സെന്റർ ഏജന്റ് തസ്തികകളും അക്കൗണ്ടിംഗ് ബിരുദമുള്ളവർക്കായി ഉയർന്ന ശമ്പളമുള്ള ഓഡിറ്റർ ഒഴിവുകളും നിലവിലുണ്ട്.
Also Read : അമേരിക്കയെ പൂട്ടാൻ കാനഡ: വെല്ലാൻഡ് കനാൽ അടയ്ക്കാനും ഊർജ നികുതി കൂട്ടാനും ആവശ്യം
യോഗ്യരായ ഉദ്യോഗാർത്ഥികൾ CRACareers പോർട്ടൽ വഴിയാണ് ഓൺലൈനായി അപേക്ഷകൾ സമർപ്പിക്കേണ്ടത്. മുൻസൈനികർ, കാനഡ പൗരന്മാർ, സ്ഥിരതാമസക്കാർ എന്നിവർക്ക് നിയമനങ്ങളിൽ മുൻഗണന ലഭിക്കും. വിദേശ വിദ്യാഭ്യാസ യോഗ്യതയുള്ളവർ ഇ.സി.എ (Educational Credential Assessment) രേഖകൾ കൂടി സമർപ്പിക്കേണ്ടതുണ്ട്. വിവിധ ഒഴിവുകളിലേക്ക് അപേക്ഷിക്കാനുള്ള അവസാന തീയതികൾ അടുത്തുവരുന്നതിനാൽ എത്രയും വേഗം അപേക്ഷകൾ നൽകണമെന്ന് അധികൃതർ അറിയിച്ചു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
