ഒട്ടാവ : കാനഡയിലെ കാട്ടുതീയെത്തുടർന്ന് തെക്കൻ ഒന്റാറിയോ ഉൾപ്പെടെയുള്ള പ്രദേശങ്ങളിൽ പുകമഞ്ഞ് രൂക്ഷമായ സാഹചര്യത്തിൽ, ഫോസിൽ ഇന്ധനങ്ങളുടെ ഉപയോഗം പൂർണ്ണമായി നിർത്തലാക്കുക മാത്രമാണ് ഇതിനുള്ള ഏക ശാശ്വത പരിഹാരമെന്ന് കാലാവസ്ഥാ ശാസ്ത്രജ്ഞർ വ്യക്തമാക്കി. ആഗോളതാപനം മൂലം കാട്ടുതീയുടെ തീവ്രത വർദ്ധിക്കുന്നതായും ജനവാസമേഖലകളിലേക്ക് പുക പടരുന്നതായും വിദഗ്ദ്ധർ ചൂണ്ടിക്കാണിക്കുന്നു. ഒന്റാറിയോയിലെ കാട്ടുതീ പ്രതിരോധ ബജറ്റുമായി ബന്ധപ്പെട്ട് രാഷ്ട്രീയ തർക്കങ്ങൾ നിലനിൽക്കുന്ന സാഹചര്യത്തിലാണ് ശാസ്ത്രജ്ഞർ യാഥാർത്ഥ്യം വെളിപ്പെടുത്തി രംഗത്തുവന്നത്.
താപനിലയിലുണ്ടാകുന്ന ചെറിയ വർദ്ധനവ് പോലും കാട്ടുതീയുടെ എണ്ണത്തിലും അതിന്റെ തീവ്രതയിലും വൻ വർദ്ധനവിന് കാരണമാകുമെന്ന് ടൊറന്റോ സർവകലാശാലയിലെ ഫോറസ്ട്രി ഡിപ്പാർട്ട്മെന്റ് അസോസിയേറ്റ് പ്രൊഫസർ പാട്രിക് ജെയിംസ് അറിയിച്ചു. ആഗോള കാലാവസ്ഥ വ്യതിയാനവും ഭൂമിയുടെ ചൂട് കൂടുന്നതും സസ്യജാലങ്ങളെ കൂടുതൽ വരണ്ടതാക്കുന്നുണ്ടെന്നും ഇത് കാട്ടുതീ പടരാൻ അനുകൂല സാഹചര്യമൊരുക്കുന്നുണ്ടെന്നും മിഷിഗൺ സർവകലാശാലയിലെ കാലാവസ്ഥാ ശാസ്ത്രജ്ഞനും ഡീനുമായ ജോനാഥൻ ഓവർപെക്ക് വ്യക്തമാക്കി. കാനഡയിലെ വനങ്ങളിൽ തീപിടിത്തം വൻതോതിൽ പടരുന്നതിനാൽ നിലവിലുള്ള ഫയർ ഫൈറ്റിംഗ് സംവിധാനങ്ങൾ കൊണ്ട് മാത്രം എല്ലാ തീപിടിത്തങ്ങളും അണയ്ക്കുക അസാധ്യമാണെന്ന് ശാസ്ത്രജ്ഞനായ സെക് ഹൗസ്ഫാദറും വിലയിരുത്തി.
അതേസമയം, പുകമഞ്ഞ് അതിർത്തി കടന്ന് എത്തുന്നതിൽ ആശങ്ക പ്രകടിപ്പിച്ച് യു.എസിലെ ചില റിപ്പബ്ലിക്കൻ ജനപ്രതിനിധികൾ കാനഡ കൂടുതൽ നടപടികൾ സ്വീകരിക്കണമെന്ന് ആവശ്യപ്പെട്ടിട്ടുണ്ട്. കാനഡയിലെ ആർട്ടിക് മേഖലകൾ ആഗോള ശരാശരിയേക്കാൾ നാലിരട്ടി വേഗത്തിലാണ് ചൂടുപിടിക്കുന്നതെന്നും ഇത് വടക്കൻ പ്രദേശങ്ങളിലെ പെർമാഫ്രോസ്റ്റ് (സ്ഥിരമായി മഞ്ഞുറഞ്ഞ മണ്ണ്) ഉരുകുന്നതിന് കാരണമാകുമെന്നും ശാസ്ത്രജ്ഞർ മുന്നറിയിപ്പ് നൽകുന്നു. ഇത് അന്തരീക്ഷത്തിലേക്ക് വലിയ തോതിൽ കാർബൺ ഡയോക്സൈഡും മീഥെയ്നും പുറന്തള്ളപ്പെടാൻ ഇടയാക്കുമെന്നും വിദഗ്ദ്ധർ ചൂണ്ടിക്കാണിക്കുന്നു.
Canada wildfires; Experts call for complete cessation of fossil fuels to avoid smog
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
