ഒട്ടാവ: കാനഡയിൽ സാധാരണക്കാരന്റെ കുടുംബ ബജറ്റ് തെറ്റിച്ചുകൊണ്ട് നിത്യോപയോഗ സാധനങ്ങളുടെ വിലയിൽ വൻ വർദ്ധനവ്. സ്റ്റാറ്റിസ്റ്റിക്സ് കാനഡ പുറത്തുവിട്ട ഏറ്റവും പുതിയ കണക്കുകൾ പ്രകാരം കഴിഞ്ഞ വർഷം ഫെബ്രുവരിയെ അപേക്ഷിച്ച് പലചരക്ക് സാധനങ്ങളുടെ വിലയിൽ 5.7 ശതമാനം വർദ്ധനവാണ് രേഖപ്പെടുത്തിയിരിക്കുന്നത്. രാജ്യത്തെ മൊത്തം പണപ്പെരുപ്പ നിരക്കായ 1.8 ശതമാനത്തേക്കാൾ വളരെ ഉയർന്ന നിരക്കാണിത് എന്നതുകൊണ്ടുതന്നെ പ്രവാസികൾ ഉൾപ്പെടെയുള്ള കനേഡിയൻ ജനത വലിയ സാമ്പത്തിക പ്രതിസന്ധിയാണ് നേരിടുന്നത്. മാരിടൈം പ്രവിശ്യകളിലാണ് വിലക്കയറ്റം ഏറ്റവും രൂക്ഷമായി ബാധിച്ചിട്ടുള്ളത്.
സാധാരണയായി കനേഡിയൻ കുടുംബങ്ങൾ വാങ്ങുന്ന 105 അവശ്യസാധനങ്ങളുടെ ശരാശരി വില വിശകലനം ചെയ്താണ് ഫെഡറൽ ഏജൻസി ഈ റിപ്പോർട്ട് തയ്യാറാക്കിയിരിക്കുന്നത്. ഇതിൽ ഏറ്റവും വലിയ വിലക്കയറ്റം ഉണ്ടായത് മാംസ ഉത്പന്നങ്ങൾക്കാണ്. ബീഫ് സ്ട്രിപ്ലോയിൻ കഷണങ്ങൾക്ക് കിലോഗ്രാമിന് 7.51 ഡോളർ വർദ്ധിച്ച് 35.56 ഡോളറിലെത്തി. അതായത് ഒറ്റവർഷം കൊണ്ട് 26.8 ശതമാനത്തിന്റെ വർദ്ധനവ്. അതുപോലെ തന്നെ കോഴിയിറച്ചിയുടെ വിലയിൽ 43.8 ശതമാനത്തിന്റെ വൻ കുതിച്ചുചാട്ടമാണുണ്ടായത്.
കാപ്പിക്കുരു പാക്കറ്റുകൾക്ക് 29.9 ശതമാനവും വില വർദ്ധിച്ചു. എല്ലാ സാധനങ്ങൾക്കും വില കൂടി എന്ന് മാത്രമല്ല ഈ കണക്കുകൾ വ്യക്തമാക്കുന്നത്. ചില നിത്യോപയോഗ സാധനങ്ങൾക്ക് വിലയിൽ കാര്യമായ കുറവും രേഖപ്പെടുത്തിയിട്ടുണ്ട്. ഉദാഹരണത്തിന് തണ്ണിമത്തൻ വർഗ്ഗത്തിൽപ്പെട്ട കന്റലൂപ്പുകൾക്ക് 28.9 ശതമാനവും ഒലിവ് ഓയിലിന് 18.5 ശതമാനവും വില കുറഞ്ഞു. ഓറഞ്ച്, പിയർ തുടങ്ങിയ പഴവർഗ്ഗങ്ങൾക്കും കഴിഞ്ഞ വർഷത്തെ അപേക്ഷിച്ച് വില കുറവാണ്. അതേസമയം പീനട്ട് ബട്ടർ, മയോണൈസ്, ചീസ് തുടങ്ങിയ ഉത്പന്നങ്ങളുടെ വിലയിൽ വലിയ മാറ്റങ്ങളൊന്നും വന്നിട്ടില്ല എന്നത് ആശ്വാസകരമാണ്.
കാനഡയിലെ പ്രവിശ്യകൾ തിരിച്ചു പരിശോധിക്കുമ്പോൾ നോവ സ്കോഷ്യയിലാണ് ഏറ്റവും ഉയർന്ന വിലക്കയറ്റം (8.5%) രേഖപ്പെടുത്തിയത്. എന്നാൽ കാനഡയിൽ ജീവിക്കാൻ ഏറ്റവും കൂടുതൽ പണം ചിലവാകുന്നത് ന്യൂഫൗണ്ട്ലാൻഡ് ആൻഡ് ലാബ്രഡോറിലാണ്. ഇവിടെ നിശ്ചയിക്കപ്പെട്ട 105 അവശ്യസാധനങ്ങളുടെ ഒരു കിറ്റ് വാങ്ങാൻ 743.69 ഡോളർ ചിലവാകും. ഒന്റാറിയോയിലാണ് ഏറ്റവും കുറവ് ചിലവ് വരുന്നത്. മിഡിൽ ഈസ്റ്റിലെ പുതിയ യുദ്ധ സാഹചര്യങ്ങളും എണ്ണവില വർദ്ധനവും കാരണം വരും മാസങ്ങളിൽ ചരക്കുകടത്തു കൂലി ഉയരാൻ സാധ്യതയുണ്ടെന്നും ഇത് പലചരക്ക് വില വീണ്ടും വർദ്ധിപ്പിച്ചേക്കുമെന്നും വിദഗ്ദ്ധർ മുന്നറിയിപ്പ് നൽകുന്നുണ്ട്.
Kitchen costs in Canada will continue to rise; Meat and coffee prices will soar; Chicken prices will increase by 43 percent
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
