ബോർഡൻ-കാൾട്ടൺ: അറ്റ്ലാന്റിക് കാനഡയിലെ ക്യാൻസർ ഗവേഷണ പ്രവർത്തനങ്ങൾക്ക് ഫണ്ട് കണ്ടെത്തുക എന്ന ലക്ഷ്യത്തോടെ പ്രിൻസ് എഡ്വേർഡ് ഐലൻഡിൽ വൻ ജനപങ്കാളിത്തത്തോടെ സൈക്ലിംഗ് ചലഞ്ച് സംഘടിപ്പിച്ചു. ‘ഗിവ് ടു ലിവ്’ (GIVETOLIVE) എന്ന സന്നദ്ധ സംഘടനയുടെ നേതൃത്വത്തിൽ നടന്ന ‘ബിഗ് റൈഡ്’ കാമ്പയിനിൽ നാൽപ്പതിലധികം സൈക്കിൾ യാത്രികരാണ് പങ്കെടുത്തത്. കഠിനമായ തണുപ്പുള്ള പ്രഭാതത്തിൽ ബോർഡൻ-കാൾട്ടണിൽ നിന്ന് ആരംഭിച്ച യാത്രയിൽ, മൂന്ന് ദിവസങ്ങളിലായി 300 കിലോമീറ്ററിലധികം ദൂരമാണ് ഇവർ പിന്നിടുന്നത്.
ക്യാൻസറിനോട് പോരാടി വിജയിച്ചവരും തങ്ങളുടെ പ്രിയപ്പെട്ടവരുടെ ഓർമ്മകൾ നെഞ്ചിലേറ്റുന്നവരുമായ നിരവധി പേർ ഈ ജീവകാരുണ്യ ദൗത്യത്തിന്റെ ഭാഗമായി അണിനിരന്നു. തങ്ങൾ ലക്ഷ്യമിട്ട 1,5,000 കനേഡിയൻ ഡോളർ എന്ന പ്രാരംഭ തുക, യാത്ര ആരംഭിക്കുന്നതിന് മുൻപ് തന്നെ മറികടക്കാൻ കഴിഞ്ഞുവെന്നത് ഈ വർഷത്തെ കാമ്പയിന്റെ വിജയത്തിന് തിളക്കമേറ്റുന്നു. ഡൽഹൗസി യൂണിവേഴ്സിറ്റിക്ക് കീഴിലുള്ള ബിയാട്രിസ് ഹണ്ടർ ക്യാൻസർ റിസർച്ച് ഇൻസ്റ്റിറ്റ്യൂട്ടിലെ ഗവേഷണങ്ങൾക്കായാണ് ഈ തുക വിനിയോഗിക്കുന്നത്.
കഴിഞ്ഞ 18 വർഷമായി തുടരുന്ന ഈ മുന്നേറ്റത്തിലൂടെ ഇതുവരെ മൂന്ന് മില്യണോളം കനേഡിയൻ ഡോളർ സമാഹരിക്കാൻ സംഘാടകർക്ക് കഴിഞ്ഞിട്ടുണ്ട്. ക്യാൻസർ ചികിത്സ രംഗത്ത് പുതിയ കണ്ടെത്തലുകൾ നടത്താൻ ഇത്തരം കൂട്ടായ്മകൾ നൽകുന്ന പിന്തുണ ചെറുതല്ലെന്ന് യാത്രികർ സാക്ഷ്യപ്പെടുത്തുന്നു. പങ്കെടുത്തവരിൽ പലർക്കും ഈ യാത്ര കേവലമൊരു ചലഞ്ച് എന്നതിനപ്പുറം വ്യക്തിപരമായ അതിജീവനത്തിന്റെ കഥകൾ കൂടിയാണ് പങ്കുവെക്കാനുള്ളത്. ഹാലിഫാക്സിൽ നിന്നുള്ള ജൂലി റിക്കറ്റ്സ് എന്ന യാത്രിക ഇതിനൊരു മികച്ച ഉദാഹരണമാണ്.
മൂന്ന് വർഷം മുൻപ് തന്റെ ആദ്യ ‘ബിഗ് റൈഡ്’ പൂർത്തിയാക്കുമ്പോൾ തനിക്ക് സ്തനാർബുദമാണെന്ന വിവരം ജൂലി അറിഞ്ഞിരുന്നില്ല. രോഗനിർണ്ണയത്തിന് ശേഷമുള്ള സർജറിയുടെയും ചികിത്സയുടെയും കഠിനമായ ഘട്ടങ്ങളെ അതിജീവിക്കാൻ ഈ സൈക്ലിംഗ് കൂട്ടായ്മ നൽകിയ മാനസിക പിന്തുണ വലുതായിരുന്നുവെന്ന് അവർ ഓർക്കുന്നു. രോഗം നേരത്തെ കണ്ടെത്താനായതിനാൽ താൻ ആരോഗ്യവതിയാണെന്നും, വരും വർഷങ്ങളിലും ഈ ദൗത്യത്തിൽ പങ്കാളിയാകുമെന്നും ജൂലി ആത്മവിശ്വാസത്തോടെ വ്യക്തമാക്കുന്നു.
മുതിർന്നവർക്കൊപ്പം കൗമാരക്കാരായ കുട്ടികളും ഈ ദൗത്യത്തിൽ സജീവമായി പങ്കെടുത്തു എന്നത് ശ്രദ്ധേയമാണ്. നാല് വർഷം മുൻപ് ക്യാൻസർ ബാധിച്ച് സഹോദരനെ നഷ്ടപ്പെട്ട പതിമൂന്നുകാരനായ സാം നുനെസും, തന്റെ മുത്തശ്ശന്റെ ഓർമ്മയ്ക്കായി യാത്ര തിരിഞ്ഞ സുഹൃത്ത് ജൂഡ ബോയും മാസങ്ങൾ നീണ്ട പരിശീലനത്തിന് ശേഷമാണ് ഈ ദീർഘദൂര യാത്രയ്ക്ക് ഇറങ്ങിയത്. നോവ സ്കോഷ്യയിൽ നിന്നുള്ളവരായിരുന്നു പങ്കെടുത്തവരിൽ ഭൂരിഭാഗമെങ്കിലും പ്രാദേശിക നിവാസികളുടെ വലിയ പിന്തുണയാണ് ഇവർക്ക് ലഭിക്കുന്നത്. തങ്ങളുടെ ആദ്യ വിശ്രമകേന്ദ്രമായ കെൻസിംഗ്ടണിൽ എത്തിയപ്പോഴേക്കും ഉയർന്ന ആത്മവിശ്വാസത്തോടെയും ലക്ഷ്യബോധത്തോടെയും യാത്ര തുടരാൻ തന്നെയാണ് ഈ സംഘത്തിന്റെ തീരുമാനം.
'Big Ride' helps cancer research; Forty-member team completes 300-km cycle challenge
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
