നോവ സ്കോഷ്യയിലെ വാടക വർധനയ്ക്ക് പിന്നിൽ റെന്റ് ക്യാപ്പോ? വിദഗ്ധരുടെ വിലയിരുത്തൽ ഇങ്ങനെ !

ഹാലിഫാക്‌സ് : നോവ സ്കോഷ്യ പ്രവിശ്യയിൽ വാടക വർദ്ധനവ് തുടരുന്നു. കഴിഞ്ഞ വർഷം ജൂലൈയുമായി താരതമ്യം ചെയ്യുമ്പോൾ പ്രവിശ്യയിലെ വാടകയിൽ ശരാശരി 8.7 ശതമാനത്തിന്റെ വർദ്ധനവാണ് രേഖപ്പെടുത്തിയിരിക്കുന്നതെന്ന് സ്റ്റാറ്റിസ്റ്റിക്സ് കാനഡയുടെ കണക്കുകൾ വ്യക്തമാക്കുന്നു. വർഷങ്ങളായി തുടർന്ന ചരിത്രപരമായ നിരക്കുകളെ അപേക്ഷിച്ച് ഇപ്പോഴും വളരെ ഉയർന്ന അളവിലാണ് വാടക വർദ്ധനവ് ഉണ്ടാകുന്നത്.

1998 മുതൽ 2018 വരെയുള്ള കാലയളവിൽ പ്രവിശ്യയിലെ വാടക നാണയപ്പെരുപ്പ നിരക്ക് ഒരിക്കലും രണ്ട് ശതമാനത്തിൽക്കൂടിയിരുന്നില്ല. 2023 ഒക്ടോബറിലെ ഏറ്റവും ഉയർന്ന നിരക്കായ 14.6 ശതമാനത്തിൽ നിന്ന് വാടക വർദ്ധനവ് കുറഞ്ഞിട്ടുണ്ടെങ്കിലും, ഇപ്പോഴും ഉയർന്ന നിരക്കിൽ തന്നെ തുടരുകയാണ്. കൺസ്യൂമർ പ്രൈസ് ഇൻഡക്സ് ഡാറ്റ പ്രകാരം, 2018 മുതൽ കാനഡയിലെ മൊത്തത്തിലുള്ള 39 ശതമാനം വർദ്ധനവുമായി താരതമ്യം ചെയ്യുമ്പോൾ നോവ സ്കോഷ്യയിൽ വാടക ഏകദേശം 57 ശതമാനമാണ് വർദ്ധിച്ചത്.

പുതിയ വാടക യൂണിറ്റുകളുടെ നിർമ്മാണം ഹാലിഫാക്സിന് പുറത്തേക്ക് വ്യാപിക്കുന്നില്ലാത്തതാണ് പ്രധാന വെല്ലുവിളിയെന്ന് കാനഡ മോർഗേജ് ആൻഡ് ഹൗസിങ് കോർപ്പറേഷൻ വ്യക്തമാക്കുന്നു. ജനസംഖ്യാ വളർച്ച പ്രവിശ്യയിലുടനീളം വ്യാപിക്കുന്നുണ്ടെങ്കിലും ഭവന നിർമ്മാണം പ്രധാനമായും ഹാലിഫാക്സിൽ മാത്രമായി കേന്ദ്രീകരിച്ചിരിക്കുന്നു. കെന്റ്‌വിൽ പോലെയുള്ള മറ്റ് പ്രദേശങ്ങളിൽ ഒഴിവുള്ള വീടുകളുടെ ലഭ്യത വളരെ കുറവാണെന്നും ഇത് വാടക സമ്മർദ്ദം വർദ്ധിപ്പിക്കുന്നുണ്ടെന്നും സി.എം.എച്ച്.സി അറ്റ്ലാന്റിക് മേഖലയിലെ ലീഡ് ഇക്കണോമിസ്റ്റ് കെൽവിൻ ഒൻഡോറോ ചൂണ്ടിക്കാണിക്കുന്നു.

വാർഷിക വാടക വർദ്ധനവിന്മേൽ പ്രവിശ്യ ഏർപ്പെടുത്തിയിട്ടുള്ള അഞ്ച് ശതമാനത്തിന്റെ പരിധിയാണ് മറ്റൊരു കാരണമെന്ന് റിയൽ എസ്റ്റേറ്റ് കൺസൾട്ടന്റായ നീൽ ലോവിറ്റ് പറയുന്നു. വാടക പരിധി പാട്ടച്ചതുര പുതുക്കുമ്പോൾ മാത്രമാണ് ബാധകമാകുന്നത് എന്നതിനാൽ, പുതിയ യൂണിറ്റുകളിലേക്ക് മാറുന്നവർക്ക് ഉയർന്ന വാടക നൽകേണ്ടി വരുന്നു. വിപണി സാഹചര്യങ്ങൾ മെച്ചപ്പെടുമ്പോഴും വാടക ഉയർന്നുനിൽക്കാൻ ഇത് കാരണമാകുന്നുണ്ടെന്ന് വിദഗ്ധർ വ്യക്തമാക്കുന്നു.

അതേസമയം, താങ്ങാനാവുന്ന നിരക്കിലുള്ള വാടക വീടുകളുടെ ലഭ്യത ഇപ്പോഴും വളരെക്കുറവാണെന്ന് കേപ് ബ്രിട്ടൺ സർവകലാശാലയിലെ പ്രൊഫസറായ കാതറിൻ ലെവിറ്റൻ-റീഡ് നടത്തിയ ഗവേഷണത്തിൽ വ്യക്തമാക്കുന്നു. കുറഞ്ഞ വരുമാനമുള്ള കുടുംബങ്ങളുടെ സഹായ തുക രണ്ട് ശതമാനത്തിൽ താഴെ മാത്രം വർദ്ധിച്ചപ്പോൾ, വാടകയിലുണ്ടാകുന്ന മൂന്ന് മുതൽ അഞ്ച് ശതമാനം വരെയുള്ള വർദ്ധനവ് സാധാരണക്കാരായ ജനങ്ങൾക്ക് വലിയ സാമ്പത്തിക പ്രതിസന്ധിയാണ് സൃഷ്ടിക്കുന്നത്.

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq