ഓട്ടവ: Carbon Emission കുറച്ച് പരിസ്ഥിതി സംരക്ഷണം ഉറപ്പാക്കാനുള്ള കാനഡയുടെ നീക്കങ്ങൾക്ക് കനത്ത തിരിച്ചടി. 2030-ഓടെ പൂർത്തിയാക്കേണ്ട പാരീസ് കാലാവസ്ഥാ കരാറിലെ ലക്ഷ്യങ്ങൾ കാനഡയ്ക്ക് കൈവരിക്കാനാവില്ലെന്നും, 2050-ഓടെ നടപ്പിലാക്കേണ്ട ലക്ഷ്യങ്ങൾ പോലും വൈകുമെന്നും വ്യക്തമാക്കുന്ന പുതിയ പഠന റിപ്പോർട്ട് പുറത്തുവന്നു. മുൻ നയങ്ങളിൽ വരുത്തിയ മാറ്റങ്ങളാണ് രാജ്യത്തിന് വില്ലനായതെന്ന് കാനഡ ക്ലൈമറ്റ് ഇൻസ്റ്റിറ്റ്യൂട്ട് വെള്ളിയാഴ്ച പുറത്തുവിട്ട റിപ്പോർട്ടിൽ പറയുന്നു.
നേരത്തെ ജസ്റ്റിൻ ട്രൂഡോ സർക്കാരിന്റെ കാലത്ത് കൊണ്ടുവന്ന പരിസ്ഥിതി നയങ്ങൾ കാറ്റിൽപ്പറത്തി പുതിയ പ്രധാനമന്ത്രി മാർക്ക് കാർണി എടുത്ത തീരുമാനങ്ങളാണ് ഇപ്പോഴത്തെ പ്രതിസന്ധിക്ക് കാരണം. ജനങ്ങൾക്ക് വലിയ സാമ്പത്തിക ഭാരമുണ്ടാക്കുന്നു എന്ന കാരണം പറഞ്ഞ് ഇക്കഴിഞ്ഞ മാർച്ച് ഒന്നിനാണ് കാർബൺ നികുതി കാർണി റദ്ദാക്കിയത്. കൂടാതെ ഇലക്ട്രിക് വാഹന പ്രോത്സാഹന പദ്ധതിയും എണ്ണ-വാതക കമ്പനികൾക്കുള്ള നിയന്ത്രണങ്ങളും ഒഴിവാക്കി.
ഈ മാറ്റങ്ങളാണ് കാനഡയെ ലക്ഷ്യത്തിൽ നിന്ന് 20 വർഷത്തോളം പിന്നോട്ടടിച്ചതെന്ന് റിപ്പോർട്ട് വ്യക്തമാക്കുന്നു. വായു മലിനീകരണവും കാർബൺ പുറന്തള്ളലും കുറയ്ക്കുന്നതിൽ ജി7 (G7) രാജ്യങ്ങളിൽ ഏറ്റവും പിന്നിലാണ് നിലവിൽ കാനഡ. 2005-ലെ കണക്കുമായി തതമ്യപ്പെടുത്തുമ്പോൾ വെറും 10 ശതമാനം കുറവ് മാത്രമാണ് ഇതുവരെ വരുത്താൻ സാധിച്ചിട്ടുള്ളത്. എന്നാൽ പ്രതിസന്ധി രൂക്ഷമാണെങ്കിലും വൻകിട ശുദ്ധോർജ്ജ പദ്ധതികളിലൂടെയും വീടുകളിലെ ഊർജ്ജ ഉപയോഗം ക്രമീകരിച്ചും 2050-ഓടെ ലക്ഷ്യം കൈവരിക്കാനാകുമെന്ന പ്രതീക്ഷയിലാണ് കേന്ദ്ര സർക്കാർ.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
