വെഗോവിക്ക് പകരക്കാരൻ എത്തും; ശരീരഭാരം കുറയ്ക്കാനുള്ള ആദ്യ ‘ജനറിക്’ മരുന്നിന് കാനഡയുടെ അനുമതി

ഒട്ടാവ: ആഗോളതലത്തിൽ വൻ തരംഗമായി മാറിയ ശരീരഭാരം കുറയ്ക്കാനുള്ള മരുന്ന് ‘വെഗോവി’ക്ക് (Wegovy) പകരമായി ഉപയോഗിക്കാവുന്ന ആദ്യ ജനറിക് കുത്തിവെപ്പിന് കാനഡയിൽ ഭരണകൂടത്തിന്റെ അംഗീകാരം. കനേഡിയൻ ഫാർമസ്യൂട്ടിക്കൽ കമ്പനിയായ ‘അപ്പോടെക്സ്’ (Apotex) വികസിപ്പിച്ച ‘സ്വെമിയ’ (Svemia) എന്ന സെമാഗ്ലൂട്ടൈഡ് കുത്തിവെപ്പിനാണ് കാനഡയുടെ ആരോഗ്യ മന്ത്രാലയമായ ‘ഹെൽത്ത് കാനഡ’ അനുമതി നൽകിയത്. അമിതവണ്ണവും ശരീരഭാരവും നിയന്ത്രിക്കുന്നതിനായി കാനഡയിൽ അംഗീകാരം ലഭിക്കുന്ന ആദ്യ ജനറിക് സെമാഗ്ലൂട്ടൈഡ് മരുന്നാണിത്. തിങ്കളാഴ്ചയാണ് ഹെൽത്ത് കാനഡ ഇക്കാര്യം ഔദ്യോഗികമായി അറിയിച്ചത്.

12 വയസ്സും അതിനുമുകളിലും പ്രായമുള്ളവരിൽ വിട്ടുമാറാത്ത അമിതവണ്ണവും ശരീരഭാരവും നിയന്ത്രിക്കുന്നതിനാണ് ആഴ്ചയിലൊരിക്കൽ എടുക്കാവുന്ന ഈ കുത്തിവെപ്പിന് അനുമതി നൽകിയിരിക്കുന്നത്. എന്നാൽ, കലോറി കുറഞ്ഞ ഭക്ഷണക്രമത്തിനും ശാരീരിക വ്യായാമങ്ങൾക്കും ഒപ്പമുള്ള ഒരു അനുബന്ധ ചികിത്സയായി മാത്രമേ ഇത് ഉപയോഗിക്കാൻ പാടുള്ളൂ എന്ന് മന്ത്രാലയം വ്യക്തമാക്കിയിട്ടുണ്ട്. കമ്പനി സമർപ്പിച്ച ക്ലിനിക്കൽ പരീക്ഷണങ്ങളുടെ വിവരങ്ങൾ വിശദമായി പരിശോധിച്ച ശേഷമാണ് തീരുമാനം. മരുന്നിന്റെ സുരക്ഷ, ഫലപ്രാപ്തി, ഗുണനിലവാരം എന്നിവ ഉറപ്പുവരുത്തുന്നതിനുള്ള എല്ലാ മാനദണ്ഡങ്ങളും സ്വെമിയ പാലിക്കുന്നുണ്ടെന്ന് ഹെൽത്ത് കാനഡ വ്യക്തമാക്കി.

ബ്രാൻഡഡ് മരുന്നുകൾക്ക് സമാനമായ ഗുണനിലവാരവും ഫലപ്രാപ്തിയും ഉറപ്പാക്കിക്കൊണ്ടാണ് ജനറിക് പതിപ്പുകൾക്ക് അനുമതി നൽകുന്നത്. വിപണിയിൽ ലഭ്യമായ ബ്രാൻഡഡ് മരുന്നുകളേക്കാൾ 45 മുതൽ 90 ശതമാനം വരെ വിലക്കുറവിലാണ് കാനഡയിൽ പൊതുവെ ജനറിക് മരുന്നുകൾ ലഭിക്കാറുള്ളത്. അതിനാൽ പുതിയ ജനറിക് മരുന്നിന്റെ വരവ് സാധാരണക്കാരായ രോഗികൾക്കും ആരോഗ്യ മേഖലയ്ക്കും വലിയ സാമ്പത്തിക ആശ്വാസം നൽകും. നിലവിൽ മറ്റ് ആറ് കമ്പനികളുടെ കൂടി ജനറിക് സെമാഗ്ലൂട്ടൈഡ് അപേക്ഷകൾ ഹെൽത്ത് കാനഡയുടെ പരിഗണനയിലാണ്. ഇവയിലുള്ള അന്തിമ തീരുമാനങ്ങൾ വരും ആഴ്ചകളിൽ തന്നെയുണ്ടാകും.

നേരത്തെ, ഇതേ വർഷം മെയ് ഒന്നിന് ടൈപ്പ്-2 പ്രമേഹമുള്ള മുതിർന്നവർക്കായി അപ്പോടെക്സ് കമ്പനി വികസിപ്പിച്ച ജനറിക് സെമാഗ്ലൂട്ടൈഡ് കുത്തിവെപ്പിന് ഹെൽത്ത് കാനഡ അനുമതി നൽകിയിരുന്നു. ഇതിന് പിന്നാലെയാണ് ഇപ്പോൾ ശരീരഭാരം കുറയ്ക്കുന്നതിനുള്ള വെഗോവിയുടെ ജനറിക് പതിപ്പിനും കാനഡ അംഗീകാരം നൽകിയിരിക്കുന്നത്. ആഗോളതലത്തിൽ സെമാഗ്ലൂട്ടൈഡ് മരുന്നുകൾക്ക് വലിയ ക്ഷാമവും ഉയർന്ന വിലയും നേരിടുന്ന സാഹചര്യത്തിൽ, കാനഡയുടെ ഈ പുതിയ നീക്കം അന്താരാഷ്ട്ര ഫാർമസ്യൂട്ടിക്കൽ വിപണിയിലും നിർണായക മാറ്റങ്ങൾക്ക് വഴിവെക്കുമെന്നാണ് വിലയിരുത്തൽ.

A replacement for Vegovi is coming; Canada approves the first 'generic' weight loss drug

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt