കാനഡയിലെത്തി ആറാം നാൾ ഭാര്യയെ കുത്തിക്കൊന്നു; ഇന്ത്യൻ സ്വദേശി കുറ്റക്കാരനെന്ന് കനേഡിയൻ കോടതി

അബോട്ട്സ്‌ഫോർഡ്: ബ്രിട്ടീഷ് കൊളംബിയയിലുള്ള അബോട്ട്സ്‌ഫോർഡിൽ ഭാര്യയെ ക്രൂരമായി കുത്തിക്കൊലപ്പെടുത്തിയ കേസിൽ ഇന്ത്യൻ സ്വദേശിയായ ഭർത്താവ് കുറ്റക്കാരനാണെന്ന് കനേഡിയൻ കോടതി കണ്ടെത്തി. പഞ്ചാബ് സ്വദേശിയായ ജഗ്പ്രീത് സിംഗിനെതിരെയാണ് (51) രണ്ടാം ഡിഗ്രി കൊലപാതകക്കുറ്റം ചുമത്തി ബി.സി സുപ്രീം കോടതി ഉത്തരവിട്ടത്. 20 വർഷത്തിലേറെയായി ഒന്നിച്ച് ജീവിച്ചിരുന്ന ഭാര്യ ബൽവിന്ദർ കൗറിനെ (41) കാനഡയിലെത്തി ആറാം ദിവസമാണ് ജഗ്പ്രീത് സിംഗ് കൊലപ്പെടുത്തിയത്. പ്രതിക്ക് കൊലപാതകത്തിന് വ്യക്തമായ ഉദ്ദേശ്യമുണ്ടായിരുന്നുവെന്ന് കോടതി നിരീക്ഷിച്ചു.

2024 മാർച്ച് 15-നായിരുന്നു കാനഡയെ നടുക്കിയ കൊലപാതകം നടന്നത്. ഉന്നത പഠനത്തിനായി കാനഡയിലെത്തിയ മകളെ സഹായിക്കുന്നതിനായാണ് ബൽവിന്ദർ കൗർ 2022-ൽ കാനഡയിലേക്ക് മാറിയത്. തുടർന്ന് ബൽവിന്ദർ തന്നെ മുൻകൈയെടുത്ത് അപേക്ഷിച്ച വിസയിലാണ് 2024 മാർച്ച് 9-ന് ജഗ്പ്രീത് സിംഗ് കാനഡയിലെത്തിയത്.

അബോട്ട്സ്‌ഫോർഡിലെ വാഗ്നർ ഡ്രൈവിലുള്ള ഇവരുടെ ബേസ്‌മെന്റ് അപ്പാർട്ട്മെന്റിലായിരുന്നു താമസം. എന്നാൽ കാനഡയിലെത്തിയ നാൾ മുതൽ ഇരുവരും തമ്മിൽ തർക്കങ്ങൾ നിലനിന്നിരുന്നതായും, ജഗ്പ്രീത് കാനഡയിലേക്ക് വരുന്നതിൽ ബൽവിന്ദറിന് ഭയവും ആശങ്കയും ഉണ്ടായിരുന്നതായും കോടതി രേഖകൾ വ്യക്തമാക്കുന്നു. സംഭവം നടന്ന രാത്രിയിൽ ദമ്പതികൾ ഗുരുദ്വാരയിലും തുടർന്ന് മാളിലും പോയ ശേഷം രാത്രി 9.30-ഓടെയാണ് വീട്ടിൽ തിരിച്ചെത്തിയത്. ഇതിന് ശേഷം ഒരു മണിക്കൂറിനുള്ളിൽ കൊലപാതകം നടന്നതായാണ് പ്രോസിക്യൂഷൻ കണ്ടെത്തൽ.

രാത്രി 10.38-ഓടെ വീട്ടിലെത്തിയ അയൽവാസിയാണ് രക്തത്തിൽ കുളിച്ചുകിടക്കുന്ന ബൽവിന്ദറിന്റെ മൃതദേഹം ആദ്യം കണ്ടത്. തുടർന്ന് പോലീസെത്തി സംഭവസ്ഥലത്ത് വെച്ച് തന്നെ ജഗ്പ്രീതിനെ അറസ്റ്റ് ചെയ്യുകയായിരുന്നു. കഴുത്തിലും നെഞ്ചിലുമായി ഏറ്റ ഏഴോളം ആഴത്തിലുള്ള മുറിവുകളും അതിനെത്തുടർന്നുണ്ടായ അമിത രക്തസ്രാവവുമാണ് ബൽവിന്ദറിന്റെ മരണത്തിന് കാരണമായതെന്ന് പോസ്റ്റ്‌മോർട്ടം റിപ്പോർട്ടിൽ പറയുന്നു.

പെട്ടെന്നുണ്ടായ പ്രകോപനത്തിന്റെ പുറത്താണ് കൊലപാതകം നടന്നതെന്നും അതിനാൽ ശിക്ഷ കുറഞ്ഞ നരഹത്യയായി കണക്കാക്കണമെന്നുമായിരുന്നു ജഗ്പ്രീത് സിംഗിന്റെ വാദം. ബൽവിന്ദർ തനിക്ക് നേരെ കത്തി വീശിയപ്പോൾ അത് തടയാൻ ശ്രമിക്കുന്നതിനിടെ അബദ്ധത്തിൽ വയറ്റിൽ കുത്തേറ്റതാണെന്നും അതിനുശേഷം നടന്ന കാര്യങ്ങൾ ഓർമയില്ലെന്നുമുള്ള പ്രതിയുടെ വാദങ്ങൾ ബി.സി സുപ്രീം കോടതി ജസ്റ്റിസ് ആൻഡ്രിയ ഓർമിസ്റ്റൺ പൂർണ്ണമായും തള്ളി.

പ്രതി കോടതിയിൽ നൽകിയ മൊഴികൾ വിശ്വസനീയമല്ലെന്നും കൃത്യമായ കൊലപാതക ഉദ്ദേശ്യത്തോടെയാണ് പ്രതി കൃത്യം നിർവഹിച്ചതെന്നും കോടതി ഉത്തരവിൽ വ്യക്തമാക്കി. കേസിൽ പ്രതിയുടെ മാനസിക നില പരിശോധിച്ച ശേഷമുള്ള അടുത്ത കോടതി നടപടികൾ ഒക്ടോബർ 19-ന് നടക്കും. ഇതിന് ശേഷമായിരിക്കും ശിക്ഷാവിധി പ്രഖ്യാപിക്കുക.

Indian national found guilty by Canadian court of stabbing wife to death six days after arriving in Canada.

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt