ആഗോളതലത്തിൽ കൃത്രിമ ബുദ്ധി (AI) രംഗത്തെ വികസനം വേഗത്തിലാക്കുന്നതിനായി ടെക് ഭീമനായ മെറ്റ കാനഡയിൽ ആദ്യമായി അതിവിപുലമായ ഡാറ്റാ സെന്റർ സ്ഥാപിക്കാൻ തീരുമാനിച്ചു. ആൽബർട്ടയിലെ സ്റ്റർജൻ കൗണ്ടിയിലാകും ഒരു ഗിഗാവാട്ട് ശേഷിയുള്ള ഈ കേന്ദ്രം നിർമ്മിക്കുക. ഏകദേശം 13 ബില്യൺ കനേഡിയൻ ഡോളറിന്റെ നിക്ഷേപമാണ് പദ്ധതിക്കായി മാറ്റിവെച്ചിരിക്കുന്നത്. ആഗോളതലത്തിൽ മെറ്റയുടെ 33-ാമത്തെ ഡാറ്റാ സെന്ററായിരിക്കും ഇത്.
കാൽഗറിയിൽ നടന്ന ചടങ്ങിൽ ആൽബർട്ട പ്രീമിയർ ഡാനിയേൽ സ്മിത്തും പ്രവിശ്യാ സർക്കാരിലെ മറ്റ് പ്രതിനിധികളും പങ്കെടുത്ത് പദ്ധതി പ്രഖ്യാപിച്ചു. എഐ സാങ്കേതികവിദ്യയുടെ അതിവേഗ വളർച്ചയോടെ വൻതോതിൽ വൈദ്യുതി ആവശ്യമായി വരുന്ന സാഹചര്യത്തിൽ, കുറഞ്ഞ ചെലവിൽ ലഭ്യമായ പ്രകൃതി വാതകവും തണുത്ത കാലാവസ്ഥയും ഉള്ള ആൽബർട്ട ഡാറ്റാ സെന്ററുകൾക്ക് അനുയോജ്യമായ കേന്ദ്രമായി മാറുന്നുവെന്നാണ് വിലയിരുത്തൽ. നിലവിൽ പ്രവിശ്യയിലെ വൈദ്യുതോത്പാദനത്തിന്റെ വലിയൊരു പങ്കും പ്രകൃതി വാതകത്തെ ആശ്രയിച്ചാണ്.
പുതിയ ഡാറ്റാ സെന്ററിന് ഏകദേശം എട്ടുലക്ഷം വീടുകൾ ഉപയോഗിക്കുന്നതിനോട് തുല്യമായ വൈദ്യുതി ആവശ്യമായി വരുമെന്നാണ് മെറ്റ വ്യക്തമാക്കിയത്. ഇതിന്റെ ഭാഗമായി പുതിയ വൈദ്യുതി ഉത്പാദന സംവിധാനങ്ങളും ഗ്രിഡ് അടിസ്ഥാനസൗകര്യങ്ങളും കമ്പനി തന്നെ ധനസഹായം നൽകി വികസിപ്പിക്കും. ഇതിനായി ആൽബർട്ട ആസ്ഥാനമായ പെംബിന പൈപ്പ്ലൈൻ കമ്പനിയുമായി മെറ്റ ദീർഘകാല കരാറിലെത്തിയിട്ടുണ്ട്. സ്റ്റർജൻ കൗണ്ടിയിൽ 2030ഓടെ പ്രവർത്തനം ആരംഭിക്കുന്ന പ്രകൃതി വാതക അധിഷ്ഠിത വൈദ്യുത നിലയുമായി പദ്ധതി ബന്ധിപ്പിക്കപ്പെടും. അതേസമയം, ശുദ്ധ ഊർജത്തെ അടിസ്ഥാനമാക്കിയുള്ള ഡാറ്റാ സെന്റർ വികസനമാണ് കാനഡയുടെ ദേശീയ എഐ തന്ത്രം പ്രോത്സാഹിപ്പിക്കുന്നതെങ്കിലും, നിലവിൽ ആസൂത്രണം ചെയ്യുന്ന ഭൂരിഭാഗം പുതിയ ഡാറ്റാ സെന്ററുകളും പ്രകൃതി വാതകത്തെ കൂടുതലായി ആശ്രയിക്കുന്ന ആൽബർട്ടയിലാണ് കേന്ദ്രീകരിച്ചിരിക്കുന്നത്.
Meta's first Canadian AI data center in Alberta
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
