ക്യുബെക്ക്: അമേരിക്കയുമായുള്ള വ്യാപാരയുദ്ധം രൂക്ഷമായതോടെ, പ്രാദേശിക ഉൽപ്പന്നങ്ങൾക്ക് മുൻഗണന നൽകുന്ന പുതിയ പദ്ധതിയുമായി ക്യുബെക്ക് സർക്കാർ രംഗത്ത്. അടുത്ത നാല് മാസത്തിനുള്ളിൽ പ്രവിശ്യയുടെ സമ്പദ്വ്യവസ്ഥയിലേക്ക് 1.5 ബില്യൺ ഡോളർ സമാഹരിക്കാനാണ് പുതിയ നടപടികളിലൂടെ ലക്ഷ്യമിടുന്നത്. യു.എസ് പ്രസിഡന്റ് ഡൊണാൾഡ് ട്രംപിന്റെ നയങ്ങൾക്കെതിരെ ശക്തമായി പ്രതികരിക്കുമെന്നും പ്രവിശ്യ ഒറ്റക്കെട്ടായി നിൽക്കുമെന്നും ക്യുബെക്ക് പ്രീമിയർ ക്രിസ്റ്റിൻ ഫ്രെഷെറ്റ് വ്യക്തമാക്കി.
സർക്കാർ കരാറുകളിൽ പ്രാദേശിക സ്ഥാപനങ്ങൾക്ക് മുൻഗണന ഉറപ്പാക്കുന്ന പുതിയ ഉത്തരവിൽ പ്രീമിയറും മന്ത്രിമാരും ഒപ്പുവെച്ചു. ക്യുബെക്കിലും കാനഡയിലും ബിസിനസ്സ് കേന്ദ്രങ്ങളുള്ള കമ്പനികൾക്കായി പൊതു ലേലങ്ങൾ മാറ്റിവെക്കാനാണ് തീരുമാനം. ഉൽപ്പന്നങ്ങൾ പ്രവിശ്യയിൽ തന്നെ നിർമ്മിക്കുകയും സംസ്കരിക്കുകയും ചെയ്യണമെന്ന നിബന്ധനയും ഇതിൽ ഉൾപ്പെടുന്നു. ഫർണിച്ചർ മേഖലയിലെ ആവശ്യങ്ങൾക്കായി ക്യുബെക്കിലെ വിതരണക്കാരെ മാത്രമാകും ഇനി ആശ്രയിക്കുക.
പ്രവിശ്യയിലെ മൊത്തം സർക്കാർ കരാറുകളുടെ പത്ത് ശതമാനത്തിൽ താഴെ മാത്രമേ ഈ സംരക്ഷണ നടപടികൾ ബാധിക്കുകയുള്ളൂ എന്ന് പ്രീമിയർ വ്യക്തമാക്കി. 2024-2025 കാലയളവിൽ ക്യുബെക്ക് സർക്കാരും പൊതു ഏജൻസികളും ചേർന്ന് 26 ബില്യൺ ഡോളറിന്റെ കരാറുകളാണ് നൽകിയത്. കാനഡയിലെ മറ്റ് ഭാഗങ്ങളെ അപേക്ഷിച്ച് യു.എസിൽ നിന്നുള്ള ഇറക്കുമതിയുടെ അഞ്ച് ശതമാനത്തെ മാത്രമാണ് പുതിയ യു.എസ് തീരുവ ബാധിക്കുക എന്നും അവർ കൂട്ടിച്ചേർത്തു.
അതേസമയം, പ്രവിശ്യയിലെ തിരഞ്ഞെടുപ്പ് മുന്നിൽ കണ്ട് രാഷ്ട്രീയ നേട്ടത്തിനായി ക്രിസ്റ്റിൻ ഫ്രെഷെറ്റ് വ്യാപാര തർക്കങ്ങളെ ഉപയോഗിക്കുകയാണെന്ന് പ്രതിപക്ഷ പാർട്ടികൾ ആരോപിച്ചു. എന്നാൽ ബിസിനസ്സ് രംഗത്തുള്ളവർക്ക് ഇത് രാഷ്ട്രീയ നാടകമല്ലെന്നും നിലനിൽപ്പിന്റെ പ്രശ്നമാണെന്നും പ്രീമിയർ ഈ ആരോപണങ്ങൾക്ക് മറുപടി നൽകി. കാനഡയ്ക്കുള്ളിൽ വ്യാപാരം വ്യാപിപ്പിക്കുന്നതിനായി പ്രത്യേക ടാസ്ക് ഫോഴ്സിനും ക്യുബെക്ക് സർക്കാർ രൂപം നൽകിയിട്ടുണ്ട്.
കാനഡയുടെ പ്രതികാര തീരുവ നിലവിൽ വന്നതിന് പിന്നാലെ, അമേരിക്കൻ സംഭരണ വിപണിയിൽ നിന്ന് കനേഡിയൻ ഉൽപ്പന്നങ്ങളെ പൂർണ്ണമായും ഒഴിവാക്കുമെന്ന് ട്രംപ് പ്രഖ്യാപിച്ചിരുന്നു. ഇതിന് മറുപടിയായാണ് ക്യുബെക്ക് സർക്കാർ പ്രാദേശിക വിപണിയെ ശക്തിപ്പെടുത്താനുള്ള പുതിയ തന്ത്രങ്ങൾ പ്രഖ്യാപിച്ചത്. സാധാരണക്കാരും മുനിസിപ്പാലിറ്റികളും പരമാവധി പ്രാദേശിക ഉൽപ്പന്നങ്ങൾ വാങ്ങണമെന്നും ഫ്രെഷെറ്റ് അഭ്യർത്ഥിച്ചു.
