സ്റ്റിറ്റ്സ്വില്ല്: ഒരൊറ്റ ഫോൺ ചാർജർ ഒരു കുടുംബത്തിന്റെ സമ്പാദ്യം മുഴുവൻ ചാരമാക്കുമെന്ന് ആരെങ്കിലും കരുതുമോ? എന്നാൽ വിദേശത്തുണ്ടായ ഈ ഞെട്ടിക്കുന്ന സംഭവം നമ്മളിൽ ഭൂരിഭാഗം പേരും നിത്യജീവിതത്തിൽ ചെയ്യുന്ന ഒരു വലിയ അബദ്ധത്തിലേക്കാണ് വിരൽ ചൂണ്ടുന്നത്. കിടക്കയിൽ വെച്ച് പവർ ബാങ്ക് ഉപയോഗിച്ച് മൊബൈൽ ഫോൺ ചാർജ് ചെയ്യുന്നതിനിടെ ഉണ്ടായ സ്ഫോടനത്തിൽ ഒരു കുടുംബത്തിന് നഷ്ടമായത് തങ്ങളുടെ വീടും സമ്പാദ്യവുമാണ്. കാനഡയിലെ സ്റ്റിറ്റ്സ്വില്ലിലാണ് മനസ്സാക്ഷിയെ ഞെട്ടിച്ച ഈ ദുരന്തം അരങ്ങേറിയത്.
കഴിഞ്ഞ മാസം ഒരു രാത്രിയിലാണ് അപകടങ്ങളുടെ പരമ്പരയ്ക്ക് തുടക്കമിട്ട ആ ദുരന്തം സംഭവിച്ചത്. ഗാബി ഹാമണ്ട് എന്ന പെൺകുട്ടി തന്റെ കിടക്കയിൽ ‘INIU BI-B41’ എന്ന മോഡൽ പവർ ബാങ്ക് കണക്ട് ചെയ്ത് ഫോൺ ചാർജ് ചെയ്യാൻ വെച്ചിരുന്നു. പെട്ടെന്നാണ് വലിയൊരു പൊട്ടിത്തെറി ശബ്ദം കേട്ട് ഗാബി ഞെട്ടിയുണർന്നത്. കണ്ണ് തുറക്കുമ്പോഴേക്കും കിടക്കയിലും മുറിയിലാകെയും തീ പടർന്നിരുന്നു. പരിഭ്രാന്തയായ ഗാബി ഒച്ചവെച്ച് വീട്ടുകാരെ വിവരമറിയിച്ചതുകൊണ്ട് മാത്രമാണ് കുടുംബത്തിലെ എല്ലാവരും വലിയ പരിക്കുകളില്ലാതെ അത്ഭുതകരമായി രക്ഷപ്പെട്ടത്.
അഗ്നിശമന സേന എത്തിയാണ് ഒടുവിൽ തീ നിയന്ത്രണവിധേയമാക്കിയത്. അപ്പോഴേക്കും വീടിന്റെ ഭൂരിഭാഗവും കത്തിയമർന്നിരുന്നു. ഏകദേശം 7.5 ലക്ഷം ഡോളറിന്റെ (750,000 ഡോളർ) വൻ നാശനഷ്ടമാണ് ഈ അപകടം മൂലം കുടുംബത്തിനുണ്ടായത്. പിന്നീട് നടത്തിയ അന്വേഷണത്തിലാണ് ഞെട്ടിക്കുന്ന മറ്റൊരു വിവരം കൂടി പുറത്തുവന്നത്. അപകടമുണ്ടാക്കിയ ഈ പ്രത്യേക പവർ ബാങ്ക് മോഡൽ അമിതമായി ചൂടാകുന്നു എന്ന പരാതിയെ തുടർന്ന് യു.എസിലെ ആമസോൺ പ്ലാറ്റ്ഫോമിൽ നിന്നും നേരത്തെ തന്നെ കമ്പനി പിൻവലിച്ചിരുന്നതാണ് (Recalled product). തങ്ങൾ ഉപയോഗിക്കുന്നത് അപകടകാരിയായ ഒരു ഉപകരണമാണെന്ന് ഈ കുടുംബത്തിന് അറിയില്ലായിരുന്നു.
ലിഥിയം-അയൺ ബാറ്ററികൾക്ക് തീപിടിച്ചാലുണ്ടാകുന്ന അപകടങ്ങളെക്കുറിച്ച് കടുത്ത മുന്നറിയിപ്പാണ് ഒട്ടാവ ഫയർ സർവീസിലെ ഉദ്യോഗസ്ഥർ നൽകുന്നത്. ഇത്തരം ബാറ്ററികൾ കത്തുമ്പോൾ ഉണ്ടാകുന്ന ചൂട് അതിശക്തമായിരിക്കും. തീപിടിത്തമുണ്ടായാൽ ആളുകൾക്ക് ജീവനും കൊണ്ട് രക്ഷപ്പെടാൻ പരമാവധി മൂന്ന് മിനിറ്റിൽ താഴെ സമയം മാത്രമേ ലഭിക്കൂ. ഫോണുകളും പവർ ബാങ്കുകളും ചാർജ് ചെയ്യുമ്പോൾ ബെഡ് ഷീറ്റ്, സോഫ തുടങ്ങിയ പെട്ടെന്ന് തീപിടിക്കുന്ന പ്രതലങ്ങളിൽ വെക്കരുതെന്നും വായുസഞ്ചാരമുള്ള കടുത്ത പ്രതലങ്ങളിൽ മാത്രമേ ചാർജ് ചെയ്യാവൂ എന്നും അധികൃതർ ഓർമ്മിപ്പിക്കുന്നു. പലപ്പോഴും കൈയിൽ നിന്നും താഴെ വീഴുമ്പോൾ ഇത്തരം ബാറ്ററികളുടെ ആന്തരിക ഘടനയ്ക്ക് കേടുപാടുകൾ സംഭവിക്കാറുണ്ട്. ഇത് പിന്നീട് വലിയ ദുരന്തങ്ങൾക്ക് വഴിവെക്കുമെന്നും സുരക്ഷാ ഉദ്യോഗസ്ഥർ വ്യക്തമാക്കുന്നു.
Power bank explodes in Canada, house burns down: $7.5 million in damage
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
