റെനൗസ്: ന്യൂ ബ്രൺസ്വിക്കിലെ റെനൂസിലുള്ള അറ്റ്ലാന്റിക് ഇൻസ്റ്റിറ്റ്യൂഷൻ ജയിലിൽ നിന്ന് 1.12 ലക്ഷം ഡോളറിലധികം വിലമതിക്കുന്ന നിരോധിത വസ്തുക്കൾ പിടിച്ചെടുത്തു. കഴിഞ്ഞ തിങ്കളാഴ്ചയാണ് ഈ പുരുഷ ജയിലിൽ വെച്ച് കറക്ഷണൽ സർവീസ് കാനഡ (CSC) ജീവനക്കാർ പരിശോധന നടത്തിയത്. മൂർച്ചയുള്ള ആയുധങ്ങൾ, ഹാഷിഷ്, പുകയില, കഞ്ചാവ് കോൺസൻട്രേറ്റ് (ഷാറ്റർ), മദ്യം, വേപ്പിംഗ് ഉപകരണങ്ങൾ, മൊബൈൽ ഫോണുകൾ, USB കീ, കാർഡ് റീഡർ എന്നിവയാണ് ഇവിടെനിന്ന് കണ്ടെടുത്തത്.
സ്ഥാപനത്തിനുള്ളിലേക്ക് മയക്കുമരുന്നും മറ്റ് നിരോധിത വസ്തുക്കളും എത്താതിരിക്കാൻ കർശനമായ സുരക്ഷാ സംവിധാനങ്ങളാണ് കറക്ഷണൽ സർവീസ് കാനഡ ഒരുക്കിയിട്ടുള്ളത്. കെട്ടിടങ്ങൾ, തടവുകാരുടെ വ്യക്തിഗത വസ്തുക്കൾ, സന്ദർശകർ എന്നിവരെ വിശദമായി പരിശോധിക്കുന്നതിനായി അയോൺ സ്കാനറുകളും പ്രത്യേക പരിശീലനം ലഭിച്ച മയക്കുമരുന്ന് കണ്ടെത്തനുള്ള നായ്ക്കളെയും ഇവിടെ ഉപയോഗിക്കുന്നുണ്ടെന്ന് CSC ഉദ്യോഗസ്ഥർ വാർത്താക്കുറിപ്പിലൂടെ അറിയിച്ചു.
1987-ൽ പ്രവർത്തനം ആരംഭിച്ച അറ്റ്ലാന്റിക് ഇൻസ്റ്റിറ്റ്യൂഷൻ കാനഡയിലെ പ്രധാനപ്പെട്ട ഒരു സുരക്ഷാ ജയിലാണിത്. 331 പുരുഷ തടവുകാരെ പാർപ്പിക്കാനുള്ള ശേഷിയാണ് ഈ സ്ഥാപനത്തിനുള്ളത്. പിടിച്ചെടുത്ത വസ്തുക്കളുടെ ഉറവിടത്തെക്കുറിച്ചും ഇവ ഉള്ളിലെത്തിച്ചവരെക്കുറിച്ചും അധികൃതർ അന്വേഷണം തുടരുകയാണ്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
