ടൊറന്റോ: 2023-ൽ ടൊറന്റോ പിയേഴ്സൺ വിമാനത്താവളത്തിൽ നടന്ന കാനഡയിലെ ഏറ്റവും വലിയ സ്വർണ്ണ കവർച്ചാ കേസിൽ പ്രതിയായ അർസലാൻ ചൗധരിയെ (43) നാല് വർഷം തടവ് ശിക്ഷയ്ക്ക് വിധിച്ചു. ബ്രാംപ്ടൺ കോടതി ബുധനാഴ്ചയാണ് ശിക്ഷാവിധി പുറപ്പെടുവിച്ചത്. 22 മില്യൺ ഡോളർ കവർന്ന കേസിലെ ഗൂഢാലോചനയുൾപ്പെടെയുള്ള കുറ്റങ്ങൾ പരിഗണിച്ചാണ് നടപടിയെന്ന് പ്രതിഭാഗം അഭിഭാഷകൻ ഹർവാൽ ബസ്സി അറിയിച്ചു.
ദുബായിൽ നിന്ന് ടൊറന്റോയിലേക്ക് മടങ്ങുന്നതിനിടെ ജനുവരിയിലാണ് പീൽ റീജിയണൽ പോലീസ് ചൗധരിയെ അറസ്റ്റ് ചെയ്തത്. 5,000 ഡോളറിന് മുകളിലുള്ള മോഷണം, കുറ്റകൃത്യത്തിലൂടെ സമ്പാദിച്ച സ്വത്ത് കൈവശം വെക്കൽ, ക്രിമിനൽ ഗൂഢാലോചന എന്നീ കുറ്റങ്ങളാണ് ഇയാൾക്കെതിരെ ചുമത്തിയിരുന്നത്. മുൻകൂർ തടവിൽ കഴിഞ്ഞ 174 ദിവസങ്ങൾ ശിക്ഷാ കാലാവധിയിൽ നിന്ന് കുറയ്ക്കുമെന്ന് ജസ്റ്റിസ് ഷാനൻ മക്ഫെർസൺ വ്യക്തമാക്കി. കൂടാതെ, മോഷണം പോയ തുകയ്ക്ക് പകരമായി 40 വർഷത്തെ തിരിച്ചടവ് ഉത്തരവും (restitution order) കോടതി പുറപ്പെടുവിച്ചു.
സ്വിറ്റ്സർലൻഡിലെ സൂറിച്ചിൽ നിന്ന് എയർ കാനഡ വിമാനത്തിൽ എത്തിയ 400 കിലോഗ്രാം സ്വർണ്ണവും 2.5 മില്യൺ ഡോളറിന്റെ വിദേശ കറൻസിയുമാണ് 2023 ഏപ്രിൽ 17-ന് കാണാതായത്. എയർ കാനഡ ജീവനക്കാരും പുറത്തുള്ളവരും അടങ്ങുന്ന രണ്ട് സംഘങ്ങളാണ് കവർച്ചയ്ക്ക് പിന്നിലെന്ന് പോലീസ് അന്വേഷണത്തിൽ കണ്ടെത്തിയിരുന്നു. മോഷ്ടിച്ച സ്വർണ്ണം കാനഡയ്ക്ക് പുറത്തേക്ക് കടത്തുന്നതിനും വിൽക്കുന്നതിനും സൗകര്യമൊരുക്കിയത് ചൗധരിയാണെന്ന് പോലീസ് ഇൻസ്പെക്ടർ മൈക്ക് മാവിറ്റി നേരത്തെ വെളിപ്പെടുത്തിയിരുന്നു.
കവർച്ചയുടെ ആസൂത്രണത്തിൽ ചൗധരിക്ക് പ്രധാന പങ്കുണ്ടെന്ന് പ്രോസിക്യൂഷൻ രേഖകൾ വ്യക്തമാക്കുന്നു. കവർച്ചയുമായി ബന്ധപ്പെട്ട് ഇതുവരെ ഏഴ് പേരെ പോലീസ് അറസ്റ്റ് ചെയ്തിട്ടുണ്ട്. പ്രതിക്ക് ഏഴ് വർഷത്തെ തടവ് ശിക്ഷ നൽകണമെന്നാണ് പ്രോസിക്യൂഷൻ കോടതിയിൽ ആവശ്യപ്പെട്ടിരുന്നത്. എയർ കാനഡ ജീവനക്കാരുടെ സഹായത്തോടെയാണ് മോഷണം നടന്നതെന്ന് അന്വേഷണ ഉദ്യോഗസ്ഥർ സ്ഥിരീകരിച്ചിട്ടുണ്ട്.
Arsalan Chaudhry sentenced to four years in prison for $22 million Pearson Airport robbery
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
