ഒട്ടാവ : അമേരിക്കയുമായുള്ള ഉഭയകക്ഷി വ്യാപാര ചർച്ചകളിൽ അനുകൂലമായ അന്തരീക്ഷം സൃഷ്ടിക്കുന്നതിന്റെ ഭാഗമായി അമേരിക്കൻ മദ്യം വീണ്ടും പ്രവിശ്യാ വിപണികളിലേക്ക് തിരിച്ചെത്തിക്കാൻ കാനഡ. അമേരിക്കൻ പ്രസിഡന്റ് ഡൊണാൾഡ് ട്രംപുമായി പ്രധാനമന്ത്രി മാർക്ക് കാർണി നടത്തുന്ന നിർണായക ചർച്ചകൾക്ക് മുന്നോടിയായാണ് ഈ തീരുമാനം. നല്ല സൂചനയായി അമേരിക്കൻ നിർമ്മിത മദ്യം കടകളിൽ തിരികെ എത്തിക്കാൻ മാർക്ക് കാർണി പ്രവിശ്യകളോട് നിർദ്ദേശിച്ചതായി ന്യൂഫൗണ്ട്ലാന്റ് ആൻഡ് ലാബ്രഡോർ പ്രീമിയർ ടോണി വേക്കാം വ്യക്തമാക്കി. വെള്ളിയാഴ്ചയോടെ വ്യാപാര കരാർ യാഥാർത്ഥ്യമാകുമെന്നാണ് ഇരുരാജ്യങ്ങളുടെയും പ്രതീക്ഷ.
യു.എസ് താരിഫ് നയങ്ങളിൽ പ്രതിഷേധിച്ച് 2025 ഫെബ്രുവരിയിലാണ് ന്യൂഫൗണ്ട്ലാന്റ് ആൻഡ് ലാബ്രഡോർ ലിക്വർ കോർപ്പറേഷൻ ഉൾപ്പെടെയുള്ള കാനഡയിലെ പ്രവിശ്യാ ഏജൻസികൾ അമേരിക്കൻ മദ്യം വിപണിയിൽ നിന്ന് പിൻവലിച്ചത്. തുടർന്ന് അതേവർഷം ഡിസംബറിൽ അവശേഷിച്ച സ്റ്റോക്ക് വിറ്റഴിക്കുകയും ലഭിച്ച 7,50,000 ഡോളർ ചാരിറ്റി പ്രവർത്തനങ്ങൾക്ക് നൽകുകയും ചെയ്തിരുന്നു. ഇരുരാജ്യങ്ങളും തമ്മിലുള്ള അന്തിമ കരാർ ഒപ്പുവെക്കുന്നതോടെ മാത്രമേ യു.എസ് ഉൽപ്പന്നങ്ങൾ പൂർണ്ണമായി വിപണിയിലേക്ക് തിരിച്ചെത്തൂ എന്ന് ധനകാര്യ മന്ത്രാലയം വ്യക്തമാക്കിയിട്ടുണ്ട്.
അതേസമയം, അമേരിക്കൻ ഉൽപ്പന്നങ്ങൾ വീണ്ടും വിപണിയിലെത്തിയാലും കനേഡിയൻ ഉപഭോക്താക്കൾ അത് സ്വീകരിക്കുമോ എന്ന കാര്യത്തിൽ പ്രീമിയർ ടോണി വേക്കാം സംശയം പ്രകടിപ്പിച്ചു. പ്രാദേശിക ഉൽപ്പന്നങ്ങൾക്ക് ജനങ്ങൾ കൂടുതൽ മുൻഗണന നൽകിത്തുടങ്ങിയതാണ് കാരണം. എന്നാലും യുഎസ് ബ്രാൻഡുകൾ വീണ്ടും ലഭ്യമാക്കാനുള്ള തീരുമാനം രാജ്യങ്ങൾ തമ്മിലുള്ള ബന്ധം കൂടുതൽ സുഗമമാക്കാൻ സഹായിക്കുമെന്നാണ് വിലയിരുത്തൽ. local വിപണികൾക്കും കനേഡിയൻ വൈനറികൾക്കും നൽകുന്ന പിന്തുണയിൽ മാറ്റമുണ്ടാകില്ലെന്നും ധനകാര്യ വകുപ്പ് അറിയിച്ചു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
