ഡാർട്ട്മൗത്ത്: നോവ സ്കോഷ്യയിലെ ഡാർട്ട്മൗത്ത് നിവാസികൾ ഗുരുതരമായ സുരക്ഷാ ഭീഷണി നേരിടുന്നതായി പരാതി. പൊതുസ്ഥലങ്ങളിലും ബസ് സ്റ്റോപ്പുകളിലും പകൽ വെളിച്ചത്തിൽ നടക്കുന്ന മയക്കുമരുന്ന്, മദ്യപാന ഉപയോഗങ്ങൾ പ്രദേശവാസികളിൽ കടുത്ത ആശങ്കയാണ് ഉണ്ടാക്കുന്നത്. കളിസ്ഥലങ്ങളിലും പാർക്കുകളിലും ഉപയോഗിച്ച സിറിഞ്ചുകളും മറ്റ് ലഹരി വസ്തുക്കളും ഉപേക്ഷിക്കപ്പെട്ട നിലയിൽ കാണുന്നത് കുട്ടികളുടെ സുരക്ഷയെ മുൻനിർത്തി വലിയ ഭീഷണിയായി മാറിയിരിക്കുകയാണ്.
കഴിഞ്ഞ മുപ്പത് വർഷമായി ഡാർട്ട്മൗത്തിൽ താമസിക്കുന്ന ജെയിംസ് ക്രോസൺ എന്ന വ്യക്തിയാണ് സ്ഥിതിഗതികൾ വഷളായതായി ചൂണ്ടിക്കാട്ടിയത്. ചെറിയ കുട്ടികൾ കളിക്കുന്ന പാർക്കുകളിൽ പോലും മയക്കുമരുന്ന് ഉപയോഗിച്ച ശേഷമുള്ള അവശിഷ്ടങ്ങൾ കാണുന്നത് മാതാപിതാക്കളെ ആശങ്കയിലാഴ്ത്തുന്നു. മോഷണങ്ങളും വർദ്ധിച്ചുവരുന്നതായി നാട്ടുകാർ പരാതിപ്പെടുന്നു.
വിഷയത്തിൽ പോലീസ് ഇടപെടൽ ശക്തമാക്കുമെന്ന് ഹാലിഫാക്സ് റീജിയണൽ പോലീസ് അറിയിച്ചു. ഇത്തരത്തിലുള്ള സാമൂഹ്യവിരുദ്ധ പ്രവർത്തനങ്ങളെക്കുറിച്ച് വിവരം ലഭിച്ചാൽ ഉടൻ തന്നെ കമ്മ്യൂണിറ്റി ഓഫീസർമാരെ അറിയിക്കണമെന്നും, കുറ്റകൃത്യങ്ങൾ നടക്കുന്ന സ്ഥലങ്ങളിൽ പരിശോധന കർശനമാക്കുമെന്നും കോൺസ്റ്റബിൾ മാർട്ടിൻ ക്രോംവെൽ വ്യക്തമാക്കി.
ഡൗൺടൗൺ ഡാർട്ട്മൗത്ത് ബിസിനസ് കമ്മീഷനും സ്ഥിതിഗതികൾ നിരീക്ഷിക്കുന്നുണ്ട്. മയക്കുമരുന്ന് അവശിഷ്ടങ്ങൾ നീക്കം ചെയ്യുന്നതിനായി ശുചീകരണ പ്രവർത്തനങ്ങൾ ഊർജ്ജിതമാക്കിയിട്ടുണ്ടെന്ന് ടിം റിസെസ്കോ പറഞ്ഞു. വരാനിരിക്കുന്ന വേനൽക്കാലത്ത് സ്പ്ലാഷ് പാഡുകളിൽ ഉൾപ്പെടെ നിരീക്ഷണം ശക്തമാക്കാനും അധികൃതർ പദ്ധതിയിടുന്നുണ്ട്. പാർക്കുകളും പൊതുസ്ഥലങ്ങളും വൃത്തിയായും സുരക്ഷിതമായും നിലനിർത്തണമെന്നാണ് നാട്ടുകാരുടെ പ്രധാന ആവശ്യം.
Dartmouth residents concerned about open drug use, paraphernalia, and theft
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
