കാഠ്മണ്ഡു; ആകാശത്ത് ഒരൊറ്റ മഴമേഘം പോലുമില്ല, കാറ്റിൽ മഴയുടെ നനവുപോലുമില്ലായിരുന്നു. എന്നാൽ, കണ്ണടച്ചു തുറക്കുന്ന നേരം കൊണ്ട് നേപ്പാളിലെ റസുവ ജില്ലയെ ആകെ വിഴുങ്ങിക്കളഞ്ഞു ആ മലവെള്ളപ്പാച്ചിൽ. ഒന്നുമറിയാതെ ദൈനംദിന ജീവിത തിരക്കുകളിലായിരുന്ന മനുഷ്യരുടെ സ്വപ്നങ്ങളും വീടുകളും അതിർത്തിയിലെ വ്യാപാര പാതകളുമെല്ലാം നിമിഷനേരം കൊണ്ട് ഇല്ലാതായി. പ്രകൃതി അതിന്റെ ക്രൂരമായ മുഖം കാട്ടുമ്പോൾ, ഒരു മുന്നറിയിപ്പുപോലും നൽകാൻ മഴമേഘങ്ങൾ ഉണ്ടായിരുന്നില്ല എന്നത് ദുരന്തത്തിന്റെ വ്യാപ്തി വർദ്ധിപ്പിക്കുന്നു.
ഈ പെട്ടെന്നുള്ള കൂറ്റൻ പ്രളയത്തിന് കാരണം മഴയല്ല, മറിച്ച് ‘ഗ്ലോഫ്’ (GLOF – Glacial Lake Outburst Flood) അഥവാ ഹിമതടാക വിസ്ഫോടനമാണെന്നാണ് കാലാവസ്ഥാ വിദഗ്ധർ റിപ്പോർട്ട് ചെയ്യുന്നു.
റസുവയിൽ ശരിക്കും സംഭവിച്ചത് എന്ത്?
ബുധനാഴ്ച രാവിലെ എട്ടുമണിയോടെ റസുവ ജില്ലാ ആസ്ഥാനത്ത് മഴയുടെ ഒരു സൂചനപോലുമില്ലാതിരുന്ന സമയത്താണ് ഭോട്ടെകോഷി നദിയിൽ അപ്രതീക്ഷിതമായി ഭീകരമായ മലവെള്ളപ്പാച്ചിലുണ്ടായത്.
നാശനഷ്ടങ്ങൾ: ചൈനയുമായുള്ള പ്രധാന വ്യാപാര കേന്ദ്രമായ റസുവഗഡി, ടിമുറെ, സ്യാഫ്രുബെസി, ബെത്രാവതി എന്നീ പ്രദേശങ്ങൾ നിമിഷങ്ങൾക്കകം വെള്ളത്തിനടിയിലായി.
ഊർജ്ജ മേഖലയ്ക്ക് തിരിച്ചടി: 111 മെഗാവാട്ടിന്റെ റസുവഗഡി പദ്ധതി, ചിലിമെ, തൃശൂലി-3എ ഉൾപ്പെടെ പത്തിലധികം ജലവൈദ്യുത നിലയങ്ങളുടെ പ്രവർത്തനം തടങ്ങുകയും വൻ നാശനഷ്ടങ്ങൾ സംഭവിക്കുകയും ചെയ്തു.
ദുരന്തത്തിന് പിന്നിലെ ശാസ്ത്രീയ കാരണങ്ങൾ
ഹിമപാതം (Ice Avalanche): സമുദ്രനിരപ്പിൽ നിന്ന് 5,100 മീറ്റർ ഉയരത്തിൽ സ്ഥിതി ചെയ്യുന്ന ലെൻഡെ നദിയിലേക്ക് കൂറ്റൻ മഞ്ഞുമല ഇടഞ്ഞു വീണ് താഴ്വര അടഞ്ഞുപോവുകയും, അവിടെ താൽക്കാലികമായി രൂപപ്പെട്ട ഭീമൻ ജലസംഭരണി പെട്ടെന്ന് തകർന്നു താഴേക്ക് കുതിക്കുകയുമായിരുന്നുവെന്ന് കാഠ്മണ്ഡു സർവകലാശാലയിലെ പ്രൊഫ. റിജൻ ഭക്ത കായസ്ഥ വ്യക്തമാക്കുന്നു.
ALSO READ: ‘മനുഷ്യർ ഞെരുങ്ങി മരിക്കും’: സോഷ്യൽ മീഡിയയിൽ വീണ്ടും ചർച്ചയായി 1960-ലെ പ്രവചനം
ഭൂചലനം: പ്രളയത്തിന് തൊട്ടുമുമ്പ് തിബറ്റൻ മേഖലയിൽ രേഖപ്പെടുത്തിയ 4.4 തീവ്രതയുള്ള ഭൂചലനമാകാം മഞ്ഞുമല ഇടിയുന്നതിനും തടയണ തകരുന്നതിനും കാരണമായതെന്ന് നേപ്പാൾ ദുരന്തനിവാരണ അതോറിറ്റി വിലയിരുത്തുന്നു.
എന്താണ് ഈ ‘ഗ്ലോഫ്’ (GLOF)?
ഉയർന്ന മലനിരകളിലെ ഹിമാനികൾ ഉരുകുമ്പോൾ ഒഴുകിയെത്തുന്ന മണ്ണും പാറക്കല്ലുകളും അടിഞ്ഞുകൂടി സ്വാഭാവിക തടയണകൾ രൂപപ്പെടാറുണ്ട്. ഇവയിൽ വെള്ളം കെട്ടിക്കിടന്നുണ്ടാകുന്ന തടാകങ്ങളാണ് ഹിമതടാകങ്ങൾ. പാറയും മണ്ണും മഞ്ഞും മാത്രം ചേർന്നുള്ള ഈ തടയണകൾക്ക് കോൺക്രീറ്റ് ഡാമുകളുടെ ബലമുണ്ടാകില്ല. ആഗോളതാപനം കാരണം മഞ്ഞുരുകി തടാകത്തിലെ ജലനിരപ്പ് ഉയരുകയും, അതിനിടയിൽ ഭൂചലനമോ ഹിമപാതമോ ഉണ്ടാകുകയും ചെയ്യുമ്പോൾ ഈ ഭിത്തികൾ തകരുന്നു. തുടർന്ന് ലക്ഷക്കണക്കിന് ഘനമീറ്റർ വെള്ളവും കല്ലും ചെളിയും അതിവേഗത്തിൽ താഴേക്ക് കുതിച്ചെത്തുന്ന പ്രതിഭാസമാണ് ‘ഗ്ലോഫ്’.
അതിർത്തി കടന്നെത്തിയ ഭീതി: ബിഹാറിലും ജാഗ്രത
ഭോട്ടെകോഷിയിലെ ജലനിരപ്പ് മൂന്ന് മീറ്ററോളം ഉയർന്നതോടെ പ്രളയജലം തൃശൂലി നദിവഴി ബിഹാറിലെ ഗണ്ഡക് നദിയിലേക്കെത്തി. ഭീഷണി കണക്കിലെടുത്ത് വാത്മീകിനഗറിലെ ബാരേജിന്റെ മുഴുവൻ 36 ഷട്ടറുകളും ബിഹാർ സർക്കാർ തുറന്നു. ദുരന്തനിവാരണ സേന പ്രദേശത്ത് ക്യാമ്പ് ചെയ്ത് സ്ഥിതിഗതികൾ നിരീക്ഷിച്ചുവരികയാണ്.
പ്രകൃതിയെ നാം എത്രത്തോളം മുറിവേൽപ്പിക്കുന്നുവോ, അത്രത്തോളം ഭയാനകമായ തിരിച്ചടികളാവും നമ്മെ തേടിയെത്തുക എന്നതിന്റെ വ്യക്തമായ തെളിവാണ് ഈ ദുരന്തം. കാലാവസ്ഥാ വ്യതിയാനവും ആഗോളതാപനവും സൃഷ്ടിക്കുന്ന ഭീഷണികൾ വെറുമൊരു മുന്നറിയിപ്പല്ല, മറിച്ച് നമ്മുടെ തൊട്ടുമുന്നിൽ നിൽക്കുന്ന യാഥാർത്ഥ്യമാണെന്ന് റസുവയിലെ മിന്നൽ പ്രളയം നമ്മെ ഓർമ്മിപ്പിക്കുന്നു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
