ഓട്ടവ : കാനഡയിൽനിന്ന് വേർപിരിയുന്നതിനെതിരായ അഭിപ്രായങ്ങൾ ശക്തമാകുന്നതായി പുതിയ സർവേ ഫലം. ഒക്ടോബർ 19ന് നടക്കാനിരിക്കുന്ന റഫറണ്ടത്തിന് മുന്നോടിയായി ജാനറ്റ് ബ്രൗൺ ഒപ്പീനിയൻ റിസർച്ച് നടത്തിയ പുതിയ അഭിപ്രായ സർവേയിലാണ് ആൽബർട്ടയുടെ സ്വാതന്ത്ര്യവാദത്തിനുള്ള പിന്തുണ കുറയുന്നതായി വ്യക്തമായത്. കാനഡയിൽ തുടരണമെന്ന് 72 ശതമാനം പേർ അഭിപ്രായപ്പെട്ടപ്പോൾ, വേർപിരിയൽ നടപടികൾ ആരംഭിക്കണമെന്ന് ആവശ്യപ്പെട്ടത് 23 ശതമാനം പേർ മാത്രമാണ്. നാല് ശതമാനം പേർ നിലപാട് വ്യക്തമാക്കിയിട്ടില്ല.
കഴിഞ്ഞ വർഷം ഏപ്രിലിൽ നടത്തിയ സമാനമായ സർവേയിൽ 27 ശതമാനം പേർ വേർപിരിയലിനെ അനുകൂലിച്ചിരുന്നു. കാനഡയുമായുള്ള ആൽബർട്ടയുടെ ബന്ധത്തിൽ ജനങ്ങൾ കൂടുതൽ സംതൃപ്തരാണെന്നും, ഓട്ടവയുമായും പ്രധാനമന്ത്രി മാർക്ക് കാർണിയുമായും ഉള്ള സൗഹൃദ അന്തരീക്ഷം അനുകൂലമായ മാറ്റത്തിന് വഴിയൊരുക്കിയതായും സർവേ വ്യക്തമാക്കുന്നു. കാനഡ-അമേരിക്ക വ്യാപാര യുദ്ധവും യു.എസ്. പ്രസിഡന്റ് ഡൊണാൾഡ് ട്രംപുമായുള്ള നയപരമായ തർക്കങ്ങളും കാനഡയോടുള്ള ആൽബർട്ടക്കാരുടെ ദേശീയ ഐക്യബോധം കൂടുതൽ ശക്തിപ്പെടുത്തിയിട്ടുണ്ട്.
സർവേയിൽ പങ്കെടുത്തവരിൽ കാനഡയോട് കൂടുതൽ അടുപ്പം തോന്നുന്നുവെന്ന് പ്രതികരിച്ചവരുടെ ശതമാനം ഏപ്രിലിലെ 34ൽ നിന്ന് 40 ആയി ഉയർന്നു. ആൽബർട്ടയോട് മാത്രം പ്രത്യേക മമതയുള്ളവർ 33 ശതമാനത്തിൽ നിന്ന് 23 ശതമാനമായി കുറയുകയും ചെയ്തു. പ്രവിശ്യയിലെ വലിയ നഗരങ്ങളിൽ കാനഡയിൽ തുടരണമെന്ന അഭിപ്രായത്തിന് 74 ശതമാനം പിന്തുണ ലഭിച്ചു. ചെറിയ നഗരങ്ങളിലും ഗ്രാമപ്രദേശങ്ങളിലും ഇത് 69 ശതമാനമാണ്.
രാഷ്ട്രീയ പാർട്ടികളുടെ അടിസ്ഥാനത്തിലും വോട്ടർമാരുടെ നിലപാടുകളിൽ പ്രകടമായ വ്യത്യാസമുണ്ട്. എൻ.ഡി.പി. വോട്ടർമാരിൽ ഭൂരിഭാഗവും കാനഡയിൽ തുടരുന്നതിനെ അനുകൂലിക്കുമ്പോൾ, ഭരണകക്ഷിയായ യുണൈറ്റഡ് കൺസർവേറ്റീവ് പാർട്ടി (യു.സി.പി.) വോട്ടർമാരിൽ 53 ശതമാനവും വേർപിരിയലിനെ അനുകൂലിക്കുന്നവരാണ്. പ്രീമിയർ ഡാനിയൽ സ്മിത്ത് കാനഡയിൽ തുടരുന്നതിനെ അനുകൂലിക്കുമ്പോൾ, സ്വന്തം പാർട്ടിയിലെ ഭൂരിഭാഗം പിന്തുണക്കാരും വിഭജനപക്ഷത്താണെന്നത് രാഷ്ട്രീയമായി വലിയ വെല്ലുവിളിയാണ് ഉയർത്തുന്നത്.
Also Read : അമേരിക്കൻ ആക്രമണ സാധ്യത മുൻകൂട്ടി പരിശോധിച്ചിരുന്നെന്ന് കാർണി; പ്രതിരോധ പദ്ധതികൾ പരിഷ്കരിക്കാൻ സാധ്യത
റഫറണ്ടം ദിവസം അടുത്തെത്തിയതോടെ ഇരു വിഭാഗങ്ങളും വോട്ടർമാരെ സ്വാധീനിക്കാനുള്ള തീവ്രശ്രമത്തിലാണ്. ഭൂരിഭാഗം പേരുടെയും നിലപാടുകൾ ഇതിനകം ഉറച്ചുകഴിഞ്ഞതിനാൽ, അവസാന ആഴ്ചകളിൽ വോട്ടർമാരെ പോളിങ് ബൂത്തിലേക്ക് എത്തിക്കാനുള്ള പ്രവർത്തനങ്ങൾക്കാണ് ഇരുപക്ഷവും മുൻഗണന നൽകുന്നത്. റഫറണ്ടത്തിന്റെ ഫലം പ്രവിശ്യയുടെ രാഷ്ട്രീയ ഭാവിയിൽ നിർണായകമാകും.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
