വിന്നിപെഗ്: പ്രായപൂർത്തിയാകാത്ത പെൺകുട്ടിയാണെന്ന് തെറ്റിദ്ധരിച്ച് സോഷ്യൽ മീഡിയയിലൂടെ അശ്ലീല സന്ദേശങ്ങളും ചിത്രങ്ങളും അയച്ച മാനിറ്റോബയിലുള്ള അധ്യാപകന്റെ ലൈസൻസ് റദ്ദാക്കി. മൗണ്ടൻ വ്യൂ സ്കൂൾ ഡിവിഷനിലെ അധ്യാപകനായ ജോഷ്വ വില്യം ബ്രാക്സ്മയ്ക്കെതിരെയാണ് ‘കമ്മീഷണർ ഓഫ് ടീച്ചർ പ്രൊഫഷണൽ കണ്ടക്ട്’ കർശന നടപടി സ്വീകരിച്ചത്. കുട്ടികൾക്കെതിരെയുള്ള ലൈംഗിക ചൂഷണം തടയുന്നതിന്റെ ഭാഗമായി യു.എസ് പൊലീസ് നടത്തിയ രഹസ്യ അന്വേഷണത്തിലാണ് (അണ്ടർകവർ ഓപ്പറേഷൻ) സംഭവത്തിന്റെ വിവരങ്ങൾ പുറത്തുവന്നത്.
മിനസോട്ടയിലെ ഒവാട്ടോണ പൊലീസ് ഡിപ്പാർട്ട്മെന്റിലെ ഇൻവെസ്റ്റിഗേഷൻ ഉദ്യോഗസ്ഥൻ വ്യാജ സോഷ്യൽ മീഡിയ അക്കൗണ്ട് വഴിയാണ് അധ്യാപകനുമായി ബന്ധപ്പെട്ടത്. 15 വയസ്സുള്ള പെൺകുട്ടിയെന്ന വ്യാജേനയുള്ള അക്കൗണ്ടിലേക്ക് ബ്രാക്സ്മ അശ്ലീല സന്ദേശങ്ങളും ചിത്രങ്ങളും അയക്കുകയായിരുന്നു. തുടർന്ന് ഫേഷ്യൽ റെക്കഗ്നിഷൻ സാങ്കേതികവിദ്യ ഉപയോഗിച്ച് നടത്തിയ പരിശോധനയിലാണ് സന്ദേശങ്ങൾ അയച്ചത് ബ്രാക്സ്മയാണെന്ന് തിരിച്ചറിഞ്ഞതും സ്കൂൾ അധികൃതർക്ക് റിപ്പോർട്ട് കൈമാറിയതും.
സംഭവത്തെ തുടർന്ന് സെപ്റ്റംബറിൽ സ്കൂൾ അധികൃതർ ഇയാളെ ചോദ്യം ചെയ്തെങ്കിലും കൂടുതൽ വിവരങ്ങൾ വെളിപ്പെടുത്താൻ ഇയാൾ തയ്യാറായില്ല. വിദ്യാർത്ഥികളുടെ സുരക്ഷ മുൻനിർത്തിയും സമൂഹത്തിന് അധ്യാപന മേഖലയിലുള്ള വിശ്വാസ്യത നിലനിർത്താനുമാണ് ലൈസൻസ് റദ്ദാക്കുന്നതെന്ന് അന്വേഷണ സമിതി വ്യക്തമാക്കി. 2012 മുതൽ അധ്യാപന രംഗത്തുള്ള ബ്രാക്സ്മയെ നിലവിൽ സ്കൂൾ ചുമതലകളിൽ നിന്ന് നീക്കം ചെയ്തിട്ടുണ്ട്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
Manitoba teacher ensnared in US police undercover operation after sending obscene messages thinking the recipient was a 15-year-old girl.
