ചെന്നൈ: മുല്ലപ്പെരിയാർ അണക്കെട്ട് വിഷയത്തിൽ തമിഴ്നാടിന്റെ മുൻനിലപാടുകൾ ആവർത്തിച്ച് പുതിയ തമിഴക വെട്രി കഴകം (TVK) സർക്കാർ. മുല്ലപ്പെരിയാറിൽ പുതിയ ഡാം നിർമ്മിക്കണമെന്ന കേരളത്തിന്റെ ആവശ്യത്തെ ശക്തമായി എതിർക്കുമെന്ന് തമിഴ്നാട് സർക്കാർ വ്യക്തമാക്കി. തമിഴ്നാട് നിയമസഭയിൽ നടന്ന പുതിയ സർക്കാരിന്റെ നയപ്രഖ്യാപന പ്രസംഗത്തിലാണ് കേരളത്തിന്റെ നിലപാടുകൾക്കെതിരെയുള്ള തമിഴ്നാടിന്റെ ഔദ്യോഗിക പ്രതികരണം പുറത്തുവന്നത്.
വിവാദങ്ങൾക്കൊടുവിൽ ആരംഭിച്ച തമിഴ്നാട് നിയമസഭാ സമ്മേളനത്തിന്റെ തുടക്കം തന്നെ ഏറെ ശ്രദ്ധേയമായിരുന്നു. തമിഴ് തായ് വാഴ്ത്ത് ആലപിച്ചുകൊണ്ടാണ് സമ്മേളനം ആരംഭിച്ചത്. എന്നാൽ, മുൻപ് ആദ്യ സമ്മേളനവുമായി ബന്ധപ്പെട്ടുണ്ടായ വിവാദങ്ങളുടെ പശ്ചാത്തലത്തിൽ ഇത്തവണ വന്ദേമാതരം ആലപിച്ചില്ല എന്നത് രാഷ്ട്രീയ വൃത്തങ്ങളിൽ ചർച്ചയായിട്ടുണ്ട്. നിയമസഭയിലെ പുതിയ അംഗങ്ങളെ അഭിനന്ദിച്ചുകൊണ്ട് പ്രസംഗം ആരംഭിച്ച ഗവർണർ, ദ്രാവിഡ രാഷ്ട്രീയത്തിന്റെ പ്രമുഖ നേതാക്കളായ പെരിയാർ, അണ്ണാദുരൈ എന്നിവർക്കൊപ്പം ഭരണഘടനാ ശില്പി ബി.ആർ. അംബേദ്കറുടെ പേരും നയപ്രഖ്യാപനത്തിൽ എടുത്തുപറഞ്ഞു.
അതേസമയം, മുല്ലപ്പെരിയാർ വിഷയത്തിൽ കേരളം തങ്ങളുടെ മുൻകാല നിലപാടുകളിൽ ഉറച്ചുനിൽക്കുകയാണെന്ന് കഴിഞ്ഞ ദിവസം ജലവിഭവ വകുപ്പ് മന്ത്രി മോൻസ് ജോസഫ് വ്യക്തമാക്കിയിരുന്നു. മുൻപ് ഉമ്മൻചാണ്ടി സർക്കാരിന്റെ കാലത്തുണ്ടായിരുന്ന അതേ നിലപാട് തന്നെയാണ് സംസ്ഥാന സർക്കാർ ഇപ്പോഴും മുന്നോട്ടുവെക്കുന്നത്. “കേരളത്തിലെ ജനങ്ങൾക്ക് സുരക്ഷ, തമിഴ്നാടിന് ആവശ്യമായ വെള്ളം” എന്ന സമഗ്രമായ ഫോർമുലയാണ് കേരളം എക്കാലത്തും ഈ വിഷയത്തിൽ സ്വീകരിച്ചിട്ടുള്ളതെന്ന് മന്ത്രി ഓർമ്മിപ്പിച്ചു.
നിലവിൽ മുല്ലപ്പെരിയാർ സംബന്ധിച്ച തർക്കങ്ങളും പുതിയ ഡാം നിർമ്മാണത്തിനായുള്ള ആവശ്യങ്ങളും സുപ്രീം കോടതിയുടെ പരിഗണനയിലാണ്. കോടതിയുടെ അന്തിമ തീർപ്പിനായി ഇരു സംസ്ഥാനങ്ങളും കാത്തിരിക്കെ, പുതിയ ഡാം അനുവദിക്കില്ലെന്ന തമിഴ്നാടിന്റെ കടുത്ത നിലപാട് വരും ദിവസങ്ങളിൽ അന്തർസംസ്ഥാന ബന്ധങ്ങളിലും നിയമപോരാട്ടങ്ങളിലും കൂടുതൽ നിർണ്ണായകമാകും.
TVK Govt Rejects New Mullaperiyar Dam, Hits Kerala
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
