കേരളത്തിന്റെ പുതിയ മുഖ്യമന്ത്രിയായി വി.ഡി. സതീശൻ അധികാരമേൽക്കുന്നു. 140 അംഗ നിയമസഭയിൽ 102 സീറ്റുകൾ നേടി യുണൈറ്റഡ് ഡെമോക്രാറ്റിക് ഫ്രണ്ടിനെ (യു.ഡി.എഫ്) മികച്ച വിജയത്തിലേക്ക് നയിച്ചതിന് പിന്നാലെയാണ് സതീശൻ ഭരണനേതൃത്വത്തിലേക്ക് എത്തുന്നത്. പത്ത് വർഷം നീണ്ടുനിന്ന ഇടതുപക്ഷ ജനാധിപത്യ മുന്നണിയുടെ (എൽ.ഡി.എഫ്) ഭരണത്തെ പരാജയപ്പെടുത്തിയാണ് സതീശന്റെ നേതൃത്വത്തിൽ യു.ഡി.എഫ് അധികാരം പിടിച്ചെടുത്തത്.
1964 മെയ് 31-ന് കൊച്ചിയിലെ നെട്ടൂരിൽ കെ. ദാമോദര മേനോന്റെയും വി. വിലാസിനി അമ്മയുടെയും മകനായാണ് വി.ഡി. സതീശൻ ജനിച്ചത്. പനങ്ങാട് ഹൈസ്കൂളിൽനിന്ന് പ്രാഥമിക വിദ്യാഭ്യാസവും തേവര സേക്രഡ് ഹാർട്ട് കോളേജിൽനിന്ന് ബിരുദവും പൂർത്തിയാക്കി. തുടർന്ന് രാജഗിരി കോളേജ് ഓഫ് സോഷ്യൽ സയൻസസിൽനിന്ന് സോഷ്യൽ വർക്കിൽ ബിരുദാനന്തര ബിരുദവും കേരള ലോ അക്കാദമിയിൽനിന്നും തിരുവനന്തപുരം ഗവൺമെന്റ് ലോ കോളേജിൽനിന്നുമായി നിയമത്തിൽ ബിരുദവും ബിരുദാനന്തര ബിരുദവും നേടി.
വിദ്യാർത്ഥി രാഷ്ട്രീയത്തിലൂടെയാണ് സതീശൻ പൊതുപ്രവർത്തന രംഗത്തേക്ക് പ്രവേശിച്ചത്. 1986-87 കാലഘട്ടത്തിൽ മഹാത്മാഗാന്ധി സർവ്വകലാശാല യൂണിയൻ ചെയർമാനായും തുടർന്ന് നാഷണൽ സ്റ്റുഡന്റ്സ് യൂണിയന്റെ (എൻ.എസ്.യു) സെക്രട്ടറിയായും പ്രവർത്തിച്ചിട്ടുണ്ട്. രാഷ്ട്രീയ പ്രവേശനത്തിന് ശേഷം ഏകദേശം 10 വർഷക്കാലം അദ്ദേഹം കേരള ഹൈക്കോടതിയിൽ അഭിഭാഷകനായി പ്രാക്ടീസ് ചെയ്തു. ആർ. ലക്ഷ്മി പ്രിയയാണ് ഭാര്യ. ഉണ്ണിമായ ഏക മകളാണ്.
1996-ലെ നിയമസഭാ തിരഞ്ഞെടുപ്പിൽ പറവൂർ മണ്ഡലത്തിൽ സി.പി.ഐയിലെ പി. രാജുവിനോട് പരാജയപ്പെട്ടുകൊണ്ടാണ് സതീശൻ തിരഞ്ഞെടുപ്പ് രാഷ്ട്രീയം ആരംഭിക്കുന്നത്. എന്നാൽ 2001-ൽ നടന്ന അടുത്ത തിരഞ്ഞെടുപ്പിൽ ഇതേ മണ്ഡലത്തിൽനിന്ന് ആദ്യമായി നിയമസഭയിലേക്ക് തിരഞ്ഞെടുക്കപ്പെട്ടു. തുടർന്ന് 2006, 2011, 2016, 2021, 2026 വർഷങ്ങളിൽ നടന്ന തിരഞ്ഞെടുപ്പുകളിൽ പറവൂർ മണ്ഡലത്തിൽനിന്ന് തുടർച്ചയായി അദ്ദേഹം വിജയിച്ചു.
2026-ലെ നിയമസഭാ തിരഞ്ഞെടുപ്പിൽ പറവൂർ മണ്ഡലത്തിൽനിന്ന് 20,600 വോട്ടുകളുടെ ഭൂരിപക്ഷത്തിനാണ് സതീശൻ വിജയിച്ചത്. ആകെ 78,658 വോട്ടുകൾ അദ്ദേഹം നേടി. എൽ.ഡി.എഫ് സ്ഥാനാർത്ഥി ഇ.ടി. ടൈസണ് 58,058 വോട്ടുകളാണ് ലഭിച്ചത്. 2021-ലെ തിരഞ്ഞെടുപ്പിന് ശേഷം രമേശ് ചെന്നിത്തലയുടെ പിൻഗാമിയായി പ്രതിപക്ഷ നേതാവായ സതീശൻ, പാർട്ടിയുടെ പുനരുജ്ജീവനത്തിൽ നിർണ്ണായക പങ്ക് വഹിച്ചതായാണ് വിലയിരുത്തൽ.
നിയമസഭയിൽ ചീഫ് വിപ്പ് ആയും കേരള പ്രദേശ് കോൺഗ്രസ് കമ്മിറ്റിയുടെ (കെ.പി.സി.സി) വൈസ് പ്രസിഡന്റായും അദ്ദേഹം സേവനമനുഷ്ഠിച്ചിട്ടുണ്ട്. 2024-ലെ ലോക്സഭാ തിരഞ്ഞെടുപ്പിൽ കേരളത്തിലെ 20-ൽ 18 സീറ്റുകളിൽ യു.ഡി.എഫിനെ വിജയത്തിലെത്തിച്ചതും തദ്ദേശ തിരഞ്ഞെടുപ്പിലെ മുന്നേറ്റവും സതീശന്റെ രാഷ്ട്രീയ തന്ത്രങ്ങളുടെ വിജയമായി കണക്കാക്കപ്പെടുന്നു. തിരഞ്ഞെടുപ്പിന് മുന്നോടിയായി അദ്ദേഹം നയിച്ച 30 ദിവസത്തെ ‘യു.ഡി.എഫ് പുതുയുഗ യാത്ര’ ജനപിന്തുണ വർദ്ധിപ്പിക്കുന്നതിൽ വലിയ സ്വാധീനം ചെലുത്തി.
മികച്ച പാർലമെന്റേറിയൻ എന്ന നിലയിൽ ശ്രദ്ധേയനായ സതീശൻ ആറ് പതിറ്റാണ്ട് പിന്നിടുന്ന ജീവിതാനുഭവങ്ങളുമായാണ് മുഖ്യമന്ത്രി സ്ഥാനത്തേക്ക് എത്തുന്നത്. നിയമസഭയിൽ വിവിധ വിഷയങ്ങളിൽ അദ്ദേഹം നടത്തിയ വാദമുഖങ്ങൾ ഭരണപക്ഷത്തെ പലപ്പോഴും പ്രതിരോധത്തിലാക്കിയിരുന്നു. കെ.പി.സി.സി വൈസ് പ്രസിഡന്റ് എന്ന നിലയിലും പാർലമെന്ററി പാർട്ടി നേതാവ് എന്ന നിലയിലുമുള്ള പരിചയസമ്പത്ത് ഭരണനിർവ്വഹണത്തിന് കരുത്താകുമെന്ന് പാർട്ടി വൃത്തങ്ങൾ അറിയിച്ചു.
യു.ഡി.എഫ് നിയമസഭാ കക്ഷി യോഗത്തിന് പിന്നാലെ ഘടകകക്ഷി നേതാക്കൾ ഗവർണറെ കണ്ട് സർക്കാർ രൂപീകരണത്തിനുള്ള അവകാശവാദം ഉന്നയിച്ചു. കേരള കോൺഗ്രസ് ജോസഫ്, ആർ.എസ്.പി ഉൾപ്പെടെയുള്ള കക്ഷികൾ പിന്തുണക്കത്ത് കൈമാറി. ഗവർണറുടെ ക്ഷണം ലഭിച്ചതോടെ പുതിയ മന്ത്രിസഭയുടെ സത്യപ്രതിജ്ഞ സംബന്ധിച്ച നടപടികൾ വേഗത്തിലാകുമെന്ന് ഔദ്യോഗിക കേന്ദ്രങ്ങൾ വ്യക്തമാക്കി.
The hero of Paravur is now the hero of Kerala! Get to know VDS!
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
