ഒന്റാരിയോ; ടൊറന്റോയിൽ നിന്ന് കാനഡയിലെ പ്രധാന നഗരമായ ബാരിയിലേക്കുള്ള ജി.ഒ ട്രെയിൻ യാത്രക്കാർക്ക് വരുന്ന രണ്ട് വാരാന്ത്യങ്ങളിൽ യാത്രാത്തടസ്സം നേരിടും. ട്രാക്ക് ഇരട്ടിപ്പിക്കലും സ്റ്റേഷൻ വികസനവും നടപ്പിലാക്കുന്നതിന്റെ ഭാഗമായി സെപ്റ്റംബർ 12, 13 (ശനി, ഞായർ), സെപ്റ്റംബർ 19, 20 എന്നീ തീയതികളിലാണ് ഈ റൂട്ടിൽ ട്രെയിൻ സർവീസുകൾ ഭാഗികമായി റദ്ദാക്കുന്നത്. മെട്രോലിൻക്സ് ആണ് ബാരി ലൈനിൽ വലിയ തോതിലുള്ള വികസന പ്രവർത്തനങ്ങൾ ആരംഭിച്ചിരിക്കുന്നത്.
ഈ വാരാന്ത്യങ്ങളിൽ അലൻഡേൽ വാട്ടർഫ്രണ്ട് സ്റ്റേഷൻ മുതൽ ഡൗൺസ്വ്യൂ പാർക്ക് വരെയുള്ള ഭാഗങ്ങളിൽ മാത്രമേ ട്രെയിനുകൾ സർവീസ് നടത്തുകയുള്ളൂ. ഡൗൺസ്വ്യൂ പാർക്കിനും ടൊറന്റോ യൂണിയൻ സ്റ്റേഷനും ഇടയിൽ ട്രെയിനുകൾ ഉണ്ടാകില്ല. അതിനാൽ യൂണിയൻ സ്റ്റേഷനിലേക്കോ തിരിച്ചോ യാത്ര ചെയ്യുന്നവർക്ക് ടി.ടി.സി ലൈൻ 1 (TTC Line 1) സബ്വേയും തുടർന്ന് ജി.ഒ ബസുകളും ഉപയോഗിച്ച് യാത്ര തുടരാവുന്നതാണ്. ഇതുകൂടാതെ, സെപ്റ്റംബർ 14 മുതൽ 21 വരെയുള്ള സാധാരണ ദിവസങ്ങളിലും ട്രെയിൻ സമയങ്ങളിൽ ചെറിയ മാറ്റങ്ങൾ ഉണ്ടാകും.
ALSO READ ; കനേഡിയൻ പൗരത്വമുണ്ടോ?; പങ്കാളിയെ കൂടെക്കൂട്ടാൻ ഇതാ ഒരു എളുപ്പവഴി
ട്രെയിനുകളുടെ എണ്ണവും വേഗതയും കൂട്ടാൻ ലക്ഷ്യമിട്ട് ബാരി റൂട്ടിൽ രണ്ടാമതൊരു ട്രാക്ക് കൂടി പണിയുന്നതിനാണ് സർവീസുകൾ താൽക്കാലികമായി മാറ്റിവെക്കുന്നത്. അതോടൊപ്പം മേപ്പിൾ, കിംഗ് സിറ്റി, അറോറ എന്നീ സ്റ്റേഷനുകളുടെ നവീകരണവും ഇതോടൊപ്പം നടക്കും. സെപ്റ്റംബർ 22 ചൊവ്വാഴ്ച മുതൽ ബാരി ലൈനിലെ ട്രെയിനുകൾ പഴയപടി കൃത്യസമയത്ത് സർവീസ് ആരംഭിക്കും. യാത്രക്കാർ പുതിയ യാത്രാസമയങ്ങളും ബദൽ വഴികളും മുൻകൂട്ടി ഉറപ്പുവരുത്തണമെന്ന് അധികൃതർ അറിയിച്ചു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
