ഒന്റാരിയോ; അമേരിക്കൻ പ്രസിഡന്റ് ഡൊണാൾഡ് ട്രംപ് കാനഡൻ ഉൽപ്പന്നങ്ങൾക്ക് 50 ശതമാനം അധിക തീരുവ ചുമത്തുമെന്ന് പ്രഖ്യാപിച്ചതോടെ, ഫെഡറൽ സർക്കാരിന്റെ വ്യാപാര ചർച്ചകൾക്ക് പൂർണ പിന്തുണ പ്രഖ്യാപിച്ച് കാനഡയിലെ പ്രവിശ്യാ നേതാക്കൾ. ചാർലറ്റ്ടൗണിൽ നടന്ന കൗൺസിൽ ഓഫ് ദ ഫെഡറേഷൻ (Council of the Federation) സമ്മേളനത്തിൽ പങ്കെടുത്ത പ്രീമിയർമാർ, വാഷിങ്ടണുമായുള്ള ചർച്ചകളിൽ ഒറ്റക്കെട്ടായി നിൽക്കുമെന്ന് വ്യക്തമാക്കി.
അതേസമയം, അടുത്ത ഏതാനും ആഴ്ചകൾക്കുള്ളിൽ വ്യാപാര കരാർ സാധ്യമാകുമെന്ന പ്രതീക്ഷ ചില നേതാക്കൾ പ്രകടിപ്പിച്ചപ്പോൾ, അതിൽ പൂർണ ആത്മവിശ്വാസമില്ലെന്ന നിലപാടും ചിലർ മുന്നോട്ടുവച്ചു. അമേരിക്കയുടെ പുതിയ നടപടി കാനഡയുടെ വ്യാപാരനയങ്ങളോടുള്ള പ്രതികരണവും വാഹന, പാൽ ഉൽപ്പന്ന, മദ്യ മേഖലകളിലെ വിവേചനപരമായ സമീപനവുമാണെന്ന് യു.എസ്. ഭരണകൂടം വിശദീകരിച്ചു.
സസ്കാച്ചെവാൻ പ്രീമിയർ സ്കോട്ട് മോയുടെ അഭിപ്രായത്തിൽ, ഹ്രസ്വകാലത്തിനുള്ളിൽ ധാരണയിലെത്താൻ സാധ്യതയുണ്ടെങ്കിലും അതിൽ ഉറപ്പില്ല. എന്നിരുന്നാലും, ചർച്ചകൾ നടത്തുന്ന ഫെഡറൽ സർക്കാരിന് പ്രവിശ്യകൾ ആവശ്യമായ വിവരങ്ങളും പിന്തുണയും നൽകുമെന്നും അദ്ദേഹം പറഞ്ഞു. വ്യാഴാഴ്ച ചാർലറ്റ്ടൗണിൽ പ്രവിശ്യാ നേതാക്കളുമായി കൂടിക്കാഴ്ച നടത്തുന്ന പ്രധാനമന്ത്രി മാർക്ക് കാർണി, അടുത്ത 28 ദിവസത്തിനുള്ളിൽ വ്യാപാര ചർച്ചകൾ കൂടുതൽ ശക്തമാക്കുമെന്ന് നേരത്തേ അറിയിച്ചിരുന്നു.
അതേസമയം, യു.എസ്. ട്രേഡ് പ്രതിനിധി ജെയ്മിസൺ ഗ്രീർ, കാനഡയുമായും മെക്സിക്കോയുമായും ഈ വർഷം ഇടക്കാല വ്യാപാര ധാരണകൾ പ്രതീക്ഷിക്കുന്നുണ്ടെങ്കിലും, യുഎസ്എംസിഎ (USMCA) കരാറിലെ പ്രധാന തർക്കവിഷയങ്ങൾ അടുത്ത വർഷം മാത്രമേ പരിഗണിക്കാനിടയുള്ളുവെന്ന് സൂചിപ്പിച്ചു. ആൽബർട്ട പ്രീമിയർ ഡാനിയേൽ സ്മിത്ത്, ഈ മാസം അവസാനിക്കും മുമ്പ് തന്നെ ഒരു ധാരണയിലെത്താൻ കഴിയുമെന്ന പ്രതീക്ഷ പ്രകടിപ്പിച്ചു.
ട്രംപിന്റെ പുതിയ തീരുവ പ്രഖ്യാപനത്തെ തുടർന്ന് പ്രവിശ്യാ നേതാക്കൾ ഒരുമിച്ചെങ്കിലും, അമേരിക്കയിലേക്ക് കാനഡയിൽ നിന്ന് പോകുന്ന ഊർജ കയറ്റുമതി സമ്മർദായുധമായി ഉപയോഗിക്കണോ എന്ന വിഷയത്തിൽ അഭിപ്രായഭിന്നത ഉയർന്നു. ഒന്റാറിയോ പ്രീമിയർ ഡഗ് ഫോർഡ്, പൊട്ടാഷ്, എണ്ണ തുടങ്ങിയ കയറ്റുമതികൾ നിയന്ത്രിക്കുന്നത് അമേരിക്കയെ സമ്മർദത്തിലാക്കാൻ സഹായിക്കുമെന്ന നിലപാട് സ്വീകരിച്ചു.
ബ്രിട്ടീഷ് കൊളംബിയ പ്രീമിയർ ഡേവിഡ് എബി, ധാതുക്കളുടെയും ഖനിജങ്ങളുടെയും ലഭ്യത പുനഃപരിശോധിക്കാമെന്ന സൂചനയും നൽകി. എന്നാൽ, ആൽബർട്ട പ്രീമിയർ ഡാനിയേൽ സ്മിത്തും സസ്കാച്ചെവാൻ പ്രീമിയർ സ്കോട്ട് മോയും ഊർജ കയറ്റുമതി രാഷ്ട്രീയ സമ്മർദത്തിനായി ഉപയോഗിക്കില്ലെന്ന് വ്യക്തമാക്കിയിരുന്നു.
ഇതേസമയം, ട്രംപിന്റെ വ്യാപാരനടപടികൾ ചർച്ചകളിൽ പ്രധാന വിഷയമായിരുന്നെങ്കിലും, ഊർജസുരക്ഷ, ഫെഡറേഷന്റെ ശക്തിപ്പെടുത്തൽ, ആരോഗ്യപരിചരണത്തിനുള്ള ഫെഡറൽ ധനസഹായം വർധിപ്പിക്കൽ തുടങ്ങിയ വിഷയങ്ങളും സമ്മേളനത്തിൽ പ്രാധാന്യത്തോടെ ചർച്ചയായി. 2028 മുതൽ ആരോഗ്യ കൈമാറ്റ ഫണ്ടിന്റെ വാർഷിക വർധനവ് കുറഞ്ഞത് അഞ്ച് ശതമാനമെങ്കിലും നിലനിർത്തണമെന്ന് പ്രവിശ്യാ നേതാക്കൾ ഫെഡറൽ സർക്കാരിനോട് സംയുക്തമായി ആവശ്യപ്പെട്ടു.
Trump's new tariff threat: Canadian provincial leaders back the federal government.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
