ഓട്ടവ: കാനഡ റവന്യൂ ഏജൻസി (CRA) ഡിസെബിലിറ്റി ടാക്സ് ക്രെഡിറ്റ് അപേക്ഷാ പ്രക്രിയയിൽ വരുത്തിയ നിർണായക മാറ്റങ്ങൾ 2026 സെപ്റ്റംബർ 8 മുതൽ പ്രാബല്യത്തിൽ വരും. ഈ തീയതി മുതൽ 2023-ന് മുൻപുള്ള T2201 ഫോം പതിപ്പുകൾ ഉപയോഗിച്ച് സമർപ്പിക്കുന്ന പുതിയ DTC അപേക്ഷകൾ CRA പൂർണ്ണമായും നിരസിക്കും. സിആർഎയുടെ നിബന്ധന പാലിക്കാതെ പഴയ ഫോമിലാണ് അപേക്ഷ നൽകുന്നതെങ്കിൽ, അപേക്ഷ നിരസിക്കപ്പെടുകയും ഡോക്ടറെ കണ്ട് പുതിയ ഫോമിൽ വീണ്ടും വിവരങ്ങൾ പൂരിപ്പിച്ച് സമർപ്പിക്കേണ്ടി വരികയും ചെയ്യും. അപേക്ഷകളിലെ തെറ്റുകൾ ഒഴിവാക്കാനും പ്രോസസ്സിംഗ് വേഗത്തിലാക്കാനും വേണ്ടിയാണ് ഈ തീരുമാനം.
കഴിഞ്ഞ ജൂലൈ 14 മുതൽ പ്രാബല്യത്തിൽ വന്ന മറ്റൊരു പ്രധാന്യമുള്ള മാറ്റം, CRA My Account-ലെ ‘Submit Documents’ വിഭാം വഴിയുള്ള അപ്‌ലോഡുകൾക്ക് ഏർപ്പെടുത്തിയ നിയന്ത്രണമാണ്. ഇനി മുതൽ സ്വന്തം ഇഷ്ടപ്രകാരം പുതിയ അപേക്ഷകളോ രേഖകളോ ഈ പോർട്ടൽ വഴി അപ്‍ലോഡ് ചെയ്യാൻ കഴിയില്ല. നിങ്ങളുടെ അപേക്ഷയിൽ കൂടുതൽ വിവരങ്ങൾ ആവശ്യമുള്ള പക്ഷം CRA നേരിട്ട് ബന്ധപ്പെട്ട് നൽകുന്ന നിർദ്ദിഷ്ട കേസ് റഫറൻസ് നമ്പർ ഉണ്ടെങ്കിൽ മാത്രമേ ഈ പോർട്ടൽ ഉപയോഗിക്കാൻ സാധിക്കൂ.
അപേക്ഷകർക്ക് സിആർഎ നൽകുന്ന ഏറ്റവും മികച്ച നിർദ്ദേശം My Account വഴിയുള്ള ഓൺലൈൻ ഡിജിറ്റൽ ഫോം ഉപയോഗിക്കുക എന്നതാണ്. ഇത് അപേക്ഷ നിരസിക്കപ്പെടാനുള്ള സാധ്യത ഒഴിവാക്കുകയും വേഗത്തിൽ പ്രൊസസ്സ് ചെയ്യാൻ സഹായിക്കുകയും ചെയ്യും. തപാൽ വഴി അപേക്ഷിക്കാൻ ആഗ്രഹിക്കുന്നവർ canada.ca പോർട്ടലിൽ നിന്ന് ലഭ്യമാകുന്ന 2023 അല്ലെങ്കിൽ അതിനുശേഷമുള്ള പുതിയ പതിപ്പ് T2201 ഫോം മാത്രമേ ഉപയോഗിക്കാവൂ.
ഡിസെബിലിറ്റി ടാക്സ് ആനുകൂല്യങ്ങൾക്ക് പുറമെ കാനഡ ഡിസെബിലിറ്റി ബെനഫിറ്റ്, ചൈൽഡ് ഡിസെബിലിറ്റി ബെനഫിറ്റ്, രജിസ്റ്റേർഡ് ഡിസെബിലിറ്റി സേവിംഗ്സ് പ്ലാൻ തുടങ്ങിയ പ്രധാന ഫെഡറൽ സാമ്പത്തിക സഹായങ്ങൾ ലഭിക്കുന്നതിനും ഈ അംഗീകൃത DTC സർട്ടിഫിക്കറ്റ് നിർബന്ധമാണ്. പുതിയതായി കാനഡയിൽ എത്തിയവരും വർക്ക് പെർമിറ്റ് അല്ലെങ്കിൽ സ്റ്റുഡന്റ് വിസയിലുള്ളവരും 2025-ലെ ഇൻകം ടാക്സ് റിട്ടേൺ പൂർത്തിയാക്കുന്നതിനൊപ്പം ഈ ഡിസെബിലിറ്റി നിബന്ധനകൾ കൃത്യമായി പാലിക്കുന്നുണ്ടെന്ന് ഉറപ്പാക്കേണ്ടതുണ്ട്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
