ലോകത്തെ ഏറ്റവും മികച്ച സർവ്വകലാശാലകളെ കണ്ടെത്താനുള്ള ക്യുഎസ് (Quacquarelli Symonds) വേൾഡ് യൂണിവേഴ്സിറ്റി റാങ്കിംഗ് പുറത്തുവിട്ടു. 2026-ലെ റിപ്പോർട്ട് പ്രകാരം കാനഡയിൽ നിന്നുള്ള രണ്ട് മുൻനിര സർവ്വകലാശാലകൾ ലോകത്തെ മികച്ച 30 വിദ്യഭ്യാസ സ്ഥാപനങ്ങളുടെ പട്ടികയിൽ ഇടംപിടിച്ചു. ടൊറന്റോ സർവ്വകലാശാല (University of Toronto), ബ്രിട്ടീഷ് കൊളംബിയ സർവ്വകലാശാല (University of British Columbia) എന്നിവയാണ് അഞ്ച് പ്രധാന പഠനവിഷയങ്ങളിലും ആഗോളതലത്തിൽ മികവ് പുലർത്തിയത്.
1900-ലധികം വിദ്യാഭ്യാസ സ്ഥാപനങ്ങളെ ഉൾപ്പെടുത്തിക്കൊണ്ട് തയ്യാറാക്കിയ പട്ടികയുടെ പതിനാറാമത് പതിപ്പാണിത്. ആകെ ആറ് കനേഡിയൻ സർവ്വകലാശാലകൾ വിവിധ വിഷയങ്ങളിലായി ആദ്യ 100 റാങ്കിനുള്ളിൽ സ്ഥാനം നിലനിർത്തിയിട്ടുണ്ട്. ലൈഫ് സയൻസ് & മെഡിസിൻ, എൻജിനീയറിംഗ് & ടെക്നോളജി, നാച്ചുറൽ സയൻസ്, ആർട്സ് & ഹ്യൂമാനിറ്റീസ്, സോഷ്യൽ സയൻസ് & മാനേജ്മെന്റ് എന്നിങ്ങനെ അഞ്ച് വിഭാഗങ്ങളിലായാണ് റാങ്കിംഗ് നിശ്ചയിച്ചിരിക്കുന്നത്.
കാനഡയിലെ സർവ്വകലാശാലകളിൽ ടൊറന്റോ സർവ്വകലാശാലയാണ് ഏറ്റവും മികച്ച പ്രകടനം കാഴ്ചവെച്ചത്. എല്ലാ വിഷയങ്ങളിലും 12 മുതൽ 17 വരെയുള്ള റാങ്കുകൾ നേടിക്കൊണ്ട് കഴിഞ്ഞ വർഷത്തേക്കാൾ മികച്ച മുന്നേറ്റം നടത്താൻ സർവ്വകലാശാലയ്ക്ക് സാധിച്ചു. ബ്രിട്ടീഷ് കൊളംബിയ സർവ്വകലാശാല എൻജിനീയറിംഗ്, സോഷ്യൽ സയൻസ് എന്നീ വിഭാഗങ്ങളിൽ നില മെച്ചപ്പെടുത്തിയപ്പോൾ, വാട്ടർലൂ സർവ്വകലാശാല തങ്ങളുടെ റാങ്കിംഗിൽ ഏഴ് സ്ഥാനങ്ങളുടെ വലിയ കുതിപ്പാണ് നടത്തിയത്. ആൽബർട്ട സർവ്വകലാശാല നാച്ചുറൽ സയൻസ് വിഭാഗത്തിൽ 98-ാം സ്ഥാനം നേടി ഇത്തവണ ആദ്യ നൂറിൽ ഇടംപിടിച്ചു.
വിദേശ പഠനം ആഗ്രഹിക്കുന്ന വിദ്യാർത്ഥികൾക്ക് ഏറെ ഉപകാരപ്രദമാണ് ഈ പുതിയ പട്ടിക. കാനഡയിൽ പഠിക്കാൻ ആഗ്രഹിക്കുന്നവർക്ക് അംഗീകൃത ഡിഎൽഐ (Designated Learning Institution) തിരഞ്ഞെടുക്കുന്നതിനും സ്റ്റഡി പെർമിറ്റിനായി അപേക്ഷിക്കുന്നതിനും ഈ റാങ്കിംഗ് മാനദണ്ഡമാക്കാം. ആഗോളതലത്തിൽ ഹാർവാർഡ് സർവ്വകലാശാലയും മസാച്യുസെറ്റ്സ് ഇൻസ്റ്റിറ്റ്യൂട്ട് ഓഫ് ടെക്നോളജിയുമാണ് (MIT) റാങ്കിംഗിൽ ആധിപത്യം തുടരുന്നത്.
QS World University Rankings 2026: These universities in Canada make it to the top 30 in the world
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
