മോൺട്രിയൽ: ക്യുബെക് പ്രവിശ്യയിൽ സ്ഥിരതാമസം (Permanent Residence) ആഗ്രഹിക്കുന്നവർക്ക് വലിയ ആശ്വാസം നൽകിക്കൊണ്ട് ‘ക്യുബെക് എക്സ്പീരിയൻസ് പ്രോഗ്രാം’ (PEQ) പുനരാരംഭിക്കുന്നു. ക്യുബെക്കിന്റെ പുതിയ പ്രീമിയർ ക്രിസ്റ്റിൻ ഫ്രെഷെറ്റ് ആണ് രണ്ട് വർഷത്തേക്ക് ഈ പ്രോഗ്രാം വീണ്ടും തുടങ്ങുമെന്ന് ഔദ്യോഗികമായി പ്രഖ്യാപിച്ചത്.
2025 നവംബറിൽ നിർത്തലാക്കിയ പ്രോഗ്രാമാണ് ഇപ്പോൾ വീണ്ടും സജീവമാകുന്നത്. ക്യുബെക്കിലെ വിദ്യാഭ്യാസ സ്ഥാപനങ്ങളിൽ നിന്ന് പഠിച്ചിറങ്ങിയ വിദേശ വിദ്യാർത്ഥികൾക്കും, അവിടെ ജോലി ചെയ്യുന്ന വിദേശ തൊഴിലാളികൾക്കും സ്ഥിരതാമസത്തിന് ഏറ്റവും എളുപ്പമുള്ള മാർഗമായിരുന്നു പി.ഇ.ക്യു (PEQ).
ക്യുബെക്കിന്റെ സംസ്കാരവുമായി ഇതിനകം പൊരുത്തപ്പെട്ടവർക്കും ഫ്രഞ്ച് സംസാരിക്കുന്നവർക്കും കുടിയേറ്റ കാര്യത്തിൽ കൂടുതൽ വ്യക്തതയും മുൻഗണനയും നൽകും. തൽക്കാലം രണ്ട് വർഷത്തേക്കാണ് പ്രോഗ്രാം വരുന്നത്. എന്നാൽ എന്ന് മുതൽ അപേക്ഷ സ്വീകരിച്ചു തുടങ്ങുമെന്നോ യോഗ്യതാ മാനദണ്ഡങ്ങളിൽ മാറ്റമുണ്ടോ എന്നോ വ്യക്തമാക്കിയിട്ടില്ല.
പുതിയ ഇളവുകൾ പ്രഖ്യാപിക്കുമ്പോഴും കുടിയേറ്റക്കാരുടെ എണ്ണത്തിൽ നിയന്ത്രണം വേണമെന്ന നിലപാടിൽ പ്രീമിയർ ഉറച്ചുനിൽക്കുന്നു. ക്യുബെക്കിന്റെ സാമ്പത്തിക ശേഷിയും ഭാഷാപരമായ പ്രത്യേകതകളും കണക്കിലെടുത്ത് പുതുതായി എത്തുന്നവരുടെ എണ്ണം പരിമിതപ്പെടുത്തേണ്ടതുണ്ടെന്ന് അദ്ദേഹം പറഞ്ഞു. കൂടാതെ, അഭയാർത്ഥികളെ കാനഡയുടെ മറ്റ് ഭാഗങ്ങളിലേക്ക് പുനർവിന്യസിക്കണമെന്നും ഇതിനായി ചിലവാകുന്ന തുക ഫെഡറൽ സർക്കാർ ക്യുബെക്കിന് നൽകണമെന്നും പ്രീമിയർ ആവശ്യപ്പെട്ടു.
നിലവിൽ ക്യുബെക്കിൽ പി.ആർ ലഭിക്കാൻ ‘സ്കിൽഡ് വർക്കർ സെലക്ഷൻ പ്രോഗ്രാം’ (PSTQ) മാത്രമാണ് ഏക പോംവഴി. പോയിന്റ് അടിസ്ഥാനത്തിലുള്ള ഈ സംവിധാനത്തിൽ ഫ്രഞ്ച് ഭാഷാ വൈദഗ്ധ്യത്തിനാണ് ഏറ്റവും കൂടുതൽ പ്രാധാന്യം നൽകുന്നത്. പി.ഇ.ക്യു (PEQ) കൂടി തിരിച്ചെത്തുന്നതോടെ കൂടുതൽ പേർക്ക് ലളിതമായ രീതിയിൽ ക്യുബെക്കിൽ സ്ഥിരതാമസത്തിന് അവസരമൊരുങ്ങും.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Quebec re-opens flagship permanent residence pathway
