കാട്ടുതീ മുന്നറിയിപ്പിൽ വീഴ്ചയോ?; ഒന്റാറിയോ സർക്കാരിനെതിരെ അന്വേഷണം ആവശ്യപ്പെട്ട് ഫസ്റ്റ് നേഷൻസ്

ഒന്റാറിയോ; ഒന്റാറിയോയുടെ വടക്കുപടിഞ്ഞാറൻ മേഖലയിൽ ഈ വർഷം ഉണ്ടായ ചരിത്രത്തിലെ ഏറ്റവും രൂക്ഷമായ കാട്ടുതീ ദുരന്തം കൈകാര്യം ചെയ്ത രീതിയിൽ പ്രവിശ്യാ സർക്കാരിന് ഗുരുതരമായ വീഴ്ചകളുണ്ടായെന്ന് ആരോപിച്ച് ഫസ്റ്റ് നേഷൻസ് നേതാക്കൾ പൊതുഅന്വേഷണം ആവശ്യപ്പെട്ടു. എന്നാൽ സംഭവത്തെക്കുറിച്ച് പൊതുഅന്വേഷണം നടത്തുമെന്ന കാര്യത്തിൽ വ്യക്തമായ ഉറപ്പ് നൽകാൻ പ്രീമിയർ ഡഗ് ഫോർഡിന്റെ സർക്കാർ തയ്യാറായിട്ടില്ല. സംഭവശേഷം സർക്കാർ നടത്തുന്ന വിശദമായ വിലയിരുത്തൽ റിപ്പോർട്ടും പൊതുജനങ്ങൾക്ക് പുറത്തുവിടുമോ എന്ന കാര്യത്തിലും വ്യക്തതയില്ല. ഫസ്റ്റ് നേഷൻസ് സമൂഹങ്ങളുടെ ആരോപണമനുസരിച്ച് അതിവേഗം വ്യാപിച്ച നിരവധി കാട്ടുതീകളെക്കുറിച്ച് മുൻകൂട്ടി മുന്നറിയിപ്പ് ലഭിച്ചിരുന്നില്ല.

പ്രവിശ്യാ സർക്കാരുമായുള്ള ആശയവിനിമയം വളരെ മോശമായിരുന്നുവെന്നും ചില സാഹചര്യങ്ങളിൽ അത് പൂർണമായും ഇല്ലാതിരുന്നുവെന്നും നേതാക്കൾ ആരോപിച്ചു. ഈ തീപിടിത്തത്തിൽ രണ്ട് ഫസ്റ്റ് നേഷൻസ് സമൂഹങ്ങൾ തകർന്നടിഞ്ഞു. പ്രീമിയർ ഡഗ് ഫോർഡ്, പ്രകൃതി വിഭവ മന്ത്രി മൈക്ക് ഹാരിസ്, അടിയന്തര തയ്യാറെടുപ്പ് മന്ത്രി ജിൽ ഡൺലോപ്പ്, തദ്ദേശീയ കാര്യ മന്ത്രി ഗ്രെഗ് റിക്ക്ഫോർഡ് എന്നിവർക്ക് മുന്നിൽ പലതവണ ചോദ്യങ്ങൾ ഉന്നയിച്ചിട്ടും തൃപ്തികരമായ മറുപടി ലഭിച്ചില്ലെന്നാണ് നേതാക്കൾ പറഞ്ഞത്.

അതേസമയം, കാട്ടുതീ സ്ഥിതിഗതികളെക്കുറിച്ചുള്ള മാധ്യമസമ്മേളനത്തിൽ പൊതുഅന്വേഷണത്തെക്കുറിച്ചുള്ള ചോദ്യങ്ങൾക്ക് മന്ത്രി മൈക്ക് ഹാരിസ് നേരിട്ട് മറുപടി നൽകിയില്ല. എല്ലാ വർഷവും ചെയ്യുന്നതുപോലെ ഇത്തവണയും സർക്കാർ ആഭ്യന്തര അവലോകനം നടത്തുമെന്നും, അതിൽ നിന്ന് നിരവധി ശുപാർശകൾ ഉണ്ടാകുമെന്നും അദ്ദേഹം പറഞ്ഞു. എന്നാൽ ആ റിപ്പോർട്ട് പൊതുജനങ്ങൾക്ക് ലഭ്യമാകുമോയെന്ന കാര്യത്തിൽ അദ്ദേഹം ഉറപ്പ് നൽകിയില്ല.

കഴിഞ്ഞ രണ്ടാഴ്ചയ്ക്കിടെ 80-ലധികം കാട്ടുതീകൾ നിയന്ത്രണത്തിലായതായി മന്ത്രി അറിയിച്ചു. എന്നിരുന്നാലും ഒന്റാറിയോയിൽ ഇപ്പോഴും 159 കാട്ടുതീകൾ തുടരുകയാണ്. ഇതിൽ 30 എണ്ണം നിയന്ത്രണാതീതമായ നിലയിലാണ്. കഴിഞ്ഞ രണ്ടാഴ്ചകളിലുണ്ടായ കാട്ടുതീയുടെ തീവ്രത ഇതുവരെ കാണാത്തതാണെന്നും, എന്നാൽ മഴയും തണുത്ത കാലാവസ്ഥയും വന്നതോടെ സ്ഥിതി ക്രമേണ നിയന്ത്രണത്തിലാകുകയാണെന്നും അദ്ദേഹം പറഞ്ഞു. വടക്കുപടിഞ്ഞാറൻ മേഖല കഴിഞ്ഞ ഏതാനും വർഷങ്ങളായി കൂടുതൽ വരണ്ടതും ഉയർന്ന താപനില അനുഭവിക്കുന്നതുമാണ് ഇത്തരം സാഹചര്യങ്ങൾക്ക് കാരണമായിരിക്കാമെന്നും അദ്ദേഹം വിലയിരുത്തി.

ഈ വർഷത്തെ സാഹചര്യം അപൂർവ സംഭവമായി തന്നെ തുടരട്ടെയെന്നാണ് പ്രതീക്ഷയെന്നും മന്ത്രി കൂട്ടിച്ചേർത്തു. എന്നാൽ സർക്കാർ സ്വന്തം വീഴ്ചകൾ മറച്ചുവെക്കാൻ ശ്രമിക്കുകയാണെന്നാണ് ഫസ്റ്റ് നേഷൻസ് നേതാക്കളുടെ വിമർശനം. അതുകൊണ്ടുതന്നെ സ്വതന്ത്രമായ പൊതുഅന്വേഷണം അനിവാര്യമാണെന്ന് മിഷ്കീഗോഗമാങ് ഒജിബ്‌വേ നേഷന്റെ ചീഫ് മെർൽ ലൂൺ പറഞ്ഞു. ഉത്തരം ലഭിക്കേണ്ട നിരവധി ചോദ്യങ്ങൾ ഇപ്പോഴും ബാക്കിയുണ്ടെന്ന് വടക്കൻ ഒന്റാറിയോയിലെ 49 ഫസ്റ്റ് നേഷൻസ് സമൂഹങ്ങളെ പ്രതിനിധീകരിക്കുന്ന നിഷ്നാവ്‌ബെ ആസ്കി നേഷന്റെ ഡെപ്യൂട്ടി ഗ്രാൻഡ് ചീഫ് മൈക്ക് മെറ്റാറ്റാവാബിൻ വ്യക്തമാക്കി.

കാട്ടുതീയിൽ വലിയ നാശനഷ്ടമുണ്ടായ വൈറ്റ്വാട്ടർ ഫസ്റ്റ് നേഷൻസിന്റെ ചീഫ് പോളിൻ ഡ്രേക്ക് ദുരന്തത്തിന്റെ അനുഭവം വിശദീകരിച്ചു. ജൂലൈ 8-ന് ബുഷ് പൈലറ്റുമാർ കാട്ടുതീ കണ്ടതായി അറിയിച്ചെങ്കിലും, അതിനുശേഷം ഒരാഴ്ചത്തോളം പ്രവിശ്യാ സർക്കാരിൽ നിന്ന് യാതൊരു മുന്നറിയിപ്പും ലഭിച്ചില്ലെന്ന് അവർ പറഞ്ഞു. പൈലറ്റുമാരുടെ സഹായത്തോടെയാണ് ഗ്രാമം ഒഴിപ്പിക്കാനുള്ള തയ്യാറെടുപ്പുകൾ തുടങ്ങിയത്.

ഒടുവിൽ ജൂലൈ 15-നാണ് സർക്കാർ ബന്ധപ്പെടുകയും അന്നുതന്നെ എല്ലാവരെയും അടിയന്തരമായി ഒഴിപ്പിക്കാൻ നിർദേശിക്കുകയും ചെയ്തത്. എന്നാൽ അതിന് മുമ്പേ ഒഴിപ്പിക്കാനുള്ള വിമാന ക്രമീകരണം നടത്തിയിരുന്നതിനാൽ എല്ലാവരെയും സുരക്ഷിതമായി പുറത്തേക്ക് മാറ്റാനായെന്നും അവർ പറഞ്ഞു. ഗ്രാമത്തിലെ എല്ലാവരും രക്ഷപ്പെട്ടെങ്കിലും തീപിടിത്തത്തിൽ സമൂഹത്തിന്റെ ഭൂരിഭാഗവും നശിച്ചു.

വീണ്ടും എല്ലാം പുനർനിർമിക്കാമെങ്കിലും അതിന് പതിറ്റാണ്ടുകൾ വേണ്ടിവരുമെന്ന് പോളിൻ ഡ്രേക്ക് പറഞ്ഞു. മുമ്പ് അവിടത്തെ സൗകര്യങ്ങൾ വികസിപ്പിക്കാൻ 30 വർഷത്തിലധികം എടുത്തിരുന്നു. ഫ്ലോട്ട് വിമാനങ്ങൾ വഴിമാത്രം എത്തിച്ചേരാൻ കഴിയുന്ന വിദൂര പ്രദേശമായതിനാൽ നിർമ്മാണ സാമഗ്രികളും ഉപകരണങ്ങളും എത്തിക്കുന്നത് വലിയ വെല്ലുവിളിയാണെന്നും അവർ ചൂണ്ടിക്കാട്ടി.

കാട്ടുതീയെ തുടർന്ന് ഒഴിപ്പിക്കേണ്ടിവന്ന മറ്റൊരു സമൂഹമായ കാറ്റ് ലേക്ക് ഫസ്റ്റ് നേഷൻസിന്റെ ചീഫ് റസ്സൽ വെസ്‌ലി, ഫസ്റ്റ് നേഷൻസ് നേതൃത്വത്തിലുള്ള പ്രത്യേക കാട്ടുതീ നിയന്ത്രണ അതോറിറ്റി രൂപീകരിക്കണമെന്ന് ആവശ്യപ്പെട്ടു. ഫെഡറൽ, പ്രവിശ്യാ ഏജൻസികളോടൊപ്പം ഫസ്റ്റ് നേഷൻസിനും തീരുമാനമെടുക്കുന്നതിൽ പങ്കാളിത്തം നൽകണമെന്നാണ് അദ്ദേഹത്തിന്റെ നിർദേശം. ഒഴിപ്പിക്കൽ പദ്ധതികൾ കൂടുതൽ കാര്യക്ഷമമാക്കുക, ആശയവിനിമയം മെച്ചപ്പെടുത്തുക, വർഷങ്ങളോളം ഉറപ്പുള്ള ധനസഹായം നൽകുക എന്നിവയും അദ്ദേഹം ആവശ്യപ്പെട്ടു.

നിലവിൽ ഏകദേശം 150 മില്യൺ ഡോളറാണ് പ്രവിശ്യ ബജറ്റിൽ വകയിരുത്തുന്നത്. എന്നാൽ കാട്ടുതീ സീസൺ അവസാനിക്കുമ്പോഴേക്കും അതിലധികം ചെലവാകാറുണ്ടെന്നും അദ്ദേഹം ചൂണ്ടിക്കാട്ടി. നിയന്ത്രിത രീതിയിലുള്ള മുൻകൂട്ടി തീകൊളുത്തൽ ഉൾപ്പെടെയുള്ള തദ്ദേശീയ വനസംരക്ഷണ രീതികളും പ്രവിശ്യയുടെ കാട്ടുതീ പ്രതിരോധ പദ്ധതിയുടെ ഭാഗമാക്കണമെന്നും അദ്ദേഹം നിർദേശിച്ചു.

ഈ വർഷത്തെ കാട്ടുതീ കാരണം പ്രധാനമായും ഫസ്റ്റ് നേഷൻസ് സമൂഹങ്ങളിൽ നിന്നുള്ള ആയിരക്കണക്കിന് ആളുകൾ വീടുകൾ വിട്ടൊഴിയേണ്ടിവന്നു. തീയിൽ നിന്നുയർന്ന പുക തെക്കൻ ഒന്റാറിയോയ്ക്കും അമേരിക്കയിലെ ചില പ്രദേശങ്ങളിലേക്കും വ്യാപിച്ചു. ഈ സീസണിൽ ഒന്റാറിയോയിലെ വനമേഖലയിൽ ഇതുവരെ രേഖപ്പെടുത്തിയതിൽ ഏറ്റവും വലിയ നാശനഷ്ടമാണ് സംഭവിച്ചിട്ടുള്ളതെന്നാണ് പ്രാഥമിക കണക്കുകൾ സൂചിപ്പിക്കുന്നത്.

നിലവിൽ 150-ലധികം ഒന്റാറിയോ അഗ്നിശമന സേനാംഗങ്ങൾ കാട്ടുതീ നിയന്ത്രണ പ്രവർത്തനങ്ങളിൽ ഏർപ്പെട്ടിരിക്കുകയാണെന്ന് മന്ത്രി മൈക്ക് ഹാരിസ് അറിയിച്ചു. പ്രിൻസ് എഡ്വേഡ് ഐലൻഡിൽ നിന്നുള്ള സംഘങ്ങളും ഈ ആഴ്ച മെക്സിക്കോയിൽ നിന്നെത്തിയ നൂറിലധികം അഗ്നിശമന സേനാംഗങ്ങളും രക്ഷാപ്രവർത്തനങ്ങളിൽ പങ്കുചേർന്നിട്ടുണ്ട്. മഴയും തണുത്ത കാലാവസ്ഥയും തീ നിയന്ത്രിക്കാൻ സഹായകമായതായും അദ്ദേഹം പറഞ്ഞു. വ്യാഴാഴ്ചയും സർക്കാർ സ്വീകരിച്ച നടപടികളെ അദ്ദേഹം പ്രതിരോധിച്ചു. ഒന്റാറിയോയിലെ ജനങ്ങളെ സംരക്ഷിക്കാൻ ആവശ്യമായ ചെലവിൽ യാതൊരു കുറവും വരുത്തിയിട്ടില്ലെന്നും, ഇതുവരെ കാട്ടുതീയിൽ മനുഷ്യജീവൻ നഷ്ടമായിട്ടില്ലെന്നതാണ് ഏറ്റവും പ്രധാനപ്പെട്ട കാര്യമെന്നും മന്ത്രി പറഞ്ഞു.

Lapse in wildfire warning? First Nations demand inquiry into Ontario government.

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt