ഒട്ടാവ: കാനഡയിലെ വിവിധ ഫെഡറൽ സർക്കാർ വകുപ്പുകളിൽ നിരവധി പുതിയ തൊഴിലവസരങ്ങൾ പ്രഖ്യാപിച്ചു. പ്രതിരോധ മേഖലയിലെ വികസനം, ആരോഗ്യരംഗത്തെ ജീവനക്കാരുടെ കുറവ്, അതിർത്തി സംരക്ഷണ മേഖലകൾ ദേശീയ പാർക്കുകളിലെ പ്രവർത്തനങ്ങൾ എന്നിവ കണക്കിലെടുത്താണ് അടിയന്തരമായി നിയമനം നടത്തുന്നത്. മണിക്കൂറിന് 17.75 ഡോളർ മുതൽ വാർഷിക ശമ്പളം 2,24,198 ഡോളർ വരെയുള്ള വിവിധ തസ്തികകളിലേക്കാണ് നിലവിൽ അപേക്ഷകൾ സ്വീകരിക്കുന്നത്. കാനഡയിലെ സ്ഥിരതാമസക്കാർക്കും പൗരന്മാർക്കും പുറമെ, വിദേശത്ത് താമസിക്കുന്ന കനേഡിയൻ പൗരന്മാർക്കും നിബന്ധനകൾക്ക് വിധേയമായി അപേക്ഷിക്കാൻ അവസരമുണ്ട്.
ആരോഗ്യം, പ്രതിരോധം, സുരക്ഷ, ഭരണം, സാങ്കേതിക മേഖല തുടങ്ങിയ വിഭാഗങ്ങളിലാണ് പ്രധാനമായും ഒഴിവുകളുള്ളത്. കനേഡിയൻ സെക്യൂരിറ്റി ഇന്റലിജൻസ് സർവീസിലെ (CSIS) അഡ്മിനിസ്ട്രേറ്റീവ് അസിസ്റ്റന്റ്, നാഷണൽ ഡിഫൻസിലെ ലീഡ് ഇലക്ട്രോണിക്സ് ടെക്നോളജിസ്റ്റ്, കോസ്റ്റ് ഗാർഡ് തസ്തികകൾ എന്നിവ ഇതിൽ ഉൾപ്പെടുന്നു. ആരോഗ്യരംഗത്ത് ഫാമിലി ഫിസിഷ്യൻ, ഡെന്റിസ്റ്റ്, ക്ലിനിക്കൽ സൈക്കോളജിസ്റ്റ്, നേഴ്സ് തുടങ്ങിയ തസ്തികകളിലേക്ക് ഉയർന്ന ശമ്പളത്തിലാണ് നിയമനം. ഇതുകൂടാതെ, സർവീസ് കാനഡ ഓഫീസുകളിലെ സപ്പോർട്ട് ക്ലർക്ക് ഒഴിവുകളിലേക്കും, ശീതകാല പ്രവർത്തനങ്ങൾക്കായി ബാൻഫ്, ജാസ്പർ മേഖലകളിൽ സ്നോ പ്ലോ ഓപ്പറേറ്റർ തസ്തികകളിലേക്കും അപേക്ഷിക്കാം. വിദ്യാർത്ഥികൾക്കായി ബോർഡർ സർവീസസ് ഏജൻസിയിൽ 340 ബോർഡർ സർവീസസ് ഓഫീസർ ഒഴിവുകളും പാർക്സ് കാനഡയിൽ ഫീൽഡ് അസിസ്റ്റന്റ് ഒഴിവുകളും പ്രഖ്യാപിച്ചിട്ടുണ്ട്.
ഔദ്യോഗിക തൊഴിൽ പോർട്ടലായ ‘ജിസി ജോബ്സ്’ (GC Jobs) വഴി മാത്രമാണ് ഈ തസ്തികകളിലേക്ക് അപേക്ഷിക്കേണ്ടത്. അപേക്ഷാ ഫോമിലെ സ്ക്രീനിംഗ് ചോദ്യങ്ങൾക്ക് കൃത്യമായ വിവരങ്ങൾ നൽകി അവസാന തീയതിക്ക് മുൻപായി അപേക്ഷ സമർപ്പിക്കണമെന്ന് അധികൃതർ അറിയിച്ചു. കാനഡയിലെ സർക്കാർ മേഖലയിൽ ജോലി ആഗ്രഹിക്കുന്ന വിവിധ യോഗ്യതകളുള്ള ഉദ്യോഗാർത്ഥികൾക്ക് ഈ നിയമന പ്രക്രിയ വലിയ അവസരമാണ് ഒരുക്കുന്നത്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
Opportunity to secure a government job in Canada: Urgent recruitment across various departments.
