ബിസി: വിക്ടോറിയ സ്വദേശിയും ടിക്ടോകിലൂടെ ചെറുപ്പത്തിൽ തന്നെ അൽഷൈമേഴ്സ് രോഗം ബാധിച്ച അനുഭവങ്ങൾ തുറന്നുപറഞ്ഞ് ശ്രദ്ധ നേടിയ സോഷ്യൽ മീഡിയ താരവുമായ റെബേക്ക ലൂണ (49) അന്തരിച്ചു. മെഡിക്കൽ അസിസ്റ്റൻസ് ഇൻ ഡൈയിംഗ് (MAID) നിയമപ്രകാരമാണ് ശനിയാഴ്ച ഉച്ചയ്ക്ക് അവർ ജീവിതം അവസാനിപ്പിച്ചത്. കുടുംബാംഗങ്ങൾ ആരംഭിച്ച ഗോഫണ്ട്മി പേജിലെ അറിയിപ്പിൽ, പ്രിയപ്പെട്ടവരുടെ സാന്നിധ്യത്തിൽ സമാധാനപരമായാണ് റെബേക്ക വിടവാങ്ങിയതെന്ന് വ്യക്തമാക്കി. ജീവിതാവസാനവുമായി ബന്ധപ്പെട്ട ചെലവുകൾക്കായാണ് കുടുംബം ധനസമാഹരണ ക്യാമ്പയിൻ ആരംഭിച്ചിരുന്നത്.
മരണത്തിന് ദിവസങ്ങൾ മുമ്പ്, താൻ നിശ്ചയിച്ചിരുന്ന MAID നടപടിയുടെ തീയതി നേരത്തേയാക്കാൻ തീരുമാനിച്ചതായി റെബേക്ക തന്റെ 95,000-ത്തിലധികം സോഷ്യൽ മീഡിയ അനുയായികളെ അറിയിച്ചിരുന്നു. നിലവിലെ ശാരീരികാവസ്ഥയിൽ ഓരോ ദിവസവും ഏറെ ബുദ്ധിമുട്ടോടെയാണ് കഴിയുന്നതെന്നും ഇനി രണ്ടാഴ്ച കൂടി കാത്തിരിക്കാൻ കഴിയില്ലെന്ന് തോന്നിയതിനാലാണ് തീരുമാനം മാറ്റിയതെന്നും അവർ വീഡിയോയിലൂടെ വിശദീകരിച്ചു.
പാലിയേറ്റീവ് കെയർ ഡോക്ടറുമായുള്ള കൂടിക്കാഴ്ചയ്ക്കിടെയാണ് ഈ തീരുമാനം കൂടുതൽ ഉറപ്പിച്ചതെന്ന് റെബേക്ക പറഞ്ഞു. ജീവിതവുമായി ബന്ധപ്പെട്ട ഈ നിർണായക തീരുമാനത്തിൽ സ്വന്തം ആഗ്രഹത്തിനും മുൻഗണന നൽകണമെന്ന് ഡോക്ടർ ആവർത്തിച്ച് ഓർമിപ്പിച്ചിരുന്നുവെന്നും, “തീരുമാനം പൂർണമായും നിന്റേതാണെങ്കിൽ എപ്പോൾ പോകാൻ ആഗ്രഹിക്കും?” എന്ന ചോദ്യത്തിന് “ഇപ്പോൾ തന്നെ” എന്നായിരുന്നു തന്റെ മറുപടിയെന്നും അവർ വെളിപ്പെടുത്തി.
‘WhereDidBecsGo’ എന്ന ടിക്ടോക് അക്കൗണ്ടിലൂടെയാണ് റെബേക്ക ശ്രദ്ധ നേടിയത്. ചെറുപ്പത്തിൽ അൽഷൈമേഴ്സ് സ്ഥിരീകരിച്ചതിനെ തുടർന്നുണ്ടായ ജീവിതമാറ്റങ്ങൾ, രോഗം സൃഷ്ടിച്ച വെല്ലുവിളികൾ, ബന്ധങ്ങൾ, യാത്രകൾ തുടങ്ങിയ അനുഭവങ്ങൾ അവർ മടിയില്ലാതെ പങ്കുവെച്ചിരുന്നു. “മരണം അടുത്തുനിൽക്കുമ്പോഴുള്ള പ്രണയം”, “കാണാൻ കഴിയാത്ത വൈകല്യങ്ങളുമായി യാത്ര” തുടങ്ങിയ വിഷയങ്ങളിലെ വീഡിയോകളും വലിയ ശ്രദ്ധ നേടിയിരുന്നു.
അൽക്കഹോൾ ഉപയോഗം അവസാനിപ്പിച്ച ശേഷമുള്ള ജീവിതത്തെക്കുറിച്ചും റെബേക്ക തുറന്നുപറഞ്ഞിരുന്നു. ജീവിതത്തിന്റെ അവസാന മാസങ്ങളിൽ ശാരീരികമായും മാനസികമായും കടുത്ത വെല്ലുവിളികൾ നേരിട്ടിട്ടും മദ്യപാനത്തിലേക്ക് മടങ്ങിപ്പോകാതിരുന്നതിൽ തനിക്ക് അഭിമാനമുണ്ടെന്ന് അവർ പറഞ്ഞിരുന്നു. അവസാനമായി പങ്കുവെച്ച വീഡിയോയിൽ, 50 വയസ് തികയുന്നതിന് മുമ്പ് മരിക്കേണ്ടി വരുമെന്ന് ഒരിക്കലും ആഗ്രഹിച്ചിരുന്നില്ലെങ്കിലും, തനിക്ക് നല്ലൊരു ജീവിതം ലഭിച്ചുവെന്ന് റെബേക്ക പറഞ്ഞു.
അതോടൊപ്പം, സ്വയം സ്നേഹിക്കാൻ പഠിക്കണമെന്ന് അനുയായികളോട് അവർ ആഹ്വാനം ചെയ്തു. വർഷങ്ങളായുള്ള ചികിത്സയിലൂടെയാണ് താനും അതു പഠിച്ചതെന്നും, സ്വയം സ്നേഹിക്കണമെങ്കിൽ ആദ്യം സ്വന്തം മനസ്സിനോട് നല്ല രീതിയിൽ സംസാരിക്കാൻ തുടങ്ങണമെന്നും അവർ ഉപദേശിച്ചു. “എനിക്ക് അതിന് കഴിഞ്ഞെങ്കിൽ നിങ്ങൾക്കും തീർച്ചയായും കഴിയും,” എന്ന സന്ദേശത്തോടെയാണ് റെബേക്കയുടെ അവസാന പൊതുസന്ദേശം അവസാനിച്ചത്.
Canadian TikTok star who shared experiences of living with Alzheimer's is no more.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
