ഹാലിഫാക്സ്: കാനഡയിലെ പ്രധാന അടിസ്ഥാന സൗകര്യ വികസന പദ്ധതികൾക്കും ഊർജ്ജ പദ്ധതികൾക്കും വേഗത്തിൽ അനുമതി നൽകുന്നതിനായി ഫെഡറൽ സർക്കാരും നോവ സ്കോഷ്യ പ്രവിശ്യയും തമ്മിൽ ചരിത്രപരമായ കരാറിൽ ഒപ്പുവെച്ചു. പ്രധാനമന്ത്രി മാർക്ക് കാർണിയും നോവ സ്കോഷ്യ പ്രീമിയർ ടിം ഹൂസ്റ്റണും ചേർന്നാണ് ഈ പുതിയ പദ്ധതി പ്രഖ്യാപിച്ചത്. ‘ഒരു പദ്ധതി, ഒരു അവലോകനം’ (One project, one review model) എന്ന മാതൃകയിലാണ് പുതിയ സംവിധാനം പ്രവർത്തിക്കുക.
നിലവിൽ വലിയ പ്രോജക്റ്റുകൾക്ക് ഫെഡറൽ സർക്കാരിന്റെയും പ്രവിശ്യാ സർക്കാരിന്റെയും പ്രത്യേക അനുമതികൾ തേടേണ്ടതുണ്ട്. ഇത് പലപ്പോഴും പദ്ധതികൾ വൈകുന്നതിനും അനാവശ്യമായ നൂലാമാലകൾക്കും കാരണമാകാറുണ്ട്. എന്നാൽ പുതിയ കരാറിലൂടെ ഇരു സർക്കാരുകളും ഒരേ മാനദണ്ഡങ്ങൾ പങ്കുവെക്കുകയും പരിശോധനകൾ ലഘൂകരിക്കുകയും ചെയ്യും. ഇത് വൻകിട വ്യവസായങ്ങൾക്കും ഖനനത്തിനും ഊർജ്ജ ഉൽപാദനത്തിനും വലിയ ഗുണം ചെയ്യും.
പ്രത്യേകിച്ച് നോവ സ്കോഷ്യയുടെ അഭിമാന പദ്ധതിയായ ‘വിൻഡ് വെസ്റ്റ്’ (Wind West) എന്ന ഓഫ്ഷോർ വിൻഡ് ഫാം പദ്ധതിക്ക് ഈ നീക്കം വലിയ കരുത്താകും. കാനഡയെ ഒരു ഊർജ്ജ സൂപ്പർ പവർ ആക്കി മാറ്റുക എന്ന ലക്ഷ്യത്തോടെയാണ് നീങ്ങുന്നതെന്ന് കൂടിക്കാഴ്ചയിൽ പ്രധാനമന്ത്രി മാർക്ക് കാർണി പറഞ്ഞു. ഇതിനുപുറമെ, വൻകിട ഭവന നിർമ്മാണ പദ്ധതികൾക്കും പ്രവിശ്യാ അതിർത്തികൾ കടന്നുപോകുന്ന വൈദ്യുതി ലൈനുകൾക്കും വിമാനത്താവളങ്ങൾക്കും പുതിയ കരാർ പ്രകാരം വേഗത്തിൽ അനുമതി ലഭിക്കും.
പ്രതിരോധ മേഖലയിലും നോവ സ്കോഷ്യയ്ക്ക് വലിയ നേട്ടങ്ങൾ പ്രധാനമന്ത്രി വാഗ്ദാനം ചെയ്തിട്ടുണ്ട്. നോവ സ്കോഷ്യയിലെയും ന്യൂ ബ്രൺസ്വിക്കിലെയും അടിസ്ഥാന സൗകര്യ വികസനത്തിനായി 3 ബില്യൺ ഡോളറിന്റെ പാക്കേജാണ് അദ്ദേഹം പ്രഖ്യാപിച്ചത്. ഇതിൽ 2 ബില്യൺ ഡോളറിലധികം നോവ സ്കോഷ്യയിലെ സൈനിക കേന്ദ്രങ്ങളുടെ ആധുനികവൽക്കരണത്തിനും യുദ്ധക്കപ്പലുകൾക്കും വിമാനങ്ങൾക്കുമായുള്ള പുതിയ സൗകര്യങ്ങൾക്കും വേണ്ടി ചിലവഴിക്കും. കാനഡയുടെ സാമ്പത്തികവും പ്രതിരോധപരവുമായ വളർച്ചയിൽ നോവ സ്കോഷ്യയ്ക്ക് നിർണ്ണായക പങ്കുണ്ടെന്നും മാർക്ക് കാർണി കൂട്ടിച്ചേർത്തു.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
PM Mark Carney signs deal with N.S. to simplify some environmental reviews
