ഒന്റാറിയോ: ഒന്റാറിയോ പ്രവിശ്യയിൽ വാഹന ഇൻഷുറൻസ് നയങ്ങളിലെ അപകടാനുകൂല്യങ്ങളുടെ പരിരക്ഷയുമായി ബന്ധപ്പെട്ട് ജൂലൈ ഒന്ന് മുതൽ പുതിയ പരിഷ്കാരങ്ങൾ പ്രാബല്യത്തിൽ വരും. ഇതനുസരിച്ച് സാധാരണ ഇൻഷുറൻസ് പോളിസികളിൽ ഉൾപ്പെട്ടിരുന്ന ചില നിർബന്ധിത ആനുകൂല്യങ്ങൾ ഒഴിവാക്കാൻ ഡ്രൈവർമാർക്ക് ഇനി സാധിക്കും. ഇൻഷുറൻസ് പ്രീമിയം തുക കുറയ്ക്കാൻ ഈ തീരുമാനം സഹായിക്കുമെങ്കിലും, പോളിസി ഉടമകളുടെ ഇൻഷുറൻസ് പരിരക്ഷ ലഘൂകരിക്കപ്പെടാൻ ഇത് കാരണമാകുമെന്ന് വിദഗ്ധർ ചൂണ്ടിക്കാണിക്കുന്നു. ഒന്റാറിയോയിലെ ജനങ്ങൾ രാജ്യത്ത് ഏറ്റവും ഉയർന്ന വാഹന ഇൻഷുറൻസ് നിരക്കാണ് നൽകുന്നതെന്ന 2022-ലെ ഓഡിറ്റർ ജനറലിന്റെ റിപ്പോർട്ടിന്റെ അടിസ്ഥാനത്തിലാണ് പ്രവിശ്യാ ഭരണകൂടത്തിന്റെ പുതിയ നടപടി.
പുതിയ ഭേദഗതി പ്രകാരം വരുമാന നഷ്ടം, മരണാനന്തര ആനുകൂല്യങ്ങൾ, ശവസംസ്കാര ചെലവുകൾ എന്നിവയ്ക്കുള്ള പരിരക്ഷകൾ പോളിസി ഉടമയ്ക്ക് ആവശ്യമെങ്കിൽ മാത്രം തിരഞ്ഞെടുക്കാവുന്ന ഓപ്ഷണൽ ആനുകൂല്യങ്ങളായി മാറും. ഇനി മുതൽ വൈദ്യസഹായം, പുനരധിവാസം, അറ്റൻഡന്റ് കെയർ എന്നിവ മാത്രമായിരിക്കും ഇൻഷുറൻസിലെ നിർബന്ധിത പരിരക്ഷയിൽ ഉൾപ്പെടുക. നിലവിലുള്ള പോളിസികൾക്ക് ഈ മാറ്റം ബാധകമല്ലെന്നും പുതിയ പോളിസി എടുക്കുമ്പോഴോ നിലവിലുള്ളവ പുതുക്കുമ്പോഴോ മാത്രമായിരിക്കും പുതിയ നിയമം നടപ്പിലാകുകയെന്നും ഇൻഷുറൻസ് ബ്രോക്കറായ ലാൻസ് മില്ലർ വ്യക്തമാക്കി. ഉപഭോക്താക്കൾക്ക് തങ്ങളുടെ ആവശ്യാനുസരണം പോളിസികൾ ക്രമീകരിക്കാൻ ഇൻഷുറൻസ് ബ്രോക്കർമാർ വഴി അവസരം നൽകണമെന്ന് പ്രവിശ്യാ ഭരണകൂടം നിർദ്ദേശിച്ചിട്ടുണ്ട്. പുതിയ ഇൻഷുറൻസ് പരിഷ്കാരങ്ങൾ ഒന്റാറിയോയിലെ കാൽനടയാത്രക്കാരെയും സൈക്കിൾ യാത്രക്കാരെയും ബാധിച്ചേക്കാമെന്ന് നിയമവിദഗ്ധനായ ഡേവ് ഷെൽനട്ട് ആശങ്ക പ്രകടിപ്പിച്ചു.
പുതിയ നിയമപ്രകാരം ഓപ്ഷണൽ ആനുകൂല്യങ്ങളുടെ പരിരക്ഷ ഡ്രൈവർക്കും പങ്കാളിക്കും ആശ്രിതർക്കും മാത്രമായി പരിമിതപ്പെടുത്തിയിരിക്കുന്നു. അതേസമയം, അപകടത്തിൽപ്പെടുന്ന കാൽനടയാത്രക്കാർക്കും സൈക്കിൾ യാത്രക്കാർക്കും നിർബന്ധിത വൈദ്യസഹായവും പുനരധിവാസ ആനുകൂല്യങ്ങളും തുടർന്നും ലഭിക്കാൻ അർഹതയുണ്ടായിരിക്കുമെന്ന് ഒന്റാറിയോ ധനകാര്യ മന്ത്രാലയ വക്താവ് സാറ ചാപിൻ ഇമെയിൽ പ്രസ്താവനയിലൂടെ അറിയിച്ചു. വാഹന മോഷണങ്ങളും കാലാവസ്ഥാ വ്യതിയാനവും ഇൻഷുറൻസ് നിരക്കുകൾ വർദ്ധിക്കാൻ കാരണമായിട്ടുണ്ടെന്നും, പരിരക്ഷകൾ വെട്ടിക്കുറയ്ക്കുന്നതിന് പകരം മറ്റ് ഇൻഷുറൻസ് ദാതാക്കളുടെ നിരക്കുകൾ താരതമ്യം ചെയ്ത് അനുയോജ്യമായവ തിരഞ്ഞെടുക്കുകയാണ് പ്രീമിയം കുറയ്ക്കാൻ നല്ലതെന്നും ഇൻഷുറൻസ് വിദഗ്ധനായ ഡാനിയൽ ഇവാൻസും വിലയിരുത്തി.
Auto insurance policies in Ontario change; reforms effective July 1
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
